حيرتونا يا الكلفتونا

بابكر سلك

*بشوية اهتمام وعمل جاد.
*استطاع منتخبنا أن يحقق نجاحات عظيمة.
*والآن هو في طريقه للتأهل لنهائيات كأس العالم بإذن الله.
*طبعًا تتأهل لنهائيات “كان” و”شان”، ومنافس على التأهل لكأس العالم ده معناتو إنت ما هين.
*منتخبنا بقى كبير وماشي صاح.
*لكن هل في زول بصدق إنو منتخب بهذه الإنجازات، لا يملك وطنه ملعب واحد مؤهل؟؟؟
*معقولة بس بتصدر دهب بالعديل والكروب.
*وبتصدر إناث الماشية.
*وما قادر تعمل ليك ملعب يوافق المواصفات؟؟؟
*دي الحاجات البتجنن بوبي ذاتو.
*نحنا بلد كله تناقضات.
*والقصة دي مردها يا الفساد، يا عدم وضع الرجل المناسب على الكرسي المناسب.
*بنخت ناس سااااي مجاملة على مقاعد القيادة فيقعدوننا عن المواكبة.
*زولي وحبة بندولي.
*أهم عندنا من التأهيل والكفاءة.
*ياخ بلد جاريات فيها أكتر من 7 أنهار.
*سواء موسمية أو دائمة الجريان.
*وملاعبها عطشانة.
*وتبحث عن نجيل صناعي.
*حيرتونا يا الكلفتونا.
*طيب ليه ما عندنا استادات تفي بالمطلوبات؟
*الإجابة ببساطة استاد المريخ واستاد الهلال واستاد الخرطوم وجميع الاستادات الولائية.
*هي في حقيقتها موديلات وقفوا تصنيعها.
*بدري الكلام ده.
*من المطلوبات بوابات كافيه لإفراغ الاستاد من الجماهير في دقائق.
*حمامات تنتشر في جميع أنحاء الاستاد.
*مركز إعلامي بمواصفات.
*غرفة ڨار.
*غرف لاعبين وحكام بمواصفات محددة.
*إجراءات السلامة المطلوبة.
*مواصفات للسياج الفاصل بين الجمهور والملعب.
*شدة إضاءة معينة في حال اللعب ليلًا.
*لذا.
*نجد أنه من المستحيل تعديل استاداتنا القائمة الآن حتى تفي بالمطلوبات.
*حمامات بس ما في طريقة.
*و”فيفا” و”كاف” لا يقبلان عضة الجلابية والقبيل على الحيطة.
*يبقى الحل شنو؟
*الحل واضح.
*الحل في كفاءات تقود العمل الإداري.
*بوعي ومعرفة وتخطيط سليم، ونظرة ثاقبة لقراءة المستقبل ومتطلبات التطور والمواكبة.
*وراعي الضان في الخلا يعلم تمام العلم، أنه لا يوجد استاد في السودان يمكنه المواكبة والدخول للخدمة، خلاف المدينة الرياضية وملعب كريمة.
*وإنهما أي الاستادين يحتاجان مجهود كبير ليصلا مرحلة الإيفاء بالمطلوبات.
*ولكن إمكانية تأهيلهما واردة.
*فكان الأجدر تأهيلهما، مع الشروع في تشييد استاد يفي بالمطلوبات، ولو بعد تلتين سنة لى قدام.
*والخلا رااااااااقد في البلد.
*ريف أم درمان الشمالي على قفا من يشيل.
*يمكننا إقامة مدينة رياضية عليه بمساحة مية فدان.
*بمواصفات أولمبية وعالمية.
*سكن وفنادق وميادين تمارين ودور ترفيه وباركنات.
*طبعًا المدينة الرياضية مشكلتها الباركينج.
*كان عندها باركينج زي الباركنج.
*ولكن سوس الفساد أكله كله.
