اكتلوا الزول الكتل الكلب!!
بابكر سلك
*ما إن يؤدي المريخ مباراة.
*إلا وضجت الميديا غضبًا.
*سوليناس وما سوليناس.
*إبراهومة وما إبراهومة.
*النمير وما أدراك ما النمير.
*ثم يهدأ النفس.
*ويبدأ النقاش في الولوج لقوالب المنطق.
*فيدور الكلام حول المنهجية.
*وضرورة إعطاء الجهاز الفني فرصتو وبعدين نحكم عليهو.
*ويرد آخرون بأن الجهاز الفني قد أخذ فرصته بالكامل.
*شطب بمزاجو.
*وطرد بمزاجو.
*وحرم ناس من الفطور.
*واتخذ من فندقًا سكنًا.
*أو ذهب للفندق الآخر حبيسًا.
*وقعد ستة شهور.
*ما شفنا فيها شكل للمريخ.
*مجرد شكل ماشفنا.
*لا لياقة.
*لا لباغة في الأداء ولا بلاغة في التمرير، تعبيرًا عن فكرة يكون المدرب قد غرسها في ريسين اللاعبين.
*وتاني يختفي المنطق.
*ويستمر الحوار بتشنج.
*ويخسر الخل خله.
*وتبدأ التصنيفات.
*إنت فعلتك.
*وإنت تركتك.
*ونخرج من مولد الجدل والحوار دون حمص.
*ونهدأ.
*استعدادًا لمعركة أخرى بعد الكورة الجاية.
*أنا من أنصار المنهجية وعدم التدخل في الشأن الفني.
*لكن كمان لست من أنصار ترك الحبل دون قيد للجهاز الفني.
*فعدم التدخل في الشأن الفني.
*لا يسقط حق المجلس في رقابة ومحاسبة الجهاز الفني.
*بل واستفساره عن أي شئ لحظة بلحظة.
*لم تظهر بصمة الجهاز الفني طيلة ستة أشهر قضاها بين تشدد وشطب ومعاقبة.
*والقصة دي بتذكرني بالمجرم الخواجة السرق البنك.
*قبضوهو نكرو حطب.
*فتحوا الكاميرات وورهو روحو بسرق في البنك
*إنهار.
*واعترف.
*وقال إنو مسح وشو بماء الليمون، ظنًا منه أن هذه الطريقة ستخفي ملامحه، قياسًا بفكرة الحبر السري الذي لا يظهر على الورق.
*فهل مسح سوليناس بصمته بالليمون عشان كدة لم تظهر بصمته خلال ستة أشهر؟
*في المريخ.
*غيرنا الإدارات.
*غيرنا الأجهزة الفنية.
*غيرنا اللاعبين.
*غيرنا حتى طريقة تشجيعنا.
*والحال في حالو.
*إذن نعود للقصة القديمة.
*قالوا في شباب عندهم زراعة وبهايم وخير وفير.
*جو لأبوهم وقالوا ليهو في ناس، واحد حلب البهايم، وواحد حرق الزرع، وواحد كتل الكلب.
*قال ليهم أكتلوا الزول الكتل الكلب.
*بعد أسبوع قالوا ليهو الحرامية سرقوا بهايمنا كلها.
*قال ليهم أكتلوا الزول الكتل الكلب.
*بعد شهر قالوا ليهو الحرامية سرقوا اختنا وطفشوا بيها.
*قال ليهم أكتلوا الزول الكتل الكلب.
*إنه حالنا في المريخ.
*سنستمر على هذا المنوال.
*ولن ينصلح الحال.
*إلا نكتل الزول الكتل الكلب.
*منو الكتل الكلب؟؟؟
*أيها الناس.
*يبقى الفشل فشلًا إذا لم يصنع نجاحًا بعده.
*ويبقى الفشل نجاحًا إذا قاد لصناعة نجاح بعده.
*إذن لا داعي للمكابرة والمتاجرة بالمواقف.
*بالروقة كدة.
*نبحث سويًا عمّن كتل الكلب.
*وبعدها أمورنا بتبقى واضحة.
*المهم.
*ما نسمعه عن خلاف إبراهومة وسوليناس.
*إن صح فإنه يعوقنا كثيرًا في عملية البحث عن من كتل الكلب.
*يا تفاهم وانسجام.
*يا يمشي إبراهومة ويقعد سوليناس.
*يا يمشي سوليناس ويقعد إبراهومة.
*يا يمشوا الإتنين ونلقى الكتل الكلب.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*بعد حرينا.
*قالوا كمبلت يا والينا.
*الله ينصر الوطن ويروي الشوق الفينا.
سلك كهربا:
ننساك كيف والكلب قال لازم تكتلوا الزول الكتل الكلب.
وإلى لقاء.
سلك.
