بابكر سلك
*الفيديو اياهو وجد حظه من النشر وتباينت حوله الآراء
*الميديا خشمها خفيف
*شالتو وجرت بيهو
*فيديو انوارو واصلة بدون سلوك
*المهم انتشر وكلو زول دخل قدومو
*ناس شايفين وقائع الفيديو ليست الا ممارسة لحريات شخصية لادخل للناس بها
*وناس تانيين شايفين من كان منا بلاخطيئة فاليرمي ابطال الفيديو بحجر
*كان يقدر
*ولما الناس الاولانيين راحوا عند الناس التانيين مالقوهم
*قاموا ناس تالتين قالوا شباب ومن حقو يعيش حياتو
*ناس رابعين قالوا اجل من حقهم طالما بجوا الملعب في كامل وعيهم
*ناس خامسين قالوا للرأي الفات وعي بتاع فنيلتك؟؟؟
*وناس سادسين يرون ان التزام ابطال الفيلم معانا هو التزام بالتمارين والمباريات
*وطالما بجوا التمرين وبجوا المباريات بصرف النظر عن النتائج
*ان شاء بعد داك يقلبوا الهوبة في الراكوبة
*والراكوبة ماضرا والصبجة مامرا
*وبمناسبة مرا دي في زول سأل
*التي تعاني من نقص في القماش التي ظهرت بالفيديو دي منو
*واحد شليق مامركز قال ليهو دي فدادية اقصد فنلندية مديرة الصالة
*ولازال الناس يتناولون ويتداولون فيديو الفنلندية ست الصالة والرصة والمنصة
*وانا اري ان الانسان حر في سلوكو الشخصي
*ويتحمل نتائج ذلك السلوك بالطبع علي المستوي الشخصي
*وان التزام ابطال فيلم الفنلندية والافندية تجاهنا هو التزام ليس من ضمنه سلوكهم الشخصي المتعلق بخصوصياتهم بره ميدان التزامهم
*الا اذا مس ذلك السلوك الشخصي الخاص واعاق التزامهم الاساسي وهو تمثيلنا خير تمثيل
*المهم
*ماطرنا برانا
*من نفس المرحلة طارت معانا
*تونس العاجبانا
*والبافانا بافانا
*وتنزانيا البقت فايتانا
*والليلة بنين من ناحية لاحقانا….. لاحقانا
*مابنطير برانا
*حتي الجزائر طارت معانا
*كتاااار مشوا معانا الحتانة
*عشان كدة نسيب موضوع الفيديو الازانا
*ونبحث عن اسباب سوء مستوانا
*فليس من المعقول ان يكون قمة طموحنا مجرد المشاركة بعد طيرنا غانا
*بس بعد الحرب ننكرب ونزيل اسباب ازانا ونبدأ نرفع مستوانا
*المهم
*الليلة يعود الزعيم للدوري الرواندي
*نتمناها عودة لدرب الانتصارات من جديد
*ومريخ السودان برضك بادي
*بالتوفيق
*لكن فطومة اختي بالغت
*كلمتنا لكن مافهمناها
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*قصتنا بقت حجوة ام ضبيبينا
*قالوا لينا وقالوا لينا
*لكن صدقني موش حانموت الله يخلينا
سلك كهربا
ننساك كيف والكلب قال لو الحرب ماغيرتكم تاني ترمب مابغيركم
والي لقاء
سلك
