فيدرالية المريخ

بابكر سلك

*تاني من مريخنا رحل زول جميل.
*إنه زمن الرحيل.
*دكتور محجوب صديق حسن التوم.
*رجل معطون في حب المريخ حتى الثمالة.
*قدم من داخل المجلس.
*ومن خارجه لم يقصر.
*كان يعتقد أن المناصب ليست هي وحدها الباعث الدافع لدعم الكيان.
*أذكر وقتها.
*وهو يمتلك صيدلية جوار الأحفاد تفتح على النادي.
*وقتها كنا بدائرة المناشط.
*ووقتها كان المجلس لا يؤمن بالمناشط إطلاقًا.
*ولكنه مجبور عليها لأن القانون يتطلب ذلك.
*وفي ألق إهمال المجلس للمناشط.
*كانت مناشط المريخ المختلفة تتصدر المشهد.
*سباحة، ملاكمة، كرة يد، كرة سلة، تنس طاولة، شطرنج، وغيرها.
*وكان المجلس لا يساهم في مسيرة المناشط بشيء.
*بل حتى لا يفرح بانتصاراتها.
*ولا يكلف نفسه مجرد عناء المباركة لها.
*كان ناس المجلس وقتها.
*وهم أغلبية أهل المريخ اليوم.
*لا يريدون سماع سيرة المناشط.
*ولم نقم وقتها بفوضى خلاقة.
*ولكن استعنا برواد النادي بالقدرنا عليه ومشّينا النشاط وحققنا البطولات.
*وقتها كان الفقيد محجوب صديق خارج المجلس.
*لكنه كان يدعم المناشط بعلاجات اللاعبين من صيدليته.
*لأنو بفهم مناشط يعني شنو.
*وبعرف أن تقدم للكيان من سكات يعني شنو.
*أحد أهل المريخ كان رتبة بالمجلس وقتها.
*وكعادتهم كانوا يغرقون المناشط في وعود كذوبة.
*قابلتو بالاستاد.
*قلت ليهو الحاصل في المناشط كيت وكيت.
*ودي كارثة.
*كان رده حاضرًا.
*كارثة شنو.
*المناشط دي كان صبحنا لقيناها كلها ماتت ما كارثة.
*تخيلوا ده فهم واعتقاد أحد أهم 3 أعضاء بمجلس الإدارة!
*سيادتو لا يعلم أن نادي المريخ هو “SC”.
*لا “FC”.
*يعني نادي رياضي ما نادي كرة قدم.
*وقتها كان ممكن نعمل فوضى خلاقة ونجيب عاليها واطيها.
*ولكن مصلحة الكيان أجبرتنا على مواصلة النشاط في غياب المجلس.
*ذلك المجلس الذي كانت غالبيته ممن يطلقون على أنفسهم اليوم أهل المريخ.
*رحم الله الدكتور محجوب صديق.
*وألزمنا الصبر الجميل.
*المهم.
*الانشقاقات والانقسامات والتحزب في المريخ وصلوا إلى درجة لا تحتمل.
*لن يكتمل بناء وهناك معاول هدم شغالة.
*ومافي زول مقتنع بزول.
*لذلك أقترح أن يكون حكم المريخ فيدراليًا.
*يمكن نستفيد من ذلك.
*وجون قرنق زمان.
*كان بشرح في معنى فيدرالية للبسطاء من أهل السودان.
*قال ليهم فيدرالية ده زي برش فطور بتاع رمضان.
*ناس كلو يفرشوا برش في الشارع.
*إنت تجيب فول بتاعك، وجيرانك واحد يجب عصيدة، واحد تاني يجيب بليلة، واحد يجيب كجيك، واحد يجيب سلطة، واحد يجيب حلو مر، واحد يجيب ليمون، واحد يجيب عرديب، واحد يجيب بفرة، واحد يجيب شية وكوارع وشوربة.
*والناس كلها تقعد تستمتع بأكل الخير المتنوع ده.
*لو قعدت في بيتك ياهو غير طعميتك ده ما عندك.
*لكن لما تجيب البتقدر عليهو وغيرك يجيب البقدر عليهو.
*تستمتعوا كلكم بخيرات الحلة دي وبمجهود بسيييط.
*إذن حل المريخ.
*وحل السودان.
*وحلحلة جميع مشاكل العنصرية والجهوية والمناطقية والأنانية.
*تكمن في الفيدرالية.
* في برش فطور رمضان.
*يلمنا كلنا ويحقق العدالة بيننا وينمي العلاقات بيننا.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*والينا.
*الشتات مسبب أذية لينا.
*رايك شنو في الفيدرالية يا والينا.
*بمفهوم قرنق برش فطور رمضان يجمع بينّا.

سلك كهربا:
ننساك كيف والكلب قال لو شغالين بمفهوم برش رمضان ده من زمان ما كان إلّي كان.

وإلى لقاء.

سلك.