سوليناس ما خلاس؟

بابكر سلك

*اليوم نقابل جمارك موريتانيا.
*يا مرّينا يا جمركونا.
*وكان جمركونا تبقى محنة جديدة.
*وكان مرّرونا الغريق قدام.
*ما ساعيين لى نصر بدون أداء ومظهر.
*أداء ينم عن بصمة فنية.
*ومظهر مشرف ويشبه تاريخ المريخ المشرف.
*قد يقول قائل إن الوقت ليس بالكافي حتى تظهر نجاعة المدرب.
*ولكن ما مضى منه كفيل بظهور خطوط خفيفة بقلم الرصاص، تنبئ بشكل اللوحة حينما تكتمل.
*ولم نر قلم الرصاص.
*وسوليناس يردد.
*الرصاصة لا تزال في جيبي.
*سمح خاتيها لى شنو؟
*لليوم الأسود يا كوتش؟
*نحن لسنا مثل ذلك الرجل الذي غرقت به السفينة في عرض البحر.
*ثم قذفت به الأمواج لحسن حظه لجزيرة وسط تلك اللجج.
*وأنقذه سكان تلك القبيلة وأسعفوه.
*برغم أنهم بدائيون ويشبهون أجدادنا القدماء لكنهم أنقذوه.
*بعد فاق وفتّح.
*لقى ليك حولو سكان الجزيرة بي السكسك والشلاتين أقصد الشلاتيت اللابسنها ديل.
*ياحليل شلاتين.
*الكيبورد مرات بذكر بمآسي.
*المهم.
*صنقع ودنقر وعاين ليهم.
*قال ليهم أنا وين؟
*قالوا ليهو في جزيرة بوتو بوتو.
*قال ليهم وجزيرة بوتو بوتو دي فيها حكومة؟
*قالوا ليهو فيها.
*اتحكر حبس الفجج وسط تلك اللجج وقال ليهم.
*أنا معارضة.
*زول بعارض من أجل المعارضة.
*بعارض بدون ما يفهم حاجة.
*أي حكومة هو معارضة.
*بعارض من أجل المعارضة.
*زول عارض شديد.
*ونحن لسنا مثل ذلك العارض المعارض.
*ونحن إن لم نكن كذلك.
*فأيضًا لسنا من هتيفة أبوكم مين؟
*نميييييري.
*قائدكم مين؟
*نميييييري.
*ولسنا ممن ينشد يا حارسنا ويا فارسنا مع الجماعة دون وعي.
*كنا زمن نفتش ليك وجيتنا الليلة.
*وكأن خلاصنا في يد ذلك الحارسنا وفارسنا.
*نحن أمة.
*شعب طيب الأعراق.
*خلاصه بيده.
*بيد أي فرد منه.
*لا نحتاج لطمبرة وتطبيل لفرد.
*وجعله المنقذ الأوحد.
*الذي نموت كمدًا إذا ذهب عنا.
*نؤمن بأن الشعب الذي ينتظر البطل المنقذ القائد الملهم.
*حايطول وياخد مدة.
*لذا.
*ولأننا لسنا كزول الجزيرة نعارض من أجل المعارضة.
*ولسنا من طبالي الحاكم.
*فإننا نناصح ونقدم نقدنا على طبق من المحبة والأدب.
*يا مجلسنا.
*يا بيتنا ومدارسنا.
*مدرسة الحياة علمتنا أن الخريف اللين من رشاشو بيِّن.
*ومدرسة الحياء علمتنا أن نقدم رأينا بأدب.
*الزول ده لا بيِّن ولا ليِّن.
*خريفكم ده جفاف وتصحر.
*والخوف يعود بنا إلى أيام الجفاف والتصحر “سودان كول”.
*ويصنع منا “مريخ كول”.
*فالبيروقراطية لا تعني بأي حال انضباط من يمارسها، ولا تعني فهمه العميق لواجباته.
*لذا نلتمس مراجعة التعاقد معاهو وفقًا لمعطيات منهجية.
*ومحاسبة قرار التمديد له محاسبة شديدة جدًا.
*لأنو بصراحة أنا مستغرب من التمديد وأسبابو ونتايجو، مع خريف لا رشاش له لكنه راشّينا محل ما نقبل.
*ده من ناحية.
*من ناحية تانية.
*الطريقة التي تم بها إبعاد خالد عزيز حولها ألف استفهام.
