بابكر سلك
*في سؤال طارح نفسو
*لما غالبا تغلب واحد
*او غالبا تتعادل سلبيا او واحد واحد
*او حتي اذا انهزمت تقوم تنهزم واحد
*السؤال
*المعني شنو؟؟؟
*طبعا الاجابة لا دايرة رمالي يشوف خيرتها
*لادايرة ست ودع تكشكش
*ولا محتاجة زول عاقل ومتنفش
*الاجابة ممكن تلقاها عند زول فاتح خيال هايم علي وشو ومكشكش
*الاجابة واضحة جدا
*هي ان تنظيمك الدفاعي ان لم يكن جيدا فهو علي درب التجويد سائر
*والقصة مامجرد عناصر
*القصة تنظيم العناصر الموجودة واكتشاف عناصر علي الكنبة هي ذاتها ماعارفه روحها بتلعب في خط الدفاع
*وده بالضبط مايقوم به داركو الله يباركو
*وزي ماقالوا اهلنا السعوديين (الله يوفقا)
*لكن في ناس كدة الله لاوفقا (عافين ليهم )
*اجبرتنا علي ان نبدأ من اول السطر
*والبداية من اول السطر وعلي نفس الصفحة (المخرمجة) هي بداية لا يقوم بها إلا شخص وأثق من نفسو
*ومن ناحية داركو واثق من نفسو
*هو واثق من نفسو
*وظهر ذلك جليا في المؤتمر الصحفي معه عند توقيع العقد
*حينها ماكان ببيع كلام ويزين الاحلام
*ولكنه تحدث بثقة ومنطق
*وبعدها استعجلنا او استعجل بعضنا النتائج
*حوالي اسبوعين ولعبنا امام لوبوبو
*وظهرنا بمظهر ممتاز ومنظم
*ومن خلال مباراتين فشل لوبوبو في احراز هدف في مرمانا الا بعد تحامل الحكم وطرد احد اهم محاورنا ومن دربكة كمان
*ونجح لوبوبو في احراز اربعة اهداف بشباك الجنوب افريقي في مباراتين
*وبل واقصاهو كمان
*وعلي الرغم من ذلك تحامل بعضنا علي داركو
*البعض من منطلق الاصرار علي الخروج من الشكل المحرج الذي ظهر به المريخ في الموسم القبل داركو
*وساعدهم علي ذلك تذبذب مستوي الزعيم في تلك الفترة (الله لا عادها)
*اما البعض الآخر
*فكانت حربهم علي داركو نكاية في حاجات كتيرة وكيتا في اخري
*واظنهم الآن يبحثون عن اسباب حرب اخري علي داركو
*داركو
*قشة ماتعتر ليك
*المهم
*ذهبنا في روليت رواندا فوق
*وها هو الشقيق يتطور ويخرج بتعادل ثمين وان كان لم يخرجه من الذيلية
*الا انه تعادل يفصح عن تطور بعد هزائم متكررة ومتوالية
*سبعطاشر كولمبي اقصد اجنبي ويفشلون في تخطي طيش رواندا
*الجاز ده نوعو ماكويس خلي بالك
*السوداني الوحيد مدني وما ادراك مامدني
*مدني من مدني وماعليك الا ان تتقبل التهاني بهدفك الجميل
*كان لعب مدني يشتهوا ابو عشرين
*وكان لعب ابو عشرين مدني تغرق
*حقو يستفيدو من ود المصطفي كمدرب حراس
*لانو غيبتو طالت
*والزول الكبير لما يقيف
*زي عربية الجاز مابدور بالساهل
*ايها الناس
*ان تنصروا الله ينصركم
*اها
*نجي لي شمارات والي الخرتوم
*نحنا يا والينا
*نعيش هذه الأيام أجواء الاستقلال هيلنا
*ياحليل الانجليز يا والينا
*ماكانوا بفرقوا بين الناس بقبلية او جهوية او اثنية
*كووولنا سودانيين كانت نظرتهم لينا
*فهل استعنا بنظرتهم يا والينا؟؟؟؟
سلك كهربا
ننساك كيف والكلب قال لا استقلال مع الاستغلال
وإلى لقاء
سلك
