بابكر سلك
*بعد الهزيمة التانية في دوري رواندا،
*عدنا من جديد للإحباط،
*وكالعادة صبّينا جام غضبنا على المدرب،
*وطبعًا تقييم المدرب لا يتم في المرحلة دي،
*مدرب وجد الفريق كلو جديد،
*لا انسجام بين أفراده،
*بل بعضهم لا يعرف البعض الآخر،
*فريق بدون (عَضَم) خبرات،
*لاعبون يفتقدون لأي شيء،
*حتى الثقة في أنفسهم،
*اضطر للاعتماد على تشكيل جُلّه من الأجانب،
*يعني بيت وسيدو غايب،
*ومعروف أن العمود الفقري للتشكيل إن لم يكن وطنيًا،
*تختفي الغيرة والحماس،
*بل والانسجام،
*مدرب وجد وضع زي ده،
*بالتأكيد داير زمن عشان يوصل للصالح من الطالح،
*ولكن إن أردنا أن نقيم المدرب في هذه المرحلة،
*وجب علينا مقارنة شكل الأداء حاليًا مع شكل الأداء سابقًا خلال دوري موريتانيا والنخبة،
*أعتقد المحايد يلحظ تطورًا ملحوظًا في الأداء والاستحواذ،
*على الرغم من معاناتنا من العقم التهديفي والعكسيات دفاعيًا،
*ودي بالتأكيد المدرب بكون فطن ليها،
*وبالتأكيد حيعمل على علاجها،
*وبالتأكيد في آخر الموسم (كان بقي حيًّا وبقينا حيّين) حا يقدّم لينا تقرير عن اللاعبين،
*يورينا البمشي منو،
*والبجي مواصفاتو شنو،
*عشان نعمل وفق تقرير فني،
*أيها الناس،
*إشكاليتنا الأساسية هي عدم الاستقرار،
*عشان كده كنا ولا زلنا ننادي بوفاق يقود للاستقرار،
*عدم استقرار إداري،
*عدم استقرار فني،
*عدم استقرار حتى في كشف اللاعبين،
*أيها الناس،
*إبعاد المدرب واستبعاد اللاعبين بردّة فعل،
*هو المضي قُدُمًا في درب عدم الاستقرار،
*وبالتالي نعود لنبدأ من الصفر،
*ونبني في كل موسم بنيانًا جديدًا،
*قبل أن يجف نزيله لنبني غيره،
*وكده عمرنا ما حانبني،
*لذا يجب ألّا تهزّنا الهزائم،
*الهزيمة ما بتكتل،
*بكتل عدم الاستفادة منها كسبب للنجاح،
*تعالوا نحارب عدم الاستقرار بالصبر على الجهاز الفني واللاعبين مع إعطائهم الفرصة كاملة،
*فيجب ألّا يدفعوا هم ثمن أخطاء غيرهم،
*أما غيرهم الله يسامحهم،
*كلاي لما يقع ما بقوم سريعًا،
*لو قام سريعًا بختوها ليهو تاني،
*عشان كده بياخد نفسو حتى يقوم،
*خلونا ناخد نفسنا،
*أيها الناس،
*إن تنصروا الله ينصركم،
*أها،
*نجي لي شمارات والي الخرطوم،
*زينة في زينة يا والينا،
*قالوا شغالين والكهربا راجعة لينا،
*دفع مقدم وقطع ناشف ما معانا يا والينا،
سلك كهربا
ننساك كيف والكلب قال: يا حِلّة تنوري بقى شعار لكل المدن والحِلال.
وإلى لقاء.