*خالد عزيز شهادتي فيه مجروحة.
*ولكن تشهد له بصماته في مسيرة المريخ وخبراته.
*وخيرًا فعل المجلس، حينما ضم خالد عزيز لمنظومة موظفي النادي.
*كان لخالد ملاحظات حول سلوكيات الخريف “سوليناس”.
*كلها حول طريقة التعامل الجافة والحادة تقريبًا.
*ولصلة وقرب شيحة “التفتيحة” من الخريف “سوليناس”.
*ولأن علاقة سوليناس بخالد كعلاقة الحراز بالمطر.
*اختار خالد أن يخبر التفتيحة بالحاصل، ويناشده أن يتناول الأمر مع خريف الرشاش الطشة.
*ولأن التفتيحة له ماله مع خالد عزيز.
*لم يخبر الخريف.
*ولكنه أوصل الأمر للرياح الجابت السحاب.
*وصل الأمر بياتو صورة.
*دي يعلمها الله.
*ده الفاهمو أنا عن سبب إبعاد خالد عزيز.
*وقد يكون فهمي خاطئ.
*وطبعًا علاقة خالد بالتفتيحة كعلاقة المطر بالشتاء في السافانا.
*المهم.
*اتخذ السيد الرئيس أو المجلس لا أدري.
*قرارًا بإبعاد خالد عزيز.
*من حقو.
*لكن.
*أليس من الأجدر كان استفسار أو استدعاء عزيز قبل تكوين رأي وإصدار قرار؟
*هل كلام شيحة قرآن لا يقبل الجدل؟
*وهل اتباع الإدارة لأسلوب السماع بأضان واحدة وإصدار قرار وفقًا لذلك فيه منهجية ونجاعة إدارية؟؟؟
*يصدر قرار والأضان التانية ما سمعت وتحتج مرددة يطرشني يطرشني؟؟؟
*قرار إبعاد عزيز بهذه الطريقة، كان قرارًا فيه ريحة زولي وزولك، استغله التفتيحة وقد يكون خالد زاول ليهو أمام زولو وقام وقلب قولو.
*على كلٍ أيًا كانت الرواية، خسر المريخ مجهودات خالد عزيز في مرحلة كنا نحتاجه فيها، مثلما فقد مجهودات الكثير من لاعبيه.
*وعندي سؤال.
*ناس المجلس دورهم شنو في القرار؟
*إذا شاركوا في إصداره، يكونوا قصروا في حق خالد الذي لم يستفسروه.
*وإذا لم يشاركوا وصمتوا على أساس أن القانون في المريخ، هو قانون الفول فولي زرعته وحدي وحصدته وحدي وسآكله وحدي.
*يبقى قاعدين ليه ما تقوموا تروحوا.
*وثمة سؤال.
*بعد استقالة الأخ أيمن.
*إذا لم يتقدم الأخ النمير.
*ماذا كان سيفعل الإخوان؟؟؟
*عرفتوا ليه قانون الفول فولي هو دستور العمل الإداري في المريخ؟؟؟
*حتى فرعون.
*كان زول كويس قبل يتفرعن.
*وبرضو كان عندو تفتيحة اسمو هامان.
*واتفرعن.
*ولما سألوهو اتفرعنتا ليه؟
*قال ما لقيتش حد يحوشني.
*وغايتو جنس غايتو.
*أتمنى أن نكون على خطأ.
*وتظهر نجاعة سوليناس.
*ويتقدم المريخ.
*ويعود لمنصات التتويج.
*ويسطر النمير اسمه على لوح الشرف المريخي.
*جمب عبد الحميد الضو حجوج.
*وزي ما قلتا فوق.
*نحنا ما زي العارض بتاع المعارضة المشي الجزيرة داك.
*وكمان لسنا بشعب أي حكومة طوالي شايلين طبلتنا في أي زفة وزفاف.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*حانبنيهو البنحلم بيهو يا أخينا.
*بس محتاج إعادة تخطيط قبل البناء يا والينا.

سلك كهربا:
ننساك كيف والكلب قال كان نبحنا يقولوا سعرو، وكان سكتنا يقولوا اتعاونوا.
وإلى لقاء.
سلك.