بابكر سلك
اليوم يلتقي صقور الجديان بالعراق
ماتش ما ساهل
صعب عديل
فبرغم نسب نزار قباني للجماعة ديل في بلقيس
إلا أن الفرق شاسع ما بين لبنان والعراق
لذا المباراة محتاجة نجاعة من الجهاز الفني ومن الشفوت داخل الملعب
وقبل كدة محتاجة كابتن شفت جدًا
ما مسكين
فلعب الكرة يحتاج شخصية وشفتنة وعكلته
كورتنا الفاتت ضد الجزائر لنا ضربة جزاء أوضح من الشمس
زول احتج ساي مافي
ولا الكابتن
مشى ساي كأنو ما حصل شي
لم يطالب أحد بفار
والفار قال: سيد الحق راضي شن دخل القاضي
القصة دي لو حصلت للمنتخب المصري مثلًا
قبال العفصة بتاعت البنلتي
كان كل اللاعبين رفعوا يدينهم
والجمهور كان هلل وكبر
الحكم ذاتو كان نطط معاهم
لكن نحنا أدينا المسكنة بس
عشان كدة
لاحظ لأي فريق كابتنو مسالم
تلقي غيرتو حبة
وشفتنتو تكاد تنعدم
زمان في جماعة كدة
الواحد يطلع الكورة تماس
ويجري يشيلها بثقة عشان يلعب التماس
الحكم ذاتو يقتنع
ثقة تقنع الكورة ذاتها
وفي نفس الوكت كان في فريق
الكورة إذا مشكوك فيها منو الطلعها
اللاعب يجري يغطي يخليها
شفتنة الكورة مطلوبة وبشدة
بالذات في ماتش النهار ده
(من عاشر قومًا)
المهم
الكيمان في المريخ لسه ما في كوم قارش ملحة كوم
قلنا وفاق قالوا ده اتفاق
معاك لي آخر السكة
ومرحب بالجميع في وفاق هو الحل الأوحد والأمثل
أيها الناس
لا تستعجلوا الأحكام ولا تعجلوا بالشتائم
من حق أي مريخي أن يدلي بدلوه
ومن واجبنا أن نسمع باحترام ونرد بأدب
ولا تبخسوا الناس أشياءهم
بالذات والأيام دي أيام أعياد مريخية
تسعة اطناشر يوم مانديلا العظيم
تحية لكل من كانت له بصمة في ذلك الإنجاز الفريد
وكلو سنة بنكرم جيل مانديلا (لاعبين)
المرة دي تعالوا نكرم جيل مانديلا (مساهمين)
فهناك رجال أتوا بمانديلا وهم خلف الكواليس يقومون بأعمال جليلة
شكرًا لهم جميعًا
المهم
قابلت هلالابي أمس قال لي الندية انعدمت
قلت: صاح… من ستة وتمنين وسيكافا ون الندية انعدمت
جا مانديلا أكد على ذلك
أيها الناس
كلو عام وأنتم بخير
أيها الناس
إن تنصروا الله ينصركم
اها
نجي لي شمارات والي الخرتوم
كان شفت يا والينا
عيد مانديلا حل علينا
خلي الناس طار نوم عينا
ما فارزة راسًا من كرعينا
سلك كهربا
ننساك كيف والكلب قال مانديلا وقفل واحتفل
وإلى لقاء
سلك
