فاضين ليكم جدًا!
محمد الطيب كبّور
أول حاجة نتفق إنو المريخ طار وما خشا المجموعات
دا موضوع انتهينا منو
عن إذنك يا تسريحة “أووووكي”
عشان ما تقعدوا تشبكونا المريخ في ياتو مجموعة؟
نحن عارفين وما ناكرين الموضوع دا!
من الآخر كدا فاضين ليكم جدًا
وما عندنا شغلة غيركم
نمسكها من سيكافا
الشغالين معاها إنتوا بطريقة الما بتلحقو جدّعوا
شاركتوا فيها كم مرة؟
عماركم فيها شنو؟
علي فكرة إنتوا شاركتوا فيها أكثر من المريخ
والمريخ فاز بيها ثلاثة مرات
واتعقدتوا منها وبقيتوا تبخِّسوا فيها
سميتوها “كأس المجاعة”
واترفّعتوا من المشاركة فيها
أها بعد مشاورات قلتوا ترتادوا الطريق
أيوة طريق الزعيم
ومعروف الطريق مر عبر سيكافا
أها الجاز دوّر
نظّمتوا البطولة بنظام الفول فولي
دا ما يشارك، وجيبوا لينا من الحمام داك
المهم نظمتوا سيكافا بدون المعلمين
وطلعتوا منها مُعدمين
قصتكم شنو مع الصفر دا؟
حتي سيكافا البتبخسوها والنظمتوها
حصادكم فيها صفر!
إنتوا متعاقدين مع الصفر دا ولاشنو؟
عملتوا الفول فولي وبرضوا ما قدرتوا تأكلوه وحدكم
رغم التسهيلات والتنزيلات
طلعتوا زي ما دخلتوا والصفر ما زاد!
ودخولكم المجموعات شبهو أحد الصفوّة وقال “زي محاولة المليشيا دخول المدرعات حدكم فيها تتصوروا بس”
وإعلامكم الفصيح يكتب “لعبنا كويس”!
ويقدّنا بالتصنيف
أها نقفل موضوع سيكافا ونجي للإنجاز الكبير مانديلا
طبعًا دا بحرق في الفشفاش
أعظم إنجاز لنادي سوداني
بفضل الإنجاز دا الأندية السودانية حافظت على مكانتها
في كل محفل للموقعين في لوح الشرف الإفريقي اسم المريخ حاضر
يطرشنا ما سمعنا بلعبنا كويس دي إلا عندكم
بيذكروا الأندية صاحبة الألقاب
لكن لعبنا كويس دي ما حصل جابوا سيرتها!
وطبعًا لو لعبتوا كويس كان مشيتوا لى قدام!
لكن ماهي إلا مجرد كلمة تُستخدم للتخدير!
نحن عندنا مشاكل حاليًا لكن دا ما بمنع إننا نمتلك تاريخ
وهو تاريخ حافل بالإنجازات وجوّي كمان
لو بطلتوا طولة اللسان ما عندنا معاكم شغلة
يا جاري إنت في حالك وأنا في حالي
لكن إنتوا لسانكم طويل شديد
ودي ذاتا دلالة على إنكم برميل فارغ
كثرة ضجيج بس ما أكثر.
مجرد سؤال
الصفر دا عمرو كم سنة؟
