من حوش حواش

التجاني حاج موسي يوقع عبر “الصّفوة” في بوح خاص :

*الثقافة يجب ان تقود البلد

*الجيش السوداني هزم تكنولوجيا التسليح بالاستنفار .

*طيور السلم يجب ان ترفرف باجنحتها في سماء الوطن

التكية _ بابكر سلك

حوش حواش هو منتجع بالقاهرة اللبيني فيصل عبارة عن ناد سوداني شعبي
يعتبر تكية ثقافية يتناول الناس منها مايسد رمق الفنون فيهم من شعر وغناء ومسرح ومساحات ثقافية للاطفال يجترون منها ذكري الثقافة السودانية والاخلاق القيافة
مساحة تعرض وتستعرض الادب السوداني والفن الحقيقي علي الاقل لمحو الصورة المقلوبة التي عكسنها بعض من يطلقن علي انفسهن فنانات فشرخن عفة الغناء السوداني ووقار الكلمات وادب اللحن
في تكية حواش التقينا بقامات سامقات من قادة المجتمع ثقافيا وفنيا واجتماعيا
فكانوا جميعا حضورا بمنتديات حواش يحولون الاسي والحزن لثقة بالله والوطن ويقدمون روشته علاجية لخلل اصاب النفوس الطاهرة جراء حرب فرضت نفسها علي شعب السلام عنده بداية الكلام دائما والبسمة عنده صدقة يقدمها لكل من يلتقيه
باكر احلي كان عنوانا لكل الفعاليات الثقافية والاجتماعية بحوش حواش ومنتدياته
مرسي نايل
هو الرجل الذي استثمر في حوش حواش دون ان يقصد ربحا ماديا
فقد كان استثماره يهدف فقط لتحقيق ربحية نفسية تحافظ علي الشخصية السودانية بوصفنا شعب يؤثر ولا يتأثر
قصدنا بمنتدي الصفوة ان ننشر التجربة علي الجميع لنستصحبهم معنا شركاءا في الق المكان والمعني
اول لقاءاتنا كانت مع الجميل النبيل الفنان القامة المتواضع الاستاذ التيجاني الحاج موسي
استاذ التيجاني نشرع لك صدورنا بموقع الصفوة ونحن بحضرتك ننهل منك عذوبة
التيجاني: مرحب كتيير بموقع الصفوة الالكتروني وسعيد جدا ان اكون بين الرياضيين مسامرا لا مجاملا محبا محبوبا متمنيا ان يكون لقاءنا القادم من قلب ام درمان حيث الامان والجمال لنعاود مسيرة الجمال من جديد اكثر جمالا

س/لماذا التكالب علي هذا الوطن؟

ج/هو تكالب نصاح؟ ده تكالب وتآمر دولي كبير من دول كبري تدفعها الدولة الآحادية امريكا ومن خلفها المشروع الصهيوني الكبير وعلمناان الحرب القادمة هي حرب المياه والطعام وادركنا ان مخزون المياه والطعام متوفر لدينا بهذه الارض التي لم نعرف قيمتها بالمعني المفهوم

س/ولماذا لم نعرف قيمة ارضنا بالمعني المفهوم؟

ج/يعود ذلك لحكامنا السابقين الذين حكموا لاكثر من نصف قرن لم يستثمروا ولم يضعوا خططا استراتيجية فطلت الحياة السياسة تتأرجح بين انقلابات عسكرية الي حكومات يسمونها احيانا ديمقراطية وهي ليست كذلك
جميع الحكام كان يتكالب حول فتات من قيمة هذه الارض
لم ندرك ان الله اعطانا اعلي نسبة من الثروة الحيوانية لم نستثمرها الاستثمار الامثل واعطانا ثروة من النفط لم نستغل منه الا خمسة في المية واعطانا الذهب الذي يلتقطه ابنائنا من علي سطح الارض دون الحوجة لحفر مناجم.

س/تريد ان تقول اننا فشلنا سياسيا لذا تجدنا هاهنا قاعدون؟

ج/تأكد لنا جليا مع فائق الاحترام ان السياسي لايخدم قضية الوطن.. جميعهم
وهم اي السياسيون قد تواروا جميعا في هذه المحنة المتمثلة في الحرب فلم نشهد منهم احد بل شهدنا بعضهم قد رهن سودانويته للغير وللدعم السريع الذي اوجده النظام السابق الذي ماكان عليه ان ينشئ جيشا موازيا للجيش القومي.

س/أستاذ التيجاني برغم بشاعة الحرب التي تدور علي ارضنا الا ان البعض يقول بانها حرب ايجابياتها كثيرة.. ماقولك؟

ج/نعم هناك ايجابيات كثيرة منها اننا انتبهنا لضرورة ان يكون لدينا جيش سوداني واحد وقومي وكذلك انتبهنا الي ان الجيش السوداني يمتاز بميزات منذ ان كان قوة دفاع السودان وانتبهنا الي ان الجيش السوداني يمتاز بميزة تفوقت علي تكنلوجيا العصر واختراعات السلاح؛ فالاستنفار الذي مارسه السودانيون بمختلف ايدلوجياتهم كان درسا للعالم يؤكد قول استاذنا الراحل المقيم سيف الدين الدسوقي:

نحنا قلب الدنيا ديا ونحنا عز الدنيا بينا
وزي ماقال في موضع آخر
اعز مكان وطني السودان
وكما قال استاذنا خليل فرح
نحنا ونحنا الشرف الباذخ
ودابي الكر شباب النيل

