مشكلة المريخ شنووو؟

بابكر سلك

*هذا السؤال أضحى حائرًا دون إجابة.
*سنين ونحن نكرره.
*مشكلة المريخ شنوووو؟
*ولم نصل لإجابة إلى الآن.
*لأن مشكلة المريخ الحقيقية هي نحن.
*بعضنا يرى أن المريخ حقهم براهم.
*وسموا روحهم أهل المريخ.
*يعني باقي المريخاب ديل نسابة المريخ ولا جيرانو ولا كيف؟
*البعض يرى إنهم الشرعيون.
*والآخر يفتقد الشرعية.
*بعضنا يرى أن مشكلة المريخ هي النظام الأساسي.
*والنظام الأساسي يندهش.
*ويقول منو دي؟ أنا دي؟
*ويضيف استفسارًا.
*المشكلة في ياتو نظام.
*2019 تعديل مارس ماسك كتف الموردة.
*أم 2019 تعديل يوليو ماسك في الاستاد؟؟؟
*وإذا كان 2019 تعديل الموردة.
*أيهم؟
*بتاع الفريق منصور.
*ولا بتاع الغريق قدام.
*ولا الإتعرض على جمعية الموردة؟؟؟
*وإذا كان 2019 تعديل يوليو الاستاد.
*هل هو النظام المودع لدى الاتحاد؟
*أم هو ما يقبع في أدراج كاس؟
*ياتو في الأنظمة الأساسية هو سبب مشكلة المريخ؟؟؟
*وهناك من يرى أن مشكلة المريخ لا في هذا ولا في ذاك.
*مشكلة المريخ فيمن يريد أن ينصب نفسه وصيًا على الأمة المريخية.
*ليملك مفاتيح الرضا عن مجالس الإدارات.
*إذا خالفته.
*استعمل مفتاحو ودور ماكينة الحرب وساقنا بالخلا.
*ومنا من يرى أن مشكلة المريخ تكمن في كيمان المصالح، التي شقت الصف وضربت بمصلحة الكيان العليا عرض الحائط.
*وآخرون يرون أن مشكلة المريخ في مجالس الواقع التي تتولى الشأن الإداري.
*تلك المجالس لو كانت لها الشخصية القوية والاستراتيجية محددة الأهداف.
*لما أعاقها معارض.
*ولما انتقدها مجبور.
*وفي ناس شايفين مشكلة المريخ سببها تاني وليست في كل ما ذكر أعلاه.
*أيها الناس.
*كلو مشكلة وليها حلال.
*إلا إذا أبى أحد الأطراف
*وطبعًا لا يمكن أن يعرقل من أبى مصالح الكيان.
*بقينا زي الورثة.
*يقولوا نكسر البيت ونستثمروا.
*يرفض أحدهم دون إبداء أسباب موضوعية.
*يقولوا نبيع البيت وندي كلو زول حقو.
*يعترض نفس الوريث القبيل داك، وبرضو دون إبداء أسباب منطقية.
*وينهار العقار.
*ويصبح أنقاض.
*بل كوشة للحي.
*والسبب أن أحد الورثة راكب راسو.
*لذا.
*ولكل ذلك.
*أقترح تكوين لجنة تضم أطياف الخلاف.
*وبالتأكيد يكون فيها محايدين.
*وما يناقشوا مشكلة المريخ.
*لأنو كل طرف حيشوف إنو المشكلة كذا.
*حسب منظوره.
*وغيره يراها غير كذا.
*تكون محاور اللجنة دائرة حول كيفية الخروج من النفق.
*لا في أسباب الدخول للنفق.
*والخروج من النفق.
*زي تزاحم العربات عند تقاطع المرور.
*إن أردنا للشارع أن ينساب.
*بالتأكيد ما حنفكر ياتو عربية العرقلت السير.
*ولكن نستطيع أن نجبر سائق عربية على الرجوع.
*بصرف النظر عن أحقيته في العبور.
*ونجبر آخر على الانحراف يمينًا.
*بصرف النظر عن الاتجاه الذي كان يقصده أساسًا قبل التزاحم والتقاطع.
*ونستطيع أن نجبر ثالثًا على الصبر حتى تمر عربات الاتجاه الآخر.
*وفي أقل من خمسة دقائق تنساب حركة المرور وينفك الاختناق.
*لكن أن نضيع الوقت في من دخل الشارع دون وجه حق.
*وديل يقيفوا عشان يمرروا شمالهم.
*ما حنحل مشكلة وتظل العرقلة في محلها، والشارع مقفول وغير منساب والزمن يضيع.
*دي استراتيجية حل إشكالية المريخ.
*من يرفضها من أطراف الصراع.
*يجب أن لا نعامله معاملة الوارث الذي يرفض استثمار العقار أو بيعه.
*لنا حق في الميراث مثله.
*لن نتركه يصبح أطلالًا وخرابة وكوشة للحلة.
*عشان قوة راس زول ما بهموا البحصل.
*ده الموضوع ببساطة
*البحث عن أسباب عرقلة المسير لن يؤدي لانسياب المرور.
*ولكن التعامل مع الواقع دون النظر للحقوق.
*يقودنا جميعًا للتنازل من أجل انسياب المرور.
*بعدها يحق لنا أن نغني.
*وسط الشارع المنساب جمالًا
*الليلة بالليل نمشي شارع النيل.
*وإلا سنطير من قبل التمهيدي ذاتو.
*ونقعد نبني في الوهم.
*أيها الناس.
*في الأفق مبادرة يقودها خُلّص.
*نتمنى لها النجاح.
*والبقولوا ليهو أرجع ورا.
*عليكم الله ما يعاند.
*يضحي من أجل الانسياب.
*جبتوا لينا الانسداد.
*جاتكم البلا.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*زوجة واحد منينا.
*الحرب دي ما غيرت.
*شناة طبعها المزعلنا وغالينا.
*الدانة وقعت تحت رجلينا.
*الناس تحمد في الله ما كتلت واحد فينا.
*قالت لى زوجها دي منو الصرخت جمبك يا أخينا؟
*زوجة قال لينا.
*المرة محرشة من أمها حاجة الزينة.
*قلت ليهو يعني مسيرة يا أخينا؟؟؟
*قال لي مسيرة واريتها بي مضادات تنسفها لينا.
*النسوان حيرنّنا يا والينا.
*في الحرب دي ما دايرات يحسنن الظن فينا.
*بليلة من تكية شن بتعمل لينا؟
*وبعد ده يشُكّن فينا.
*الواحد فينا تشوفو من بعيد يا والينا.
*يتطوطح تقول خيال مآتة في جنينة.
*وبعد ده يشُكّن فينا.
*الله ينهي الحرب يا والينا.
*لكن بعدها واحده فيهن ما بتبارينا.
*سودان جديد يحسن الظن فينا.

سلك كهربا:
ننساك كيف والكلب قال مسيرة مخيرة مرسلة جات براها، انا غايتو حددت موقفي.
وإلى لقاء.
سلك.