بابكر سلك
مسرحية عربية عبرت عن نضال الطبقة العاملة في الأمة العربية وفساد حكامها
كانت لوحدها مقاومة هزت عروش الاستبداد
أظن أن الرائع الماغوط هو من كتبها
ولكن تجسيد الأروع دريد لحام للفكرة كان مدهشًا
فطفقنا نفغر أفواهنا دهشةً إلى يومنا هذا
وإلى يوم يُبعثون
كاسك يا وطن
عنوان معبر جدًا
بدون ما تفتح خيال
ولو فتحت خيال لك أن تتخيل ما شئت
فالكؤوس خشوم بيوت
اليوم نلتقي السنغال
عادي
عادي جدًا
شخصيًا ما خايف ولا حاجة
لأني عارف ومقتنع ومتيقن
لذا لن أخاف
لأن الإنسان يخاف عادةً من المجهول
ومباراة اليوم ليست من المجهول
معلوم يا رفيق زي ما قالوا البنغالة
وزي ما قال كواسي
لم نذهب للمغرب للنزهة ولكن للمنافسة
تعبير مليء بالثقة ونفهم منو أننا ماشيين ننافس على الكأس
وطالما رفعنا الكأس حنشيل الكأس البعيد شنو
رفعنا الكأس سنة سبعين
يبقى ممكن نشيلوا في أي وقت تاني
ونجيبوا جوا هدية للوطن نقول ليهو
كاسك يا وطن
بس بوصي اللاعبين
لما ترفعوا الكأس اعملوا لينا خاطر نحنا الجماهير ديل
المهم ننافس على الكأس
ولما نرفعوا نلبسوا حلق
حلااااتو بالحلق
كاسنا ونحنا حرين
حرين في أي شي
نرفع الكأس
نمشي كاس
على كيفنا
وتخيل كيف يكون الحال لو شلنا الكأس
وجبناهوا بالطيارة بورتسودان
اللاعبين يغنوا الكاس كاسنا ونحنا أهلو
ونحنا كجماهير نشتغل كورس
نقول ليهو وتستاهلوا
مشهد نحبه ولو في الخيال
البعيد شنو
والبخوف من السنغال شنو؟؟؟
لغتهم الرسمية ذاتها قلبوها عربي
عربوا السنغال
تاني البخوف شنو؟
من عرف لغة قوم أمن شرهم
اللهم كتر إنجازاتنا وزد كاساتنا يا رب العالمين
أيها الناس
أمانينا بالطبع أن يتخطى المنتخب منتخب السنغال ولو بضربة حظًا ضربة جزاء
المهم نتخطاهوا
واهي خطوة لي قدام
وما في شي بعيد
فالواقع أحيانًا يخالف ما جاء بالأوراق
يسويها الله
عشان نقول للنقاد ورق وانفرك
أيها الناس
إن تنصروا الله ينصركم
أها
نجي لي شمارات وإلى الخرطوم
ادعي لينا يا والينا
ادعي لينا الله يهدينا
سلك كهربا
ننساك كيف والكلب قال ارفع كاسك هيبة وجبرا
وإلى لقاء
سلك
