التمساح في حياتنا

بابكر سلك

*التمساح كائن نهري.
*مخلوق خطير شديد.
*تعاين ليهو في عيونو.
*ما بتلقى أي تعبير.
*لا بتفهمو فرحان.
*لا بتفهمو زعلان.
*ونحنا في السودان.
*مرات نشكِّرو.
*ومرات نسئ ليهو.
*لى أسي موقفنا من التمساح ما معروف.
*نوصف زول بالمرابطة والجاهزية للقتال.
*بالتمساح.
*تمساح الدميرة.
*ونغني ليهو.
*دلوكتنا فوق.
*التمساح التمساح.
*ولو ظهر في منطقة.
*زول بهوِّب ناحية النيل مافي.
*ونغني للتمساح العشاري.
*الحبس الدرب.
*وكان قال لينا اوووخ.
*نجدع الدلوكة والشتم.
*ويا روح ما بعدك روح.
*أها.
*لما نجي نَصِف زول بالسرقة.
*بنقول عليهو تمساح.
*حتى أذكر عندما شيدت مايو قاعة مجلس الشعب بموقعها الحالي قبالة النيل.
*الناس قالوا اختيار الموقع ده يتناسب تمامًا مع التماسيح الحا يدخلوا البرلمان.
*وقد كان.
*على مر الدهور والأجيال.
*اكتظت القاعة بتماسيح ما أنزل الله بها من سلطان.
*تماسيح أشكال وألوان.
*موديلات مختلفة.
*حتى الموديلات القديمة الوقّفو تصنيعها.
*جات ودخلت المولد ده.
*مولد وصاحبو “الشعب” غايب.
*وجلبغت تماسيح البرلمان في مياه البلد العذبة، حتى حولتها لبركة غير صالحة للاستعمال.
*يخطفوا.
*ويبلعوا جب وجب.
*ثم يستلقوا على الشاطئ.
*يفتحوا خشومهم الكريهة.
*ولا يهوٌّب نحوهم مخلوق.
*عدا الطير الذي ينظف لهم أسنانهم من بقايا ما التهموه.
*وللتمساح قصص كثيرة وحكاوي.
*حتى في التراث الشعبي نجده حاضرًا بي قدّومو الشين ده.
*شليل وين راح.
*ختفو التمساح.
*وتحضرني قصة طريفة عن التمساح.
*قالوا في الشمالية كان في زول اسمو حامد.
*ركزوا.
*حامد من الشمالية ما حماد من الدندر.
*أها حامد ده مشى البحر يزرع.
*بعد زرع قعد جمب البحر يتشطف.
*جا التمساح.
*كفففف أكل يدو وفات.
*أنقذوهو وودوهو البيت.
*وناس الحلة كسروا عليهو.
*فرادى وجماعات.
*يجي واحد داخل.
*يا حامد كفارة الحصل شنو؟
*والله مشيت أزرع.
*بعد زرعت مشيت أتشطف.
*وفجأة جا التمساح أكل يدي.
*وفجاة يدخل نفرين.
*حامد.
*الحاصل يا زول؟
*والله مشيت أزرع.
*بعد زرعت مشيت أتشطف.
*وفجأة جا التمساح أكل يدي.
*ويجي داخل رهط من ناس الحلة الورا.
*كفارة يا حامد.
*أحكيلنا.
*الحصل شنو؟
*والله مشيت أزرع
*بعد زرعت مشيت أتشطف
*وفجأة جا التمساح أكل يدي
*ناس حلة تحت جو بي لوري.
*حامد.
*من سمعنا خلينا الورانا والقدامنا ركبنا اللوري وجينا.
*أحكينا الحصل شنو.
*والله أنا مشيت أزرع
*بعد انتهيت مشيت أتشطف.
*واحد من الناس الورا شديد قال.
*من الأول يا حامد من الأول ما سمعنا كويس.
*أنا مشيت أزرع
*بعد انتهيت مشيت أتشطف
*بس فجاة جا التمساح.
*قلت شنو؟ جا منو؟
*جا التمساح أكل يدي أريتو كان أكلني كملني.
*الحمد لله حامد ما وصل لما وصل إليه حماد الدندر.
*برغم إنو الدرجة الوصلو ليها الاتنين واحد.
*وقصص التماسيح كتيييرة.
*واحد بتاع بحر.
*طبعا ناس البحر ديل ما بتحلى ليهم السيجارة إلا جمب البحر.
*عشان كدة سموهم ناس البحر.
*أها.
*بتاع البحر ده قاعد جمب البحر والدنيا حلوة والجو بمبي.
*فجاة طلع ليهو تمساح.
*عاين للتمساح كدة.
*وقال ليهو أنا كنت بحترمك.
*لكن من عرفت إنك بتبيض سقطتا من نظري.
*والآن نحن في بحر المريخ.
*تماسيح كتييييرة سقطت من نظرنا.
*لا بتطقع لا بتجيب الحُجّار.
*بس تبيض.
*أما التمساح سوليناس.
*الأكل أي شي.
*حتى كنبة الاحتياطي أكلها كملها.
*نحنا ذاتنا.
*أريتو كان أكلنا كملنا.
*نعيدها ونكررها.
*ولو التمساح ياكلنا يكملنا.
*نحن لا يهمنا من يدير المريخ.
*ولكن يهمنا جدًا كيف يُدار المريخ.
*إذا كيف دي توفرت.
*سنصبر حتى لو التمساح أكلنا.
*وأكيد ما حا يكملنا.
*لأنو إذا توافر الكيف.
*ستصبح أحلامنا واقعًا لا مجرد طيف.
*وعلى مجلسنا مراجعة النهج والمنهج.
*بالتأكيد سيجدنا على شاطئ البحر نزرع معه.
*ولو ظهرت التماسيح.
*أيها الناس.
*إن تنصروا الله ينصركم.
*أها.
*نجي لى شمارات والي الخرتوم.
*كان شفت يا والينا.
*في كل الظروف.
*التماسيح بتتربّص بينا.
*وفي تماسيح تجلبغ في الحرب يا والينا.
*وتمرق بي طينا.
*دايرة تعضينا.
*لكن موش حنموت الله يخلينا.

سلك كهربا:
ننساك كيف والكلب قال دموع التماسيخ خداااااعة أوعكم تتغشو.

وإلى لقاء.

سلك.