بشتنتنا وحشتنا!!

بابكر سلك

*نحنا عندنا عقدة الخواجة.
*نطلق عليها عقدة خواجة.
*ونعني بها الخواجة والما خواجة
*المهم أجنبي.
*أي أجنبي بشرقنا ونفتح ليهو خشومنا دهشة.
*ولو كان المحلي أجود.
*برضنا بننشرق بالأجنبي.
*تمباكنا ده.
*معروف إنو اجود تمباك في العالم.
*بكرة لو زول جاب تمباك مكسيكي.
*كلنا بنخلي سورج وأبو حنك والباشا.
*وننسي العشرة.
*ونجري نحو التمباك المكسيكي.
*لزوم قشرة وكدة.
*مستورد.
*ياخ ملاريتنا دي ما مالية عيننا.
*عشان الناس يجوك ويعايدوك ويونسوك في رقدتك ديك.
*لازم يشاع انك مصاب بملاريا حبشية.
*حقتنا برغم إنها إنتاج أعرق وأجود باعوض في العالم.
*لكن مابتملى عيننا.
*ياخ ملاريتنا دي شدت ما جيدة ومميزة.
*لو جاتك في أي دولة في العالم بكرتنوك عديل كدة.
*وبرضو ما مالية عيننا.
*البتملي عيننا وتملي بيوتنا زوار.
*الملاريا الحبشية.
*برغم إنو باعوضنا ده باعوض حكومي.
*بتربيهو الحكومة بإشراف الولاة الذين يقفون على كل البلاليع والمجاري الطافحة.
*تأكيدًا على اهتمامهم بمشاريع تربية البواعيض الحكومية.
*حتى وصلوا لأعلى إنتاجية في العالم.
*مية وعشرين باعوضة لكل سنتمتر مربع من جلد أي مواطن.
*ياحليل البلاليع والبواعيض والإهمال الحكومي.
*يا حليل ملاريتنا حقتنا.
*وحشناها ووحشتنا.
*والله اشتقنا للمجاري ولكل البلاليع العريقة.
*اشتقنا لباعوضنا.
*إن شاء الله ياكلنا عدييييل.
*بس نرجع وفي عدم صحة البيئية نتجدع.
*حتى بشتنتنا وحشتنا.
*المهم.
*عقدة الأجنبي دي خلت زامر حيّنا لا بعجبنا لا بطربنا.
*وبنبخسوا كمان.
*وما بنقيموا.
*ولو عجبوا.
*والقصة دي بنلقاها كتير في أنديتنا.
*تعاملها وتقييمها للأجنبي ما ليهو علاقة بالمحلي حتى ولو كان المحلي هو الأجود.
*تلقى فريق فيهو فيصل عجب.
*وفيهو أجنبي هو ذاتو أثناء الكورة بسرح عشان يتفرج في العجب.
*وتلقاهو بياخد قدر إطناشر عجب.
*لأنو أجنبي وبس.
*وأسّي سمعنا إنو كولمبينا شهريًا بياخد قدر خمسة رمضان عجب.
*وده حالتو قاعد في الكنبة.
*وده ما الموضوع.
*الموضوع توقيع أبو عاقلة للأهلي الليبي.
*أبو عاقلة القامة والاستقامة والتهذيب. *والمستوى المتطور والأداء بحرفية واحترافية.
*الهلال بتعامل معاهو بسقف لأنو محلي.
*والسقف ذاتو “سقف الياباني”.
*قالوا مع القصة العليقي قال للسوباط أسقف على كدة.
*معقولة بس.
*تسعة سنين من العطاء والولاء دون كلل.
*لا نذكر منها يومًا واحدًا كان أداء أبو عاقلة فيه سيئًا.
*لم يتغيب إلا فترة العلاج من الإصابة التي لحقت به وهو يؤدي الضريبة.
*وتقول ليهو أسقف على كدة؟
*الأجانب ألفي الهلال أكتر من الأجانب الفي الدعم السريع.
*فهل فيهم واحد تعاملوا معه بسقف العليقي البيمو مع العتب؟
*بالتأكيد لأ
*برغم إن أبو عاقلة أفضل من جامعة إفريقيا التي جلبها العليقي كلها.
*ولكن لأنه زامر الحي.
*فرحت لتوقيع أبو عاقلة بكشوفات الليبي.
*فهو محترف وصل مرحلة نضج كروي كبيرة، تجبره على تقييم نفسه وبناء مستقبله.
*وأتمنى له مزيدًا من النجاحات لأنه لاعب منتخبنا.
*يبقى بخصنا وبهمنا.
*ورمضان جلى بي سنة.
*فما قيل عن أبي عاقلة يقال عن عجب كابتن المنتخب.
*لكن النمير عرفها.
*ومدد ليهو سنة ونص.
*رفع السقف من محل ما وقف.
*وحنشوف سقف العليقي في خانة المحور بالمجموعات.
*تفك خرسانة وتسقف بلدي يا سوباط؟؟؟
*أرجى المطر الجاييك.
*أيها الناس.
*إنه زمن الاحتراف.
*يعني الكورة أكل عيش ومستقبل.
*عشان كدة قصص ود النادي والإبن البار والولاء والأشياء دي ماعادت ملائمة.
*وأي زول فينا لو وجد فرصة عمل بشروط أفضل.
*ولا بتناقش.
*فلماذا نجبر اللاعب على القبول بالأقل بداعي الولاء؟
*الولاء زمن الاحتراف هو للشعار الذي ترتديه أثناء سريان العقد.
*وبعد انتهاء العقد.
*الولاء للكاش الذي يقلل النقاش.
*بالتوفيق لأي لاعب يخوض تجربة احترافية خارجية.
*وحقو الدولة تشجع على كدة.
*علي الأقل نتعرف في السوق العالمي.
*وتستفيد منتخباتنا وأنديتنا.
*ليعود زامر الحي مطربًا قدر الدنيا.
*يرقص الحلة كلها طربًا.
*أيها الناس.
*حقو نقيّم حاجاتنا ونترك خلعة الأجنبي دي.
*أيها الناس.
*إن تنصروا الله ينصركم.
*أها.
*نجي لى شمارات والي الخرتوم.
*والينا.
*اشتقنا.
*دايرين نرجع لى بواعيضنا وطنينا.
*دايرين نعود لى لمتنا الحنينة.
*للشمار والهظار لغياب التيار وضي الرتينة.
*قبلانين يا والينا.
*وسميناها رضينا.

سلك كهربا:
ننساك كيف والكلب قال يادوب عرفتوا قيمتو يا كلاب.. وهزّ ضنبو وقام جاري.
وإلى لقاء.
سلك.