لغة المسدسات

بابكر سلك

*زمان.
*بدري الكلام ده.
*بدري شديد.
*كان عندنا سينما.
*السينما دي لغير الناطقين بها.
*حوش كبيييييير.
*مليان كراسي.
*مقسم جوة زي السابتك.
*قدام الشعب.
*كنب حديد.
*عشان كدة جيلنا كلو كان أصابو مرض.
*طريقة حقن مافي.
*حبوب بس.
*حديد كنب السينما ما خلى لى زول محل يدوهو فيهو حقنة.
*ورا الشعب في اللوج.
*وده كراسي أخف وطأة من كنب الشعب.
*الشعب دايمًا مكنب.
*وبعد اللوج في مربعات كدة فيها نفس كراسي اللوج.
*ده مخصص للعوائل.
*العوائل قاعدة جواهو.
*وأي زول شايف تفاصيلها.
*زي الموجات الصوتية.
*الحرز فقط لتميز لا يخدم ولا يقدم شئ.
*قشرة في فارغة.
*المهم.
*خلف اللوج ده في غرفة مقدودة.
*بطلع منها ضوء يشيل الفيلم من الكاميرات إلى الشاشة.
*شاشة كانت غشاشة خلاس.
*قدر الكتلة.
*مبنية بالطوب.
*وشادين عليها قماش أظنو سبعة أمتار في عشرين متر.
*لما يكون الفيلم كاوبوي.
*الحصين بتكيفن
*بلقن ليهن براح يبرطعن فيهو بمزااااااج.
*سبعة أمتار في عشرين متر ياخ.
*المهم.
*السينما كانت ثقافة سائدة لها روادها.
*رافد معرفي هام ننهل منه بانتظام.
*ومتعة.
*بالذات لما يكون الفيلم هندي.
*ستة أغاني في كل فيلم.
*تلقي السينما دي كلها تغني مع الفيلم.
*وما فاهمين كلمة.
*لكن الموسيقى لغة عالمية.
*ولما يكون في فيلم عربي.
*بجوا الحبّيبين.
*الممثل يقول.
*ماجدة… أنا بحبك يا ماجدة.
*تلقي الحبيب طوالي عاين للحبيبة.
*والحبيبة تهرب منه بنظراتها في خجل لا يخلو من غنج.
*ما فينا زول كان بعبر عن حبو مباشرة.
*يا هو بس نستغل الأفلام العربية ونتبادل النظرات مع المحبوبة.
*الواحد يقرب يقول للمحبوبة شالها من خشمي.
*فنحن شعب خجول يختشي من التعبير عن مشاعرو حد الثمالة.
*لكن ريّادين.
*بعد داك جات أفلام الكاراتيه.
*ياخ بعد الفيلم.
*الشعب كلو وهو مارق من الفيلم بغير مشيتو.
*أي زول فيهم بتقمص شخصية فانكي أو ويلي.
*فانكي وويلي ديل أبطال أفلام الكاراتيه.
*وتلقى الشارع ده عجاجتو رابطة.
*ياع ياع ياع.
*وهاك يا شلوت ونطيط وقليب في الواطة.
*بمناسبة أفلام الكاراتيه دي.
*قالوا بعد الفيلم انتهى.
*اتنين أصحاب مرقوا من السينما ماشين سوا.
*واحد كان متأثر شديد بالبطل بتاع الفيلم وماشي منفوخ.
*صاحبنا من قبيلة اشتهرت بالخوف من الكلاب.
*وهم راجعين شبك ليك صاحبو قصص وهمية.
*مرة قابلوني تلاتة بالليل.
*حاوطوني.
*بس عاينت ليك للأول.
*وخشيت في الوراي بكراعي جبتو الدايمة.
*قبل ما يقوم أديت ليك التالت “كاته” كضم.
*ومشيت على التالت قام جاري.
*أنا صعب.
*ما تشوفني كدة.
*أنا ما بخاف إلا من الله.
*في اللحظة دي نبح فيهم كلب.
*هو هو هو.
*صاحبنا اتخلع وأشر على الكلب وقال.
*والوسخ ده.
*السينما كانت صاحبة مساحة سيادية وريادية في المجتمع.
*لكن تقول شنو.
*المهم.
*يوم جابوا فيلم كاوبوي.
*اسمو لغة المسدسات.
*الفيلم ما فيهو ولا كلمة.
*كلو برطعة حصين كربطك كربطك كربطك.
*ورصاص.
*تش ناووو.
*تيشنق تيشنق تيشنق.
*ناس جارية.
*وقرى تُحرق.
*ونساء تختطف.
*وأطفال يدخلهم الرعب.
*وفنجطة.
*حرق زرع.
*سرقة مواشي.
*وقتل الشريف والعمدة.
*ونهب قطر شايل إمداد.
*غايتو فيلم الله لا جاب عقابو.
*خواجة حي بعد الفيلم ده ما ظنيت.
*في آخر الفيلم كانت العبارة الوحيدة.
*الخاين واقع في الواطة وبحاول يشيل مسدسو.
*نشاهد بوت البطل بي نجمتو البي ورا ديك يدعس يد الخائن.
*ولقطة عامة تظهرهما.
*البطل يعمر المسدس.
*كررررج.
*الخائن يقول بانكسار.
*أرجوك ارحمني.
*البطل يقول ليهو الرب يرحم أما أنا فلا.
*تشناوووو.
*يختها ليهو في جبهتو يرسلو لذات البروج.
*ويكتبوا لينا.
*THE END
*ياخ لما قمنا من الكراسي قمنا معسّمين ومغبّرين من برطعة الحصين.
*وريحة الشربة ما تديك الدرب.
*الخاين ده مكسر ليهو قريب سطاشر بار في الفيلم.
*يا حليل السينما.
*أفلام تم عرضها قبل سنين طويييلة.
*نعيش سيناريوهاتها واقعًا اليوم.
*لا تفاهم ولا لغة حوار.
*ولا خطاب بفهم.
*كلو تيشنق تيشنق بس.
*كلو كوم في المريخ راكب حصانو ويبرطع.
*كلو معارضة راكبة حصانها وتفرتق ليك أجعص لمة مجلس.
*تيشنق تيشنق.
*كل المجتمع بقى كدة.
*لغة المسدسات هي لغة الخطاب الآن.
*ولو قلت اعقلوها وارحمونا.
*يختوها ليك في جبهتك بعد عبارتهم الشهيرة.
*الله يغفر أما أنا فلا.
*أيها الناس.
*غيروا لغة الخطاب.
*واصنعوا من مريخنا رواندا جديدة وشديدة ولضيضة.
*أيها الناس.
*إن تنصروا الله ينصركم.
*أها.
*نجي لى شمارات والي الخرتوم.
*والينا.
*بعد الحرب السينما حا تفتحوها لينا؟
*ولا نحمل أفلام برانا يا أخينا؟؟؟

سلك كهربا:
ننساك كيف والكلب قال كل اللغات لا تضاهي لغة الحب جمالًا، ولغة التسامح جلالًا ولغة الوطن إفهامًا وقبولًا للآخر، وتفاهمًا بين الجميع.
وإلى لقاء.
سلك.