بابكر سلك
*بدأت النهائيات الافريقية بالمغرب
*كعادة الدول المحترمة والمهتمة كان حفل الافتتاح رائعًا معبرًا عن البلد المضيف وثقافاته بل لم يهمل بصمة الثقافة الإفريقية علي لوحة الاحتفال الرائعة
*تخيل الاحتفال بتاع الافتتاح ده كان عندنا
*تخيل سااااي
*اعتبرو مجرد حلم
*ان شاء الله احلام زلوط
*لو كان الاحتفال عندنا
*كان لي اسي الكلمات تطاقش
*خطب ونقة مبالغ فيها
*نحسب ان
*من حيث ان
*وهل هي محمدة ام منقصة
*بنكتر النقة عشان كدة مابنعمل شي
*السواي ماحداث
*والنقناق وناس
*والبكتر كلامو بكتر ملامو
*غايتو نحنا حيرنا روحنا دي ذاتها
*ربنا خلق ناس يمتحن بيهم الناس
*وخلق ناس يمحن بيهم الناس
*المهم
*بعد النقة نفتش فرقة الفنون الشعبية المنسية وين
*نجيبهم وهاك يا كمبلا وهاك يا مردوم
*وبعد الاحتفال الا يرجعوا بيوتهم مهارات فردية
*المهم
*بدأت المنافسات
*للآن ماقابلنا فريق هين
*جزر القمر دي دخلت الناس في كستبانة
*زول حصالة مجموعة مافي
*امس مصر انعصرت لما فرعون الكبير المات غرقان ريقو نشف
*زول هين مافي
*ونتمني ان يكون الحال كذلك لي بعد مباريات بكرة
*دايرين بعد كورتنا ضد الجزائر نقول بكل فخر مافي زول هين
*فنحن والله ياكواسي لانتحمل
*لنا سكري وضغط تعلمونها جيدا
*عشان كدة الانسان يعرف قدر نفسو
*ويلعب بطريقة تناسب مقموماتو
*نعترف بانو لاعبنا اتعلمها كبيييير شنبو خاتي
*وبقابل ناس حبوا ثم تاتوا بالمدارس السنية ورضعوا المهارات بالبزازة من عمرا بدري في سن الرضاعة
*وان كان رأس القايدة لكورتنا لايعلم ذلك ولا يعمل لذلك
*يجب علي كواسي ان يعلم بذلك
*الحصة وطن
*لذا لن نتمني مرمطة لمنتخبنا لنتشفي في الاتحاد
*نتمني ان يخدمنا درهم الحظ
*وان نكون في يومنا
*واي زول يقابلنا يكون مافي يومو
*ونسأل الله ان نعيش لنري ازدهارا لرياضتنا وملاعب تخبل واهتمام من الدولة ثم استضافة للنهائيات والظفر بها اقتدارا
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا رياضيا مهتم بينا
*ولا ماشايلها يا والينا؟؟؟؟
سلك كهربا
ننساك كيف والكلب قال اي زول مابعكس مابغلبكم… البعكس الله يعكسها عليهو
وإلى لقاء
سلك
