أهم أسباب الفشل
بابكر سلك
*نحن كدة.
*ناس لا نعرف كيف نستفيد من الملك الشائع.
*دائمًا اشتراكنا في سلعة أو حق أو خدمة أو مشروع.
*يكون سببًا في الفشل وضياع حقوق المشتركين فيه، وإهدارٌ للخدمة المشتركة.
*نحنا كدة.
*نعمل شنو بس.
*عشان كدة بسيطر علينا ويشكلنا الإحساس بالأنانية والحسد.
*وندمن العمل بنظرية المؤامرة.
*خلونا نقولها.
*ونفشل.
*ونفشل “بضم الميم وفتح الفاء وكسر الشين” الآخر.
*ينجح كيف!
*ما ينوم.
*القصة دي على جميع المستويات.
*بدءً من إدارة الدولة وتداول السلطة.
*ومرورًا بالشراكات التجارية.
*وصولًا للسكن المشترك.
*الملكية الجماعية عندنا تعني الاختلاف والتسلط وعرقلة المسيرة.
*لذا تجدنا في هذا الوطن الشائع لا نعترف بآخر ولا نمارس اتفاقًا ولا نساهم بناءً.
*بس كدة.
*شوكة حوت وفرحانين بالحتة دي.
*ياخ إذا في عمارة فيها تمنية شقق.
*طبعًا الخدمات بتكون مشتركة.
*الالتزامات مشتركة.
*المنفعة مشتركة.
*تلقى التمنية متشددين في المنفعة.
*وعند الالتزام تختفي روح الجماعة.
*ويبدأ الزوغان.
*دايرين شير نظافة البير.
*مافي زول بدفع.
*تحت شعار بي وبلاي حا تتنضف.
*لكن لما تتنضف ببقى سيدها.
*ويكيل للناس الإشتغلت نقدًا ويهدر جهودهم ويشنِّف عملهم، وهو الزايغ من التزامو.
*نحنا كدة على جميع الأصعدة.
*بيت مهجور مكسر.
*لأنو بيت ورثة.
*تلاتة أربعة إخوة يرثون البيت ولا يتفقون حوله.
*يقعد كدة بس.
*ما داير أبيع.
*والتاني يقول زول يسكن مافي.
*والتالت يرفض فكرة أي استثمار.
*والرابع بعتوهوا أدونا نصيبنا خليتوهوا عودنا راكب.
*وتضيع المنافع والمصالح بسبب سوء إدارتنا لمصالحنا المشتركة.
*دي حقيقة.
*لكن تخيل لو جا واحد من الملاك على الشيوع ديل.
*وجاب خرط لبرج يقام على بيت الورثة.
*وعقد تمويل.
*استثمار.
*وعقد مقاولة.
*وشروط واضحة وميعاد للتسليم.
*حا يحصل شنو؟
*أكيد واحد أو اتنين حايفرنب ويرفض تلك النقلة.
*وقد يُفشِل كل تلك الجهود.
*وبعد تدخل العقلاء وتقديم الضمانات يبدأ المشروع.
*حا يمضي قدمًا إذا كان العمل يسير وفقًا للخرط الإنشائية والزمنية.
*لكن إذا جابوا البوكلين كسر البيت وحفر ومشى.
*وتاني ما جا زول.
*تبقى المشكلة.
*حتى الذكريات التي ارتبطت بحوائط البيت العتيق وأركانه وجميع أرجائه قد تلاشت.
*وهنا تبدأ الثورة والقطيعة.
*الحال ده نزّلوا على مستوى مجلس إدارة أي نادي.
*إذا كانت خططه واضحة وخرطه الإنشائية والزمنية محددة.
*إن شا الله يجي فيها إنو التسليم بعد عشرين سنة.
*تجدنا لك صابرون يا مجلسنا.
*لكن إن كان الأمر غامضًا.
*بوكلين يزيل كل التاريخ والوقائع.
*وتبقى النقعة بادية.
*قطعًا إن النقعة للقتال.
*والقتال عمرو ما بنى مشروع ولا صنع دولة.
*لذا.
*يا مجلس إدارتنا.
*أطلِعنا على خططك للبناء.
*وخرطك الزمنية.
*وأهدافك لكل المراحل.
*تجدنا عونًا لك.
*وسندًا يقويك.
*غير ذلك.
*ثبت بوكلينك.
*وأوعك تكسر.
*خليهو لينا خرابة.
*بدل يبقى كوشة.
*المهم.
*يمكننا دعم المجلس بالرأي قدر العندنا وبالمال ما استطعنا وبالاستثمار فينا.
*فنحن شركاء في البيت الكبير.
*لكن أن نرى تاريخنا يأكله الإهمال.
*قطعًا سنقاتل من أجل الحفاظ على الأقل على صفحات ذلك التاريخ.
*وعلى الشفوت جميعًا تقديم الدعم اللازم للمجلس، مقرونًا بصبرٍ وفألٍ جميل.
*طالما كان المجلس يؤمن بشيوع الملك ويترفع عن أحادية التصرف.
*وقع ليكم كلامي؟
*أيها الناس.
*فريق والموسم على مشارفو يفتقد للياقة البدنية.
*تاني شنو عاد؟؟؟
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*حبينا وتاتينا ومشينا.
*كبرنا رادونا وحبينا.
*عجزنا يا والينا.
*وكل الحب لقيناهو غنا.
*مجرد غنا يا والينا.
سلك كهربا:
ننساك كيف والكلب قال كونكم لقيتوا الحب مجرد غنا إنتو محظوظين.
وإلى لقاء.
سلك.
