كملت المعدودة
بابكر سلك
*بالأمس شاهدنا المراسم.
*مراسم دفن كل الأحلام.
*حتى الأوهام.
*كنا نمني النفس.
*لعل الانعاش ينجح في ضخ الأوكسجين داخل رئة تليفت وتلفت.
*أمنياتنا لم يسندها منطق.
*ولكن كان خلفها حب كبير.
*كل الحب.
*لكن يبدو أن المعدودة كملت.
*التابع المباراة أمس.
*أكيد حا يصل لحقيقة واحدة.
*كملت المعدودة.
*لا لياقة.
*لا لباقة.
*ولا بلاغة.
*فريق تتمنى الأندية ملاقاته لتحسن من وضعها في روليت الدوري.
*فريق ما بحس ولا بشعر.
*ولا بهمو يدخل فيهو قون.
*يتغلب مية.
*يتمسح تاريخو العريض.
*ما بهمو.
*فريق زي لمة الموظفين في دافوري بملعب خماسيات يوم الخميس.
*فريق معاش.
*برغم أن من يصل رتبة فريق ما بقولوا عليهو معاش إذا أُحيل.
*بل يحال بكل مخصصاته.
*إلا الفريق ده.
*أول فريق ينال لقب معاش.
*معقولة من بداية الموسم وحتى الآن البنشوف فيهو ده المريخ؟؟؟
*وبكل بساطة نتحدث عن البناء.
*نبني وين؟
*نحنا بعنا الأرض الممكن نبني عليها.
*حا نبني كيف ووين؟؟؟
*إذا دايرين نبني حقيقي.
*نرجع الأرض البعناها.
*مهما كلف الأمر.
*والليبيين ما برفضوا.
*نعيد ونستعيد كل الأراضي المباعة.
*وبعد داك نخطط للبناء.
*لكن الشايفو أسي ده.
*ده لعب ساي.
*بناء المكعبات بتاع الشفع داك.
*كلووو تركيب.
*أو قطاطي الرمل الهشة.
*الحال وصل لدرجة أن يشفق علينا من كان يناكف فينا.
*ونتوعد ونتحلف.
*نشطب نبيع نوقف.
*تشطب منو؟
*هو في زول في الكشف مستواهو ما بشطبو؟
*تبيع منو؟؟؟
*هو فضل زول فيهو رقشة ما اتباع؟؟؟
*وتوقف منو؟
*ما كلهم موقوفين.
*وجوة الملعب واقفين.
*بتفرجوا زينا.
*ولا نقول إلا ما يرضي الله.
*إنا لله وإنا إليه راجعون.
*أهل المريخ.
*البركة فيكم وفينا.
*الفقد واحد.
*لكن بالطبع الأثر ما واحد.
*فنحن الذين يشعل فينا الرحيل كل مساحات الحزن.
*ويفجر من أعيننا الدمعات سخينة.
*ولا حول ولا قوة إلا بالله.
*قرطوا على كدة.
*لتبقى السيرة.
*عبر التاريخ.
*وتبقى الكرامة مقبل الأيام.
*ولا حول ولا قوة إلا بالله.
*أيها الناس.
*أنسوا.
*فهذه الدنيا للنسيان.
*أيها الناس.
*إن تنصروا الله ينصركم.
*أها.
*نجي لى شمارات والي الخرتوم.
*كان شفت يا والينا.
*ما في حل لينا.
*لو كملت المعدودة لينا.
*كلو فان يا والينا.
سلك كهربا:
ننساك كيف والكلب قال لو اقتنعتوا إنو ده المريخ أنا بقتنع وأبطل نبيح وأهز ضنبي.
وإلى لقاء.
سلك.
