بابكر سلك
*المتابع لبطولة العرب إن كان مثلي فإنه يعيش أمنيات وتمنيات ويفتح خيالات
*بالذات المريخاب
*أي لاعب يعمل لقطة
*تعجب به
*ثم تتمناه في المريخ
*ثم تتخيل إنه جا المريخ
*وتظل تفتح خيال إلى أن تشتم ريحة المطار
*ريحة المطار عطرنا المحبب والذي لا يعرف مصدره سوانا
*في ناس كدة ما بعرفوا ريحة المطار من ريحة الأصفار
*فرحانين ساي
*نرجع لبطولة العرب
*متوسط دفاع العراق “أبو ضفيرة”
*طبعًا نحنا في السودان ما في لاعب بعجبنا إلا أبو شعر أو الجناح الشمال
*المهم
*من منا لم يتمنَّ أبو ضفيرة نمرة خمسة وهو يرتدي النجمة؟؟؟
*أنا شخصيًا اتخيلتو كمان ماشي على التمرين في شارع العرضة
*ونتفرج
*مدافع الجزائر الأخضراني الشرس داك
*لا… ده بشبهنا عديييل…. حلاة النجمة فوقو
*والغريبة الطرف الشمال بتاع العراق
*اسكت بس
*طبنجة
*اه وييين يا
*طرف العراق الشمال ده قالوا مريخابي أكتر من خالد ليمونة
*ولسة
*إنتوا شفتوا حاجة
*عليكم الله حارس الأردن ده ما زولنا عديييل كدة؟؟؟
*والشافع نمرة سبعة بتاع الجزائر ده
*ياخ ده بذكرنا دحدوح وعيسى
*زمن ياخ
*لكن زولنا…. من خشمو الصغير ده زولنا
*الدوسري طبعًا للما عارفين
*جدو متربي بالعيش الكان برسلو جدنا على دينار مع كسوة الكعبة
*زولنا تب
*الدوسري أساسًا من الدوسراب غرب السروراب مشى الحج وانقطع هناك
*مريخابي يضارب
*لكن المساك بتاع الأردن ده ماسك فينا قوي ومن ناحية بجينا جاييينا
*الإمارات ما فيها زول بشبهنا
*كلها كولمبيين
*والكولمبواب ديل ما مريخاب
*بكونوا…… كولمبواب
*من الوشم الفي إيدينهم وأضانينهم ده
*وشم كلو أصفار
*ما ناسنا ما ناسنا
*ياخ الشالوا زول الجزائر بالنقالة يشبهونا
*هندام وأدب وذوق
*الاستادات ذاتها بتشبهنا
*ناقصها بس سيد القصب وست الشاي
*والله يرحم الخزين
*وعمك حمزة
*عمك حمزة سيد التسالي
*تسالي عادي وتسالي أسود
*تدفع قرش يملي يدو ويديك
*قرطاس ما في
*تدفع تعريفة يملي يدو ويديك
*عوجة ما في
*الخير راااقد والقلوب مطمئنة
*حتى الجمهور
*يشبهنا
*بدءًا من “جمهوريات” لبنان
*ومرورًا بمهرات العراق الجامحات
*ووصولًا للنشاميات وكل الشاميات
*البشوفن يقول توماتنا عديل كدة
*المهم
*أي شي نشوفو نقول دايرنو
*اتذكرت قصة حبوبة لينا
*قالوا جات من البلد للخرطوم
*بدري الكلام ده
*أيام عندنا جنينة حيوانات
*الوقت داك الحيوانات بي جنينتها
*المهم مشت جنينة الحيوانات
*وبدت تطوف على الأقفاص
*وووب علي وووب علي دا شنو؟
*ده الغزال يا حبوبة
*دايرالي واحد أشيلو البلد
*ثم قفص آخر
*وووب علي وووب علي ده شنو؟
*ده حمار الوحش
*دايرالي واحد أشيلو البلد
*وهكذا
*قضت اليوم كلو وووب علي وووب علي ودايرالي واحد أشيلو البلد
*للقرد ده قالت دايره لي واحد أشيلو البلد
*جات جنب قفص الزرافة
*وووب علي وووب علي ده شنو
*ده الزرافة يا حبوبة
*حبوبة سكتت ما قالت دايره لي واحد
*قالوا ليها ما دايرالك واحد يا حبوبة
*قالت لا لا ياكلنا التمر
*أها نحنا أي شي شفناه
*وووب علي داير لي واحد أشيلو البلد
*شي كدة قلنا ما بندورو عشان بياكلنا التمر ما في
*لأننا أكلنا تمرنا برانا وشربناه وقعدنا كل ما نشوف شي نتبع نهج حبوبة
*وووب علي وووب علي دايره لي واحد أشيلو البلد
*ويا حليلك يا بلد
*من يدهشونا اليوم كنا ندهشهم سابقًا
*أيها الناس
*إن تنصروا الله ينصركم
*أها
*نجي لي شمارات والي الخرطوم
*كان شفت يا والينا
*بقت عيننا طايرة يا أخينا
*يتقدم كل من كان بعدينا
*ونحنا نصيبنا الدهشة من الحولينا
*ونفضل نردد وووب علي وووب علينا
سلك كهربا
ننساك كيف والكلب قال شربتوا التمر وحيرتوا الزرافة؟
وإلى لقاء
سلك
