يا أهل المريخ.. رجعوا لينا مريخنا

بابكر سلك

*عملوا للمريخ أهل.
*وكان السؤال هل ولا ما هل؟
*باقي المريخاب ديل نسابة ساي يعني؟
*عملوا للمريخ أهل.
*من يومها فقد المريخ الهوية.
*قالوا هم الأهل وما دونهم رعية.
*وفقد المريخ الهوية.
*بل أفقدوا المريخ الهوية.
*والمريخ في زمن من يدعون أنهم أهل المريخ.
*بقى ساااااهل موية.
*كل من له أحلام وردية.
*يستطيع أن يدخل المجلس حتى ولو من البوابة الخلفية.
*حتى لو ما عندو عضوية.
*تضرب له أو لها عضوية.
*والحياة وردية.
*ضاعت الهوية.
*بين سماسرة لاعبين وتجار عضوية.
*قالوا اصبروا.
*رفعنا شعار.
*سأصبر حتى يعجز الصبر عن صبري.
*وأصبر حتى يأذن الله في أمري.
*وأصبر حتى يعلم الصبر أني صابر على شئٍ أمر من الصبر.
*أهل المريخ.
*حالتكم اهلو؟؟؟
*أومال لو كنتوا نسابتو؟
*حق النسابة كان سويتوهو ليهو كيف؟؟؟
*بقّيتو المريخ زي الموية.
*ساااااهل.
*لا لون لا طعم لا رائحة.
*كل من هب ودب يدخل المجلس.
*لذا كل من هب ودب يلعب في المريخ.
*وكل من هب ودب يتلاعب بالمريخ ويطمح بل يطمع في هزيمة المريخ.
*مريخ مانديلا حصالة الدوري الموريتاني.
*موش كدة وبس.
*لا طريقة لعب.
*لا لياقة.
*لا روح.
*اللهم طولك يا روح.
*مريخ خاوي.
*خالي.
*فاضي.
*حتى الرغبة عند اللاعب معدومة.
*بل حتى جاذبية النادي عند لاعبيه انعدمت.
*الكل يسعى للرحيل.
*ما هذا يا أهل المريخ؟؟؟
*من نادٍ جاذب لنادٍ طافش في بت أم روحو الحلوة دي ومطوفش.
*معقولة ما نشاهده ده المريخ؟؟؟
*اللهم إن كان سحرًا فأبطله.
*قول المدرب ما بعرف.
*واللاعبين السجلناهم ما بعرفو.
*عدم الروح والرغبة في الرحيل دي سببها منو؟؟؟
*أكيد المجلس.
*والمدرب ده لو المجلس لقاهو واقع في واطات الله دي غالي.
*يا أهل المريخ.
*ولدكم ده بالطريقة دي بتكتلو.
*وبرضو في العزاء ما حا تريحونا.
*تستقبلوا المعزين براكم.
*ما إنتو أهل الميت عاد.
*وتتقدمو الصفوف بالمقابر.
*قاشرين حتى في الجنازة.
*وللأسف ما حا تتعّبو روحكم بى شيل الجنازة.
*نشيلها نحنا.
*نحنا الما أهل المريخ.
*وللأسف حا تقبضو الكشف كلو.
*وما حا تورونا الكشف وتفاصيله.
*تورونا ليه.
*نحنا أهل المرحوم!
*أيها الناس.
*كنا نحارب الكيمان.
*لكن لما جابت ليها أهل وما أهل.
*عرفنا إنو فات الأوان.
*والعلاج بعد ده ما بنفع.
*الناس سعرت والسعر بعد العضة بشهر لا فكاك منه.
*لا بنفع مصل.
*ولا بفيد تنصل.
*البقت بقت.
*نسعر وننبح زي الكلاب ونموت.
*ويعيش أهل المريخ بعد أن قتلوا المريخ فرقة وشتات ومؤامرات.
*للأسف.
*نموت ويموت المعشوق معنا.
*نموت جميعًا دون هوية.
*ولا شاهد يكتب عليه.
*هذا قبر المرحوم المريخ.
*قتله أهل المريخ.
*في يوم كذا في شهر كذا.
*ولكن العزاء أن الموت في ظل هكذا ظروف.
*أكرم وأفضل من عيشة نرى فيها المريخ دون هوية.
*شكرًا أهل المريخ.
*المريخ مريخكم.
*تفقدوه المعنى.
*المضمون.
*الشخصية.
*الطعم.
*الروح.
*حتى إذا كتلتوهو ما مشكلة.
*ولدكم براكم وانتو حُرين.
*أيها الناس.
*قريب السبعة شهور!
*والبطن ما مرقت؟
*ده حمل كاذب.
*الناس في سبعة شهور بتتولد عديل كدة.
*وبتعيش.
*وتكبر.
*وتقرأ الجامعة.
*وتتخرج.
*وتغترب.
*وتتزوج.
*وتصرف على أهلها زمن الحرب.
*نحنا سبعة شهور اسمو منو ما عارفنو؟؟؟
*يا كافي البلا.
*لا بطن ظهرت.
*لا موجات صوتية أثبتت.
*فوليك أسيد سااااااي.
*في فارغة.
*نحنا الما أهل المريخ لما لقينا البطن طامة والفنسة زايدة فرحنا.
*قلنا أريتو يشبه أبوهو.
*وربك رب الخير قال آمين.
*فعلًا بشبه أبوهو وأبو أهلو ذاتو.
*مجرد وهم.
*الوحم طلع وهم ساكت.
*وبقت قدامنا حقيقة واحدة.
*السنة الجاية دي ولادة مافي.
*حالتنا كنا مجهزين ليها.
*لى هدوم الطفل والبودرة جبناها.
*قايلنو حمل.
*الحمد لله.
*الزمن ضاع.
*بعد ده أنابيب.
*حقن مجهري.
*كلو ما بنفع.
*السنة الجديدة ولادة مافي.
*شكرًا أهل المريخ.
*لو كنتو أهلو كان سويتو شنو؟
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*قالوا أهلو وعملوها فينا.
*نستاهل نحنا يا أخينا.
*عشان صدقناهم يا أخينا.

سلك كهربا:
ننساك كيف والكلب قال لو ما بطلتو قولة أهلنا وسرنا والحاجات دي ولادة مافي، وحم بس.

وإلى لقاء.

سلك.