حواش يجمعنا!

بابكر سلك

* كل زول في الحرب دي عندو دور إيجابي لصالح الوطن

* أي زول جاب العندو والقدر عليه لأجل الوطن

* مشهد، إذا تخيلته، سيدهشك

* زي برش فطور رمضان

* العندو شية بجيبها

* والعندو بليلة ما بعيبها

* المهم لمة الفطور ومشاركة الناس واشتراكهم فيما توفر من طيبات

* حتى الذين يتخذون مواقف غير مفهومة

* نصفي النية ونعتقد أنهم يعتقدون بحسن نية أنهم يقدمون مواقفهم للوطن ولأجله

* البجيب الشيرنق موية زرقاء لبرش فطور رمضان

* لا نؤاخذه، لأننا نقتنع أنه كل ما يملك

* عيب الزاد ولا عيب سيدو؟

* المهم

* حتى في دول المهجر

* كان نصيب من لجأ منا في برش إفطار البلد مقدرًا وكبيرًا

* منهم من ساعد الناس ماديًا ومباشرة

* ومنهم من قاد مبادرات إنسانية في أشكال مختلفة

* اختلفت أشكال دعم الوطن

* ولكنها في الآخر جميعها دعومات

* المهم

” تخوف البعض من تأثير الثقافات الأخرى على اللاجئين

* وتأثر اللاجئين بتلك الثقافات يفقدنا الهوية

* بالذات فيما يتعلق بالنشء

* ولكنهم نسوا أننا شعب يؤثر ولا يتأثر

* وهاهم إخوتنا المصريون يأكلون الرغيف السوداني، وحتى الكسرة أصبحوا من روادها

* وفيهم من أصبح يسف الصعود

* ويشنق السفة كمان

* ويغنوا: الليلة بالليل نمشي شارع النيل

* نحن قوم نؤثر ولا نتأثر

* تتذكروا قصة العوض ود العمدة؟

* القصة البتقول العمدة عايز يطور ولدو

* قال يعلمو إنجليزي

* جاب ليهو خواجة عشان يعلمو الإنجليزي

* وقفلهم في الديوان

* الكورس كان مدتو تلاتة شهور

* الأكل ده بودوهو ليهم جوا

* بعد التلاتة شهور طلعوهم

* العمدة قال للعوض: “اتعلمت الإنجليزي يا العوض؟”

* نط الخواجة وقال للعمدة

* “التنقليزي مو نافع يا عمدة

* اتحرّانا حدا الحواشة بندور نزرع”

* انتهى الكورس بتأثير العوض على الخواجة

* الخواجة بقى زول تقلية سااااي!

* نحنا كدة

* لذلك ما كان في خوف من التأثير الثقافي على ناسنا النزحوا خارج البلاد

* المهم

* كل زول قايم بالبقدر يقدمو للوطن أثناء الحرب

* قرية حواش

* منتجع أو قل نادي أو خيمة كبييييرة

* استأجرها أخونا مرسي

* لا ليحقق أرباحًا

* ولكن ليقدم من خلالها ثقافتنا وأخلاقنا وسلوكنا

* ليمسح صورة مهزوزة رسمها بعضنا ممن يقدمون السقوط على أنه فن

* حواش نادي سوداني شعبي

* أصبح قبلة للمثقفين والفنانين

* بل مكانًا تُقام به الأفراح السودانية بأقل التكاليف

* ومنبرًا يعبر عنّا

* يحارب القبح بالجمال

* منتديات محترمة تُقام بحواش

* مبادرات إنسانية يؤمها حواش

* المهم

* التقيت في حواش بالقامة التيجاني حاج موسى

* الرجل الرائع النافذ للقلوب

* أجريت معه حوارًا مطولًا

* الرجل قدم من خلال الحوار محاضرة

* موعدكم معه على قناة موقع الصفوة

* وتتوالى الحوارات واللقاءات من حواش مع قادة الآداب والفنون والرياضة ورموز المجتمع

* ابقوا معنا

* اها

* بعد بكرة أول تجربة رسمية لميتشو

* وإن كان الرجل لم يأخذ الوقت الكافي

* إلا أني أتوقع تغييرًا إيجابيًا ولو طفيفًا على شكل المريخ

* ونتذكر أن المرحلة ليست مرحلة تقييم الكوتش ولا الجدد

* ولكنها خطوة أولى في درب الإصلاح

* أيها الناس

* إن تنصروا الله ينصركم

* اها

* نجي لي شمارات والي الخرطوم

* كان شفت يا والينا

* قناعة أكيدة لدينا

* الشعوب يقودها فنانوها يا والينا

* كلم السياسيين يزحوا لينا

* واهتموا بينا يا والينا

* فالفن يحارب القبح بالجمال يا أخينا

سلك كهربا
ننساك كيف؟! والكلب قال: القيم الجميلة تغرسها في المجتمع الفنون والثقافة.
اهتموا بينا وزحوا لينا.

وإلى لقاء