كلنا في الهوا سوا!!

بابكر سلك

*ما حدش أحسن من حد.
*ما حدش دي ذاتها ما حقتنا.
*لكنها مشكلة هوية.
*نحنا لليوم ما قادرين نمارس سودانويتنا.
*لذا نظل نبحث عن هويتنا.
*ما بين عروبة ندعيها.
*وأفريكانية تعتبر نفسها ست البلد وما غيرها متسلبطين ساي.
*عشان كدة وصلنا للنحنا فيهو ده.
*وبعد وصلنا للنحنا فيهو ده.
*يادوبك إتساوينا.
*بقينا كلنا في الهوا سوا.
*مساواة وحقوق آخر نكرناها حطب.
*فأجبرتنا أن نعيشها هوا.
*بل سوا كمان.
*كلنا نعيش هم واحد هو الوطن.
*وياليتنا هممنا به من قبل.
*المشي التكايا والمشي الهملايا.
*واحد.
*حيث لاطعم للطعام ولا لون ولا رائحة بل ولا فائدة طالما الوطن يئن.
*والمواطن يُسلب ويُنهب ويغتصب.
*ليتنا وعينا الدرس قبل الامتحان والامتهان.
*وبعد ده كلو ليتنا نعي الدرس ونقبل بالإعادة والامتحان من جديد.
*لننجح هذه المرة.
*ونوقف ترديد الأغنية التي تقول.
*يا بلد مجروح وتنزف في دمومك.
*يا بلد مهموم غرقان في همومك.
*يا بلد عريان مسولب رغم خيرك.
*وغيرك اللابسين هدومك.
*بكيت على أرواح ولادك.
*ضحكت من شر البلية.
*بنستبيح حرمات ظلالك.
*ونذرف الدمعات سخية.
*ولما زاد فوقنا الهجير.
*لما زاد فوقنا الهجير.
*لمّانا ضل البندقية.
*يا بلد سامحت ياما.
*وفي الختام كنت الضحية.
*في الختام لست الضحية.
*يا بلد.
*وكأننا كنا نقرأ الكف.
*هذه الكلمات أنشدناها ونحن طلاب بالجامعة في التمنينات.
*وها هي تتحقق.
*لأننا لم نكن في الوطن سوا.
*كلو زول بي هواهو.
*كلو زول زول براهو.
*مافي آخر.
*مافي غيرك.
*أنا وبس.
*ومارسنا مفهوم الوطن يا أنا يا إنت.
*أها.
*لا أنا لا إنت.
*الإتنين بقينا في الهوا سوا.
*اللهم انصر وطننا.
*وسلم أهلنا.
*وعلم قلوبنا تحب بعضنا.
*ويظل علم السودان عاليًا خفاقًا على مر الدهور والأجيال.
*تعبيرًا عن كبرياء أمّة.
*المهم.
*حتي في الكورة كلنا سوا.
*ندير القصة بمزاجية لا بمنهجية.
*ننتصر للرأي دومًا لا للحق.
*ننتمي للكوم ما للكيان.
*كلو مجلس وليهو حاشيتو.
*وبالتأكيد معارضتو.
*معارضة لأجل المعارضة.
*ومعارضة هدامة.
*ومعارضة تقدم النصح هي المطلوبة.
*المعارضة أبدًا لا تعني الضد.
*ولا تعني تمني الفشل للسلطة.
*ولا تعني عرقلة المسيرة.
*ولا كانت ترصُّد.
*أما المعارضة التي تحفر فهذه كافرة عديل كدة.
*لذا.
*على المجالس أن لا تعتبر أي معارضة خصم.
*وعلى المعارضة أن تعلم أن دورها ليس الهدم ولا الشماتة عند الفشل.
*ولكن دورها أكبر من ذلك وأجل.
*فهي برلمان يراقب أداء الحكومة من الداخل دافعها مصلحة الوطن.
*وكلنا في الهوا سوا.
*نحنا نبني ونكسر ونهدم لنبني من جديد.
*وناس العليقي ليهم كم سنة ببنو في أمانة الله.
*فجأة عملوا ليهم سقف.
*هدوا ليهو أقوى أعمدة البناء.
*فرطوا في أبو عاقلة.
*وهو في مرحلة النضج.
*وبناء الهلال قام شوية وظهرت الخرطة.
*وفجأة قرروا يسقفوا على كدة.
*سقف العليقي حينكشف مع أول مطرة في المجموعات.
*ألا يوجد سقف للمنطق والعقلانية يجبر الإدارات على عدم النزول منو؟
*ديل ناس العليقي.
*أما نحنا.
*قصتنا أعمق من قصتنا حقت عثمان حسين.
*سوليناس قال.
*سوليناس ما قال.
*سوليناس قال.
*حا نعتمد على الصغار.
*سوليناس قال.
*الصغار ما في البال.
*ونرجع تاني نقول.
*للمجلس سياساتو.
*وقناعاتو.
*وعقيدتو في الإدارة.
*لكن كمان يعبِّرنا شوية.
*على الأقل يورينا استراتيجية بناء الفريق التي تم الاتفاق عليها مع سوليناس.
*والمراحل الزمنية.
*عشان على الأقل نطمئن.
*أسّي نحنا زي المعتقلين.
*قاعدين بدون أمل.
*ما معروف مارقين ولا ما مارقين.
*ولو مارقين ما معروف مارقين متين.
*أخير مننا المساجين الأدوهم عشرين سنة.
*عارفين إنهم حا يمرقوا بعد عشرين سنة.
*مارقين مارقين.
*بعد عشرين سنة مارقين.
*عشان كدة بالهم رااايق.
*فهل يا عزيزي المجلس اعتبرتونا معتقلين أم مساجين؟
*عشان كشتينتنا قاعدة.
*ودايرين نحدد الفورة كم.
*شخصيًا مع إعطاء الجهاز الفني حريتو في تنفيذ استراتيجتو.
*لكن كمان مع ده لا بُد من سلطة رقابية لصيقة ودقيقة من المجلس على المدرب.
*ولا بُد من تحديد وصفنا.
*معتقلين ولا مساجين.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*تعرف يا والينا كيف!
*ما مستعجلين بس سلمونا نضيف.
*ريحونا من الزيف.
*ومن رعد الخريف.
*ومن التصنيف.
*ختونا في سودان واحد.
*ظريف وعفيف ونضيف.

سلك كهربا:
ننساك كيف والكلب قال بعد الرجعة ما دايرين حرامي.. دايرين ننوم بالليل بعمق وباب الشارع فاتح.
وإلي لقاء.
سلك.