مأمون أبو شيبة الـ”VAR”

بابكر سلك

*ماممكن تتصوروا مدي سعادتي وأنا أشاهد صورة للقامة مأمون أبو شيبة مع مجموعة من الشفوت بالقاهرة
*مأمون رجل فقير إلى الله
*عمره ماكان ساعي ورا مصلحة مادية
*ولو سعي لظفر
*لأن المصالح المادية كانت تأتيه منقادة إليه تراوضه
*وكان يقول لها إني أخاف الله رب العالمين
*لذا عاش فقيرًا ولكنه أغنى الأغنياء تقوى وأكثرهم ثقة بالله وأكبرهم قناعة
*مأمون أبو شيبة استاذي
*أتشرف بذلك
*عشق المريخ دون من ولا رياء
*رجل لا يشبه النسمة
*ولكنها تشبهه
*مهندس جيولوجي قبل كل شئ
*وعايش قدر حالو في بلد يخرج الذهب من باطن أرضها ليخبر الأجهزة إني هنا
*إنها القناعة وشراء الآخرة بالدنيا الفانية
*رجل عشق المريخ بصدق
*عنده شاخور وحسين حله واااااحد
*لم يتملق ولم يتسلق
*مارس عشقه بكل نبل
*لذا احترمناه كثيرًا
*في أمة المريخ لا أدري سبب ربطي بين مامون أبو شيبة ودكتور جار النبي
*تحسهما شخصية واحدة
*في النقاء والانتماء والتواضع
*فكلما جال بخاطري أبو شيبة
*يصول بخاطري جار النبي النقي
*وكلما طاف بالخاطر جار النبي
*جال بالفؤاد أبو شيبة
*مأمون رجل محب بشدة ودقيق بحدة
*أول من راقب أخطاء الحكام المقصودة والغير مقصودة
*كثيرًا كان يفضحها
*اشتغل (VAR) قبل ظهور الفار ذاتو
* له الكثير من المواقف والطرائف
*سأحكي لكم إحدى طرائفه
*قبل حين من الزمان كنت بدائرة مناشط المريخ
*دوري السلة كان شغال
*وكان عندنا مباراة هامة ضد الهلال
*مشيت لمأمون وطلبت منو يحضر المباراة
*أولًا لأن في ذلك دعم معنوي كبير للاعبي المريخ
*وثانيًا هي رسالة للإعلام الرياضي أن يهتم بالمناشط الأخرى غير كرة القدم
*رفض مأمون
*وقال لي سمعت أنو الهلال متصدر والمريخ فريقو كعب
*وأنا مابقدر اتحمل مريخ مغلوب داخل الاستاد
*قلت ليهو نحنا اعدينا الفريق كويس وحانغلب الهلال
*أخيرًا اقتنع ومشي معاي مجمع طلعت فريد
*صافح لاعبي المريخ
*وجلس علي المكان المعد لكبار الضيوف
*قعدت جمبو
*قال لي أول يوم في حياتي أشاهد مباراة كرة سلة
*قلت له وشك حايكون حلو علينا
*وشرحت له الخطوط العريضة من قوانين اللعبة
*وبدأ القيم
*مريخ نار منقد
*إبداع وإمتاع
*خلال العشرة دقائق الأولى النتيجة كانت اتنين وعشرين للمريخ مقابل اتنين للهلال
*الدهشة الجمت الجميع
*حتي لاعبي الهلال
*وازداد تفاعل وإنفعال مأمون
*فاول ياحكم
*( RUNNING)
*ياحكم
*بالغت
*احتج على كل الحالات التحكيمية المشكوك فيها
*هطلت الامطار فجأة
*وتوقف اللعب
*مأمون قال لي البحصل شنو؟
*قلت له إذا الملعب اتملى مياه بتتأجل الكورة
*قال لي المريخ غالب اتنين وعشرين تتلغي كيف
*وقفت المطرة
*أصر لاعبو الهلال علي عدم اللعب لأن الملعب مبتل
*نزل مأمون الملعب وجاب خيشة نشف بيها الملعب كلو
*وهو بردد الميدان ناشف ياحكم مافي داعي تلغيها
*وفعلا اتلعب القيم وفاز المريخ
*ده مأمون المحب المخلص
*نسي أنه مهندس وأنه صحفي وتذكر فقط أنه مريخابي فمسح الملعب كي يحافظ علي نصر المريخ في منشط أول يوم يشاهدو
*شفتو عظمة هذا الرجل وإخلاصه
*تحية كبيرة لمأمون أبي شيبة
*وتحية لشبيهه في الإخلاص والعين المليانة دكتور جار النبي
*وأناشد الفار
*عد لينا ياليل الفرح
*مكان قلمك شاغر والعيون تشتاق لحروفك الجميلة
*أيها الناس
*إن تنصروا الله ينصركم
*أها
*نجي لي شمارات والي الخرطوم
*كان شفت يا والينا
*سؤال بحير فينا
*الحصة وطن
*ولا الوطن حصة يا والينا؟؟؟
سلك كهربا
ننساك كيف والكلب قال إجابة السؤال الفوق ده بتحدد حاجات كتيييييرة
وإلى لقاء
سلك