*ودا يمكن يكون السبب في عدم قبول المدينة الرياضية، كملعب مطابق للمواصفات.
*قلت ليكم.
*كلمتكم.
*أس البلاء في بلدنا هو الفساد.
*الفساد البجيب زولي لمنصب لا يستحقه.
*الفساد الذي يأتي بأناس يجغموننا نهارًا جهارًا.
*ولا يخافون.
*لا بخافوا الله.
*ولا بخافوا لومة لائم.
*لأنو كسير التلج والنفاق ما خلوا وسطنا لائم.
*الكل هائم على وجهه.
*جاري خلف لقمة عيش.
*يشتاق للآخرة.
*لأنو قنع من خيرًا هنا.
*وما تقولوا لي موضوع عدم مطابقة الملاعب للمواصفات ده عشان الحرب.
*الموضوع ده من قبل الحرب.
*ياخ يكفي إنو في الوقت البطالب فيهو الناس بتأهيل المدينة الرياضية.
*أجروها للدعم السريع.
*لكن بصراحة.
*جالكم كلام صلاح إدريس لمن قال يعمل استاد للهلال بصالحة؟؟؟
*بعدين الاستادات والمطارات والمصانع والمناطق العسكرية، بتكون بعيدة عن سكن المواطن وفي أطراف المدن.
*نحنا حقاتنا في نص الحلة.
*عادي.
*الموضوع ده طوييييل وحا نرجع ليهو.
*بس خلوا في ذاكرتكم.
*إنو الرياضة من وزارات المجاملة، التي يعطونها للناس في تسويات سياسية.
*لذلك تجئ قيادات العمل الرياضي شبيهة بوزارتها القاعدة ساي.
*وسنعود.
*أها.
*الخلا ولا الرفيق الفسل.
*هكذا كان لسان حال كنبة الاحتياط المريخية بالأمس.
*المريخ في مباراة رسمية.
*بدون احتياطي.
*زمااان لما كنا بنلعب في الروابط.
*فريق الحلة ما كان فيهو ضبط وربط.
*يوم الكورة نتلملم.
*نتم تمنية.
*سبعة يجروا على ميدان الرابطة.
*والتامن يحوم في الحلة يفتش باقي اللاعبين.
*السبعة يصلوا الميدان ويكون العدد قانوني.
*يماطلوا في الإجراءات عشان الكورة ما تبدا ونحنا ناقصين.
*وعيوننا جميعًا نحو الشارع البجوا بيهو البقية.
*نرى واحد.
*نؤشر له بالاستعجال وندون اسمه علر الكشف.
*الورقة فاضية خلا.
*ثم يظهر ثاني وثالث.
*وهكذا لما نكمل العدد.
*أحد عشر كوكبًا.
*وبالطبع نكون من الخاسرين.
*ما هذا يا مريخ؟؟؟
*فريق حله يا بلة؟
*معطونون في الفشل إلى هذا الحد؟؟؟
*الكنبة خلا؟
*والرفيق الفسل ولا هاميهو؟
*طبعا كلكم فهمتوا إنو الرفيق الفسل هو سوليناس.
*سوليناس يبرى ويستبرى.
*الرفيق الفسل هو هذا المجلس الذي كلما تناولناه بعقلانية.
*يزيدنا جنون.
*والله مهما كانت النتائج.
*ومهما كانت المرحلة.
*فإن الاستقالة أدب.
*على الأقل تعبر عن حب من يمارسها للكيان واحترامو ليهو.
*الفشل ما مشكلة.
*بس المشكلة ريدتك بقت هي المشكلة.
*أيها الناس.
*إن تنصروا الله ينصركم.
*أها.
*نجي لى شمارات والي الخرتوم.
*شفت يا والينا البقت فينا.
*حتى الكنبة خاوية على عروشها حزينة.
*والمأساة تطبطب فينا.
*الله يستر السكري ما يودينا.

سلك كهربا:
ننساك كيف والكلب قال تصدق يا إيداهور، كنبة المريخ خاوية علي عروشها!

وإلى لقاء.

سلك.