تكتيك.. تكنيك.. تيك توك
بابكر سلك
*أحمدك يا الله.
*تاني منتخبنا حقق انتصار جديد.
*فزنا على إثيوبيا بهدفين لهدف.
*حتى الهدف الذي ولج مرمانا.
*كان واحدًا من عشرين.
*لكن ما فرقت.
*المهم التلاتة نقاط.
*والأهم مباريات أوغندا وبوروندي والأحبة جنوب السودان.
*كلها تطلع تعادلات.
*ونصعد بالمزيكة.
*إنه زمن صعود الأرواح بالكوم للسماء.
*فكيف لا نصعد للنهائيات أو على منصات التتويج.
*فزنا بفضل الله ثم إصرارنا برغم تصريحات الكوتش.
*كوتشينا قال ما مهتم بالشغلة كتير لأنو فرص الصعود ضيقة.
*وها هي فرص الصعود تنبشق انبشاقة النيل الأبيض على أهالينا وبوادينا وسهولنا.
*فزنا.
*دبلنا للإثيوبي.
*بأقل مجهود.
*وتحت المطر ساقيتنا كانت مدورة.
*خطتنا كانت قفِّل ورا.
*واجدعها للطيارات القدام ديلك.
*دفاع محكم ومتكتل.
*تركنا تكتيك الدفاع بالنظر.
*ذلك التكتيك الذي كان يجبرنا مع أي عكسية علينا.
*نصنقع وندنقر ونلقاها جوة.
*كالعادة.
*معظم التشكيل كان هلالي.
*طبيعي.
*إنها الجاهزية.
*أنا كنت متأكد إنو الجاهزية حا توصّلنا للحتة دي.
*ملعون أبو الجاهزية البتخلي محمد الرشيد يشارك دقيقتين نفَسو يقوم.
*يستلم كورتين.
*واحدة يمررها غلط.
*والتانية يلوكها ويقع فوقها.
*الهلال جاهزية.
*دي ما فيها شك.
*إنتوا قايلين الجاهزية شنو؟
*إنها المشاركة المتواصلة واللياقة البدنية واللباقة في الأداء.
*تكتيك مدرب المنتخب وطريقة اللعب.
*ما فيهما أدنى خلاف على تكتيك وطريقة مدرب الهلال.
*لذا ناس الهلال كانوا في المنتخب الأكثر جاهزية والأنسب.
*وها هو كانتي يؤكد تأكيدًا فعليًا إنه مهاجم مشروع.
*وربنا يستر من المشروع.
*المشاريع دائمًا تسعى للحصول على أجود البذور.
*وزي ما قالوا أخواننا السعوديين.
*يا راعي البزورة حافظ على البزورة.
*وقع ليك يا طال عمرك يا راعينا؟؟؟
*أيها الناس.
*أي مدرب شيخ.
*وأي شيخ ليهو طريقته.
*وفي المولد بتنفرز الخيم.
*ويتعالى الذِكر.
*ويتنافس المُدّاح.
*كلو مدرب ليهو تكتيك وتكنيك بعتمد عليهو.
*وده كلو بقوم على عنصر اللياقة البدنية، التي تخلق جاهزية لتنفيذ الطلعة والنزلة، وترفع من مستوى اللياقة الذهنيّة.
*أي مدرب عندو تكتيك وتكنيك.
*إلا زولنا ده.
*تيك توك ما عندو.
*وها هم ناسنا يجرجرون أذيال الرهق والتعب.
*الواحد في الكنبة نفسو قايم.
*الزول ده في طريقة يمشي بدون خسارات؟
*ولا مافي حل إلا في أمر الله؟؟؟
*بالطريقة دي لو ما كملت معدودة الزول ده.
*بكمِّلنا كلنا.
*تكمل معدوداتنا واحد واحد.
*ويقعد على تلها.
*وكانتي يمشي مننا.
*اللهم إن كان هذا سحرًا فابطله يا رب العالمين.
*اللهم انهي للحرب أمدًا.
*ولسوليناس عقدًا.
*المستفيدين من المريخ.
*اللهم شتتهم شتتًا.
*وبددهم بددًا.
*ولا تترك منهم أحدًا.
*ولا ما كدة؟؟؟
*معقولة ياخ.
*مدرب نايم.
*والتيم كلو نفسو قايم!
*أمر الله بس.
*مافي حل.
*أيها الناس.
*البزورة.
*البزووووووورة
*الله لا جاب عقابكم.
*أيها الناس.
*إن تنصروا الله ينصركم
*أها.
*نجي لي شمارات والي الخرتوم.
*كان شفت يا والينا.
*نستاهل البقت فينا.
*جبناها لي روحنا بأيدينا.
*والعالم كلو قعد يتفرج علينا.
*يا ريت نستفيد من الحرب يا والينا.
*ونخلي الجشع الفينا.
*تجارة العملة الشغل الغلط.
*مفارقة الأمانة وقطع الزلط.
*والوقفة لط.
*وكمية الهبل والعبط.
*والربا يا والينا.
*الربا يا أخينا.
*بالربا يا والينا.
*الله والرسول بحاربو فينا.
*لا كولومبيا لا غيرها لا محور يا والينا.
*بالربا الله والرسول بحاربو فينا.
سلك كهربا:
ننساك كيف والكلب قال حيرتني.. تتوضأ اليوم كلو وتبزق وبين الركعات ترابي وعامل فيها الترابي.
وإلى لقاء.
سلك.
