بابكر سلك*بدت السنة
*وعدت سنة
*وفاتت سنة
*وبين كلو سنة وسنة
*في راس سنة
*اسي عليكم الله الفاتت دي سنة؟
*مبقجين كلنا
*شايلين همنا
*ولا بهمنا
*سايل دمنا
*تجار حرب ناكل في بعضنا
*ولا بهمنا
*كأنو الوطن ماحقنا
*كتير فاتوا وماتوا ما لقوا قطعة قبر في ارضنا
*بقي العشم قطعة قبر يضمنا
*حتي القبر بقي زول ناسات ما متاح لينا كلنا
*عدت سنة
*واستفحلت فينا سمات الشنة
*نشفشف بعضنا
*حق الناس ببساطة حقنا
*نصلي جماعة ونسرق مروحة جامع حينا
*واحيييي انا
*بشششششتنة
*البشوفنا في الجامع ربنا
*والبشوفنا سارقين مروحة الجامع برضو ربنا
*المهم
*عدت سنة
*زي سنين كتيرة مرت بنا
*ونحنا ولا. هنا
*لابنحب بعضنا
*لابنعترف بأننا
*جميعا شركاء في وطن الهنا
*لابنستفيد من تجارب مرت بنا
*لابنفوق من نومة المت بنا
*بس تمر سنة
*نتشنط كلنا
*نشيل باغة الهناي…. هناي الهنا
*ونحتفل بي راس السنة
*لابنحاسب نفسنا
*لا بنتدبر امرنا
*لابنغير من دول وصلت اتحركت بعدنا
*لا بنعالج اسباب فشل ملازم لنا
*بس نشيل ونرمي اللوم علي بعضنا
*كوووولنا…. انت وهو ونحنا وانا
*زي بعضنا
*واحي انا
*تعبنا من شيل البقج علي رأسنا
*وقررنا ماندخل في موضوع حتي لو كان موضوع بخصنا
*الوعي يبعد سنين ضوئية عننا
*اقرب القيامة تقوم وتلمنا رحمة ربنا
*وكل سنة والوطن الظلمناهو طيب ويغفر لنا
*ايها الناس
*إن تنصروا الله ينصركم
*اها
*نجي لي شمارات والي الخرتوم
*تعرف يا والينا
*حقو يكون الاعدام عقوبة البحتفل بي راس السنة
*معقولة بقجنا علي رأسنا
*والناس تحتفل بي راس السنة؟؟؟؟
*هي السنة ذاتها مبقجة زينا
سلك كهربا
ننساك كيف والكلب قال بششششششتنة ورقاد واطة
وإلى لقاء
سلك
