أبو لبانة

بابكر سلك

*ما تاكل لبانة قدام الشفع.
*بشيلوها ويلخبطوا بيها الدنيا كلها.
*الستائر.
*الملايات الفي السراير.
*وفي شفع كدة بلصقوا اللبانة في شعورهم.
*إلا تحلق ليهم صلعة حتى تمرق.
*وواحدين بلصقوها في أغلى تياب الأمهات.
*الشفع ديل صعبين خلاص.
*كان لقوا لبانة تاني ما بتمسكوا.
*بجوطوك بجوطوك.
*ويتخاتفوها.
*واحد ينخرط بيها من الآخرين.
*وواحد يجدعها لي واحد تاني فوق للباقين.
*وواحد يمضغها.
*تفتح خشمو ما تلقاها.
*تعاين تلقى التاني بضحك عليك لأنو الأول جدعها ليهو وأنت ما جايب خبر.
*وعشان يبعدك عن مكان اللبانة الحقيقي.
*عمل ليك روحو بمدغ.
*وأغرب شافع.
*الشافع البشيل اللبانة ويسوقك بالخلا.
*يرجع بيك الحضر.
*تاني يسوقك بالخلا.
*وينخرط.
*ثم ينفرط.
*ويمضغها من جديد.
*يمضغها شدييييد.
*وحلاوة اللبانة لما تطق.
*طق بفتح الطاء.
*طق بكسر الطاء.
*طوق بضم الطاء.
*شكِّل الطاء زي ما داير
*وشوف الإيقاع ده حلو كيف.
*طَق طِق طوق طيق طاق.
*ديل كم طقة؟؟؟
*خمسة؟
*الطق على السلم الخماسي.
*رقيص حبش بس.
*شي بالكتافين.
*وشي بالرقبة.
*وشي بالعتبة.
*وشي بكل شي.
*وتترقط.
*زي خجة فتيل دواء الكحة.
*الشفع خطرين شديد.
*بالذات إذا شافوا لبانة.
*عشان كدة غلطت أنشيلوتي كانت لبانتو الفي قدّومو دي.
*ما كان في داعي يوريها للشفع.
*أها خطفوها.
*وبشتنوا بيها الواطة كلها.
*أيها الناس.
*لما نتحدث عن بناء.
*يا هو ده البناء.
*فريق بتلك المهارات.
*بذلك الأداء الاحترافي.
*بذلك الأداء الخرافي.
*ومتوسط الأعمار فيه يقريك أساس.
*يعني الشفع ديل حا يلعبوا تاني ما لا يقل عن 10 سنوات، بهذا النشاط وبتلك الحرفية والمهارة
*ليه؟
*لأنو البناء كان صحيحًا.
*كان من الساس تحت.
*من القواعد.
*لذا.
*ولكل ذلك.
*إن كان نادينا يستطيع أن يدير مراحله السنية بهذه الكفاءة والقناعة والنجاعة.
*وكان جمهورنا يستطيع مع ذلك صبرًا.
*مرحب بالبناء وتجدنا إن شاء الله من الصابرين.
*غير كدة.
*علوق الشدة بس.
*وتجدنا إن شاء الله مع الخائضين.
*أيها الناس.
*مباراة البارسا والريال.
*لم تكن مباراة في كرة القدم.
*ولكنها كانت محاضرة في إدارة شؤون كرة القدم باحترافية.
*فهل سنصل بمستوانا إلى لاليغا؟؟؟
*ولا حا نظل في الليق الليق يا عواليق؟؟؟
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت يا والينا.
*نعي تمامًا بعد الحرب الفينا.
*الدور المنوط بينا.
*إعادة بناء حقيقي يا أخينا.
*نستوعب فيهو كل السواعد اللينا.
*بدون إقصاء لأحد يا والينا.

سلك كهربا:
ننساك كيف والكلب قال قدام الشفع ما تاكل لبانة، بختفوها ويجهجهوك.

والي لقاء.

سلك.