فكي القضارف

بابكر سلك

*لا اريد التحدث عن فوز المريخ
*ولاعن هدف داوودا الجميل
*ولكن مايهمني هو الحديث عن شكل الاداء
*الذين تابعوا المباراة يلاحظون تقدم في مستوي الانسجام والتفاهم في معظم فترات المباراة
*اقول معظم فترات المباراة لان الثلث الاخير منها شهد تدنيا ملحوظا في مخزون اللياقة البدنية
*وهو نتاج طبيعي لضغط المباريات وخصوصا الفريق في طور اعداد
*هذا الانسجام وارتفاع مستوي الاداء وظهور اكثر من لاعب بمستوي افضل مما كان عليه
*ينبئونا بان هناك عمل تدريبي وجهد يبذل لايتانسب مع كمية النقد التي مورست علي الجهاز الفني في الآونة الاخيرة
*ويدلل علي ان الصبر يقودنا الي المضي بخطي حثيثة نحو استعادة امجادنا
*ويستحق الجهاز الفني الثناء علي هذا الجهد المقدر
*فقط الاحظ تكرار العيوب في منطقة قلبي الدفاع
*بالذات في الكرات العالية والمعكوسة
*وبتذكر ايام الروابط الكوتش كان بقول لينا
*موتر سوزوكي ولا احمر ولا اصلي
*ثيردباك مابخت الكورة في صدرو ولا لعاب
*ثيردباك واستوبر مابشيلوا هد ولا بشيلو الفريق
*ده زمن الروابط
*لو كانت هذه النظرية شغالة لي اسي
*يبقي يالجنة التسيير فتشي من اسي
*لكن بصمات المدرب واضحة
*ويكفي توظيفو لداوودا
*اقول قولي هذا لعموم المريخاب
*واستثني منهم من ينتظرون اخفاق المدرب بل يتمنون ذلك لشئ في نفس يعقوب
*يعقوبنا حيرنا
*صفي النية يايعقوب
*فالمريخ لم يعد قادرا علي تحمل سوء نوايا ابنائه
*تعلموا التسامح من رواندا القاعدين فيها دي
*تتذكروا رواندا قبل التسامح كانت كيف؟؟؟
*ولافي زول كان بعرفها
*فصناعة اسباب الحرب تدمر
*والتغاضي عن الاسباب الحقيقية للحرب تعمر
*فهمتوني؟؟؟؟؟
*المهم
*حملت لنا الانباء اخبار فكي القضارف
*قالوا يسلم عليك يسحب منك اعضاء حساسة مايرجعها ليك الا تدفع خمسة مليار
*القصة دي زمان برضو سمعناها
*لكن الوكت داك في السوق العربي
*ياخ الوكت داك لو مديت يدك لي زول واقع جوة بير مابمد ليك يدو
*اخدت فترتها وانتهت
*اسي جات الطبعة الجديدة في القضارف
*وكمان بطلب خمسة مليار عشان يرجع ليك ممتلكاتك
*اسي عليك الله لو لاقدر الله قابلني وسلم علي بالاحضان ذاتو
*وقال داير خمسة جنيه بديها ليهو؟
*خليهو يمشي بالقسمو ليهو الله ريحنا ذاتو
*بتاع القضارف ده قال ليك الشرطة قبضتو
*دخلوهو الحراسة
*شال ليك حساسات الحراسة كلها
*خلي المنتظرين يكوركوا
*يا اخوانا دي مصيبة شنو دي
*وقالوا جابوا ليهم دكتور يكشف عليهم
*دكتور، شنو كمان
*دي دايره ليها دكتور؟؟؟
*غايتو جنس غايتو
*لكن المتتبع للقصص دي
*وبتحليل المعطيات الموجودة
*بخلي احتمال يفرض نفسو
*فكي القضارف ده احتمال سلم علي الفريق اياهو وسلبو احتمال الفوز ببطولة جوية
*لانو الموضوع ده ماطبيعي
*مية سنة وحساسات الظفر ببطولة ماشغالة؟؟؟؟
*غايتو يافكي القضارف
*ايها الناس
*ان تنصروا الله ينصركم
*اها
*نجي لي شمارات والي الخرتوم
*اسي يا والينا
*فكي القضارف ده من وين طلع لينا
*وقصة يسلم يسحب دي يا والينا
*النسوان معانا ولا لوحدينا؟؟؟

سلك كهربا

ننساك كيف والكلب قال لو النسوان مامعانا نطالب بالمساواة طوالي يا اخينا… موش دايرات مساواة بينا

والي لقاء

سلك