نحيي هذا المنتخب

بابكر سلك

*أول سطر كتبتو بعد اندلاع الحرب كان.
*اللهم اجعلها حرب خير وبركة.
*وأظنها كانت دعوة مقبولة.
*فالخير الكتير ظهر في معرفتنا لقيمة بلدنا.
*بلدنا التي كانت تصطبح بشتايمنا.
*دي بلد يرفعوا ليها علم؟
*دي بلد دي؟
*الله يحرقها يريحنا.
*بلد قمة طموح شبابها مغادرتها.
*وشبابها تشابك.
*بلد مفروض يبيعوها ويدوا كلو زول حقو يشوف ليهو بلد تانية يعيش فيها.
*ياخ هو الباعوهوا منها أدوك حقك فيهو؟
*والله ديل يبيعوها ويبيعوك إنت زاتك جواها.
*الجنينة بي بهايمها جوة البيعة.
*بلد حدادي مدادي.
*قاطعة موية وكهربا يوماتي.
*وتستمر السخرية والإساءة للبلد يوميًا من الصباح حتى مغيب الشمس.
*وجاتنا الطاوية حبالها.
*حرب جعلها الله حرب خير وبركة.
*وعرفنا قيمة البلد.
*وعرفنا حقيقتنا كشعب.
*وعرفنا كيف قصرنا في حق البلد.
*وعرفنا إنو الزول ما بقول البلد أدتني شنو.
*بقول أنا قدمت للبلد شنو.
*وعرفنا الله واحد.
*وعرفنا إننا شعب واحد برغم الفوارق الطبقية والعرقية الزائفة التي كنا نصنعها بأيادينا.
*زول أحسن من زول مافي.
*كلنا في الهوا سوا.
*وقررنا نبطل هبل القبلية.
*العرقية.
*الجهوية.
*لأننا شعب واحد.
*والله الخلقنا واحد.
*وعرفنا حقيقة ناس كتاااااار.
*وكشفنا كل تجار الأزمات.
*تجار العملة.
*تجار المال المسروق.
*تجار الإغاثات.
*تجار المواقف.
*وحتى تجار بيع وشراء العملة القديمة، واستبدالها بالجديدة بفارق في القيمة، يصل إلى تلتين في المية.
*وديل بالذات أخطر من الدعامة.
*هذه بعض ثمار حرب الخير والبركة.
*وكانت أكبر مظاهر الخير من الحرب قد تجلت في مسيرة المنتخب.
*وها هو لو “كان” لو “شان” ماشي ما شاء الله زي الحصان.
*أقصى منتخبات ما كنا نستطيع النطق بأسمائها.
*وتصدر أمام منتخبات لو نطقنا اسمها لالتهبت لوزاتنا.
*وها هو منتخب المحليين يخطو بثبات.
*الحرب كانت حرب خير وبركة على المنتخب.
*ولعل هناك خير كبير في المنتخب وبركة مهووولة.
*إنها قيادة رمضان عجب.
*كابتن رمضان الكابتن في المنتخبين.
*الزول ده فيهو بركة كبيرة خلاس.
*طيبة ونقاء وتواضع.
*جمعت كل البركة في هذا الرجل.
*لا مغرور.
*لا مسيطر.
*لا فارز روحو من أصغر لاعب بالمتتخب.
*شايف إنو هو وكانتي قدر بعض قدرًا ومقدارًا.
*هذا التواضع رفع الله به قدر المنتخب تحت قيادته.
*شكرًا رمضان الخير والبركة.
*شكرًا لكل المنتخب.
*شكرًا لله كثيرًا والحمد لله حتى يبلغ الحمد منتهاه.
*اللهم اعدل خطوات منتخبنا.
*واجعل منّا روادًا لاستادات كأس العالم، لنقف “لايف” خلف منتخبنا، وهو ينازل ألمانيا والباراغواي والدنمارك في مجموعة واحدة.
*غايتو دي كان بقت.
*تاني كل سنتين نعمل لينا حرب برانا.
*أها.
*أمس المطر بدون براق ضاغطنا.
*والبرد “بدون فراد” ضاغطنا.
*وإثيوبيا تضغط للتعادل.
*وإذا بالصاعد الواعد كانتي يحل كل الشربكة.
*هدف للذكرى.
*ذكرني بهدف كمال عبد الوهاب الودانا ميونخ.
*كان المنتخب يلاعب إثيوبيا بأديس.
*كنا نحتاج للتعادل لنتأهل.
*كانت إثيوبيا متقدمة بهدف.
*استاد أديس ده مليان فل.
*مافي حبشي في الديم.
*كلهم في الاستاد.
*المدرجات تزأر.
*إثيوبيا متقدمة بهدف.
*والسودان لاعب ناقص.
*بشارة انطرد “تكتيكيًا”.
*وكمال صغييييير.
*كان بنزل لخط طمنطاشرنا طالبًا للكرة.
*عتاولة دفاعنا ما بدوها ليهو.
*خاتين في بالهم الشافع ده يتكلوج فيها يخطفوها منو ويجيبوا التاني.
*وتكرر المشهد.
*أخيرًا مرروها ليهو.
*وعينك ما تشوف إلا النور.
*كمال بحاور من خط طمنطاشرنا لى خط طمنطاشر الحبش.
*ماشي في الحبش ديل ساااي.
*والحبش ساكنوا تقول زغني.
*ودخل الخط.
*وحاور الحارس.
*وختاها تتهادى جوة الجك.
*هدف أهّل السودان لأولمبياد ميونخ.
*وما أشبه الليلة بالبارحة.
*أيها الناس.
*سوليناس
*جا يشيل عفشوا؟
*ولا عامل دفتردار من جديد؟؟؟
*سوليناااس يا نااااااااس.
*أيها الناس.
*سوليناس.
*أيها الناس.
*إن تنصروا الله ينصركم.
*أها.
*نجي لى شمارات والي الخرتوم.
*شفت يا والينا.
*شفت الهنا الفينا.
*برغم القواسي منتخبنا يسعد فينا.
*ينتصر بينا ولينا.
*ولسسسة يا والينا.
*ياما في الجراب نصرٌ مبينا.

سلك كهربا:
ننساك كيف والكلب قال أيام عشتوا فيها الفرح والحزن بنفس القدر.. ياخ إنتو شعب كدة.

وإلى لقاء.

سلك.