العليقي والنمير.. البناء والتخريب

حسن محمد حمد

🟫 العليقي طالع في حديث بيقول إنو ياسر في 10 دقايق جدد، وياسر ضحى في وقت استثنائي، وبهمز وبلمز وكأنه يشير لأبو عاقلة، ودي سقطة كبيرة في حق نائب رئيس نادي الهلال، البتكلم ظاهرًا وبمدح في ياسر وباطنًا حديثه عن أبو عاقلة وكأنه بذم فيه.

🟫 حديث العليقي مرفوض مرفوض ومرفوض، وصراحة دا ما كلام بجي من راجل كونك تتكلم وراء ظهره وتنقصه، وهو كان معاك وأنت فشلت حتى في تسويقه والاستفادة من مشيه، وخليته يرحل مجان بدل ما كنت ممكن تبيع عقده، وتلقى من وراه قرشين حلوين زي ما عملت مع محترفين كتار.

🟫 أبو عاقلة العمرو ما ساوم وعمرو ما طلع قال راتبي إتأخر، وأبو عاقلة الباع عربيته عشان يعالج أمه، ومجلس الإدارة السابق بتفرج ما هو أبو عاقلة البتتكلم عنه إنت يا عليقي، أبو عاقلة عمره في الهلال 9 سنوات وإنت عمرك 3 سنوات، صاح إنت إداري وهو لاعب، لكن أبو عاقلة عرقه يشهد ليه والميادين تشهد ليه.

🟫 احنا كجمهور هلالي ما بنسامح في أبو عاقلة، ولو كان السوباط ولو كان شوية الصحفيين الصعاليك، بصوروا ليكم إنو الاستغناء عن لاعب زي أبو عاقلة شي عادي، فنحب نقول ليكم إنتو والصحفيين عندنا ما تساووا كدارة أبو عاقلة.

#الهلال_تاكتيك

آخر الأجراس

¶ أورد هذا المقال لأنه جاء ليضع النقاط في حروف.. ليس بها نقاط.

¶ الأخ العزيز الصديق.. أبو العلا البشير.. سبق أن خاض معي سجالًا.. طالب فيه بدعم النمير.. أو التوقف عن انتقاده.. بسبب كرشوم ورفاقه!!

¶ واستشهد أبو العلا بتقبل الهلالاب لقرار العليقي بخصوص.. التخلي عن أبو عاقلة.

¶ يا أبو مازن..
شوف الهلالاب.. عملوا للعليقي شنو.. في ذهاب ابو عاقلة!!
الحالة دى.. العليقي البدفع عشرات الملايين من الدولارات بدون أدنى تردد.. من جيبه الخاص!!

¶ العليقي الما باع أي نجم.. ولا حتى من ناشئي روضة الهلال..
العليقي الذي دفع حتى الآن أكثر من ثلاثون مليون دولار في ثلاث سنوات.. وكان حصادها.. الفارق القاري وفي الدوري الموريتاني.. بين العليقي ونمير شورى.. الممالأة!!

¶ طييييب..
الدمير دا.. ما خلى ليه أخضر ولا يابس.. والله لو الناس نست العملوهو الجنجويد في الجزيرة.. أي مريخابي أصيل لا ولن ينسى دمار الزول المغروس في المريخ دا.. وربنا يرجع الوطن.. والناس تشوف!!

¶ شوف.. كل المريخاب يضعون النمير.. الجابتو ريح العواطف الخاصة.. الجهوية.. تحت درجة.. آدم سوداكال بمراحل..
نواصل.. بحول الله جل وعلا!!

¶ هام جدًا وعاجل:
تابع شعب المريخ بشغف بالغ.. أخبار من ثِقات أن عمر النمير.. أخبر كبارًا في المريخ اجتمعوا به.. “أن يبحثوا عن شخص يقود المريخ”!!

¶منتظر شنو؟؟
ما بتعرف تكتب إستقالة؟؟ ولا أقول ليك.. ما تكتب استقالة ذاتووو.. أمشي بس.. وتكون أفرحت الشعب كله.. أكتر من تأكيد خبر موت حميدتي.

¶ أمشي ياخي.. طوالي أمشي.. عشان يعود الطلطاشر نجم.. أي واحد فيهم أفضل من كل نجوم الأندية التي صعدت للمجموعات.. وكنا علي راسها لولا إطلالتك البائسة.

¶ على فكرة.. الشعب العربي وين؟؟
وين الملايين؟؟
وين المئة مليون؟؟
يا…..!!!
لمن تقرع الأجراس؟