عوج الدرب والمدرب

بابكر سلك

*والله المريخ ده حيرنا.
*هو النادي كووولو بقى على تيم الكورة بس.
*وبعد ده ما قادر على التيم ده؟؟؟
*كلما تؤرقنا إشكالية.
*تجهجه باكاتنا.
*توصلنا الحد.
*يخف الحزن.
*نبتدي ننسى.
*تفاجئنا مشكلة جديدة.
*اللهم إن كان سحرًا فابطله.
*وأنا لا اتحدث عن المجلس الحالي بمنأىً عن المجالس التي سبقته.
*كووولو في الهوا سوا.
*والمتأمل لحال المريخ اليوم، لا يرهق نفسه كثيرًا في الوصول لحقيقة تقول أن الوضع متدهور جدًا.
*وينحدر بسرعة الصاروخ لحفرة حفرتها المصالح والجهويات، التي خلقناها بأنفسنا في مجتمع المريخ السامي المتسامي.
*المريخ عوج الدرب من بدري.
*وبقت السواقة بالخلا.
*دقداق يرمي الفقر.
*ووحل يحير الوجي الوحل ذاتو.
*وجبال تسد أفق الطموحات.
*وصحاري طشينا فيها ضائعين.
*رحنا وراحت لينا.
*والسبب نحنا.
*وبسببنا.
*المريخ عوج الدرب.
*المتأمل لحال المريخ اليوم، لا ينكر تحمل النمير للكلفة المادية وحيدًا، أو قل 99% من الصرف.
*مع احتراماتي لمن يتحمل المساهمة في 1% الفضلت.
*ودي يُشكر عليها الأخ النمير.
*وفي الآخر واجبو طالما دق صدرو وتقدم الصفوف.
*لكن كمان الصرف ده في مقابلو دفع المريخ الثمن غاليًا.
*نعم الانسان يخطئ ويصيب.
*يتعلم بي حقو.
*بس ما بى سمعة ومكانة المريخ.
*والخطأ ما عيب.
*ولكن العيب هو التمادي في الخطأ.
*تدهور الحال المريخي.
*مدرب أوصل اللاعبين مرحلة انعدام الانتماء وجعل النادي طاردًا.
*ينفرد بأي شئ.
*تفرد حتى في العقاب.
*ياخ معقولة تعاقب لاعب بالحرمان من التمارين؟
*طيب ده لما ترفع عقوبتك دي عنو.
*دحين مو دايرلو إعداد من أول جديد؟
*وطيلة فترة الحرمان ثم فترة إعادة التأهيل والإعداد وحتى فترة دخول اللاعب للفورمة.
*دي كلها النادي يخسرها شان شنو؟
*المعاقبين خليهم.
*الما معاقبين.
*لياقتهم وين؟؟؟
*ده كلو كوم.
*وهروب اللاعبين من النادي كوم.
*وده خليهو.
*كمان جابت ليها لاعبين ما راجعين.
*ماشين وجايين.
*ولاعب شال جوازو وقطع تذكرتو وشتت.
*ده شنو ده؟؟؟
*الزول ده قايل روحو البابا ونحنا الفاتيكان؟؟؟
*الحاصل من المدرب، ومن اللاعبين كرد فعل على سياسات المدرب.
*كوووولو مؤشر على ضعف الإدارة وضعف إرادة الإدارة.
*وننادي بدعم المجلس للخروج من عوج الدرب هذا.
*ودعم المجلس إطلاقًا لا يكون بالصمت على مثل هيك عيوب.
*هذا لا يعتبر دعمًا للمجلس، لكنه دعمٌ لعملية إفشال المجلس، إن كانت هناك مساحات للفشل لسة ما وصل ليها.
*هذا المجلس لكي يجد الدعم والمساندة من الجماهير.
*عليه بتصحيح الوضع سريع.
*واستعدال الدرب.
*على ما تبقى من الموسم أن يكون إعدادًا للموسم الإفريقي الجديد.
*الجمهور لا عداء له مع هذا المجلس.
*لذا لا يرفضه في حال عمل العليهو.
*واستعاد مكانة وكرامة وسمعة النادي.
*خلاف ذلك بالطبع لن يجد المجلس سندًا ومساندة ولو من داخله.
*جماعية الأداء قد ترفع عنا بعض الأذى.
*فنظرية الفول فولي لا تجدي في عصر المنهجية العلمية.
*أيها الناس.
*نتمنى لمجلسنا التوفيق في استعدال الدرب، الذي أسهم بشدة في عوجو.
*ووقتها.
*سيجدنا شاكرين ومقدرين لمساعيهم الحميدة.
*أيها الناس
*المدرب ده مفروض تختوها ليهو وتقولوا ليهو.
*لقيت المعاملة كيف؟
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*ضاقت وكل يوم تخنق فينا.
*لكن قول ليها يا والينا.
*موش حا نموت الله يخلينا.

سلك كهربا:
ننساك كيف والكلب قال اللوري كان ركب راس وعوج الدرب بتقلب.

والى لقاء.

سلك.