س/وفي هذا المقام ماذا قلت انت يا استاذي؟

ج/انا قلت
بلدنا دي والله فيها الخير كتير ومامستحيل
نبنيها جنة لو نحنا وحدنا الهدف لو نحنا وحدنا المصير
لو مابنعاكس نحنا في الدرب الطويل
كان من زمان كيفن عرفنا
نكسيها في الاتواب حرير
وبلدنا دي اولادها حقو يقدروها
وشوية حقو يحسوا بيها
وشوية حقو يوقروها
ومسكينة شوف كيف اهملوها
بلدان كتيرة اتقدمت
وبلدنا دي اتأخرت
اولادها هم الاخروها
عشان كدة يا سلك نحنا بنحلم لما نرجع نقول
بلدنا دي اتقدمت
اولادها هم القدموها
وبرضو دايرين نقول
مين احن علينا منك يا وطنا
غبنا عنك بالسنين
وذبنا من فرط الحنين
واصلو غيرك ماشغلنا
مين احن علينا منك يا وطنا
ومروا بي كل المواسم
كنت بشعر بالصقيع
والدفو الفي حضنك انت
كان مع الغربة بيضيع
ودايرة ايامي في رتابة
وكاسية ايامي الكآبة
والملامح العندي منك
في خطابات الاحبة
وفي الجوابات وفي الكتابة
وفي دعا الوالدة الحنينة
وامنياتها المستجابة
وذكرياتكم يا اهلنا
ومين احن علينا منك يا وطنا
وبرضو بقول للوطن
اطرد النوم من عيونك
ماخلاص طلع الصباح
وخلي بالك للبخونك
يلا هيا علي الفلاح
وابدا اول خطوة امشي
الطريق لسه طويل
ولسة قدامك مسافة
الف فرسخ والف ميل
وانت ياسودان قيافة
فيك تراب راويهو نيل
وانت ياسودان ثقافة
من زمن دقنة وخليل
نادي اولادك واصرخ
غربتهم طالت سنين
وافتح احضانك وافرح
وامهم بس بي حنين
واوعه تطلع كلمة تجرح
وتاني نرجع للأنين
والزمن يسرقنا يسرح
وتاني يسلبنا اليقين
وخلي بالك للمدارس
خلي بالك حصة حصة
وللكراريس ابقي دارس
والدرس نقراهو هسه
وللفصول خليك حارص
ماتضيع فيها قشة
وللتلاميذ ابقي حارس
هم طينة ولسة هشة
والصبر هد الجبال
وانت صبرك ما اعتيادي
وخلي ضرعاتك طوال
توصل القري والبوادي
ولمهم لمة رجال
وطوف بلاد الدنيا نادي
وعلمهم كيف النضال
وافتخر قول ديل ولادي
وافتخر قول ديل بناتي

***ياسلام يا أستاذنا
هذه القصيدة عبارة عن خارطة طريق للوطن تمثل خططا آنية وقصيرة المدي وطويلة المدي
انها منهاج لنبذ الفرقة وقبول بعضنا واحترام كينونة الآخر بعدم التجريح
وفيها حث علي الاهتمام بالتعليم والتربية لتنمية الموارد البشرية حتي تتأهل للاستفادة من الموارد الطبيعية التي حبانا بها الله
عشان كدة يا استاذ التيجاني تجدني من انصار مقولة ان الشعوب يقودها فنانوها ومثقفوها لانهم يحاربون القبح بالجمال
س/استاذ التيجاني الشاعر لايكتفي بقصيدة عن الوطن؛ نجده دائما يكتب عن الوطن والبلد بحيث تمثل البلد له الملهمة الاولي
قلت شنو عن البلد؟

ج/قلت للبلد
ياجمالك يابلادي
جيت اغنيليك نشيد
ما خلاص نادي المنادي
بتولد سودان جديد
لو عذابك طال كتير
وبالسنين مستحملاهو
وضقتي ويلات السعير
وشفتي من الويل شقاهو
الشروق ساطع منير
والارض مستنياهو
ويبقي كل الجاي خير
يمسح القبلو ووراهو
وانت ياشعبي الجميل
فيك ملامح مابتزول
انت من اصلك اصيل
خاتي كلمة وخاتي قول
وانت يا الدغري وعديل
وانت يا العرف الاصول
يشهد التاريخ قبيل
فيهو مثلت الاصول
ونحنا لو كان يوم سهينا
مرة في عمر الزمان
نحنا عهدك مانسينا
ولما حان يوم الاوان
جينا من غربتنا جينا
وتاني من نفس المكان
اتحدنا واجتمعنا وابتدينا
ننفض الذل والهوان
وابدا افرح بيك واغازل
يا وطن بالعزة ماثل
وافتخر بيك في المحافل
وازرعك ورد وسنابل
يا وطن عارفك مناضل
والبخونك يبقي هازل
يبقي مكتول وابقي كاتل
وانظم الافراح نشيد
ماخلاص نادي المنادي
اتولد سودان جديد

س/استاذ التيجاني انت دايما بتقول الثقافة تقود الحياة.. هل لازلت عند رأيك؟

ج/شوف انا مابغير عبارتي دي نهائي وزي ما انت ياسلك قلت قبيل الشعوب يقودها فنانوها ومثقفوها
لانو الفنون والثقافة هم في حقيقتهم منهاج تربوي سلوكي يعالج كل عيوب المجتمع ويزرع الجمال بدلا عن تلك العيوب ويشتل معاني الانسانية وحب الوطن ويحث الناس علي التسابق لمرافئ الجمال ويشرح لهم جلال الوطن
ومرحلة مابعد الحرب هي مرحلة الثقافة والفنون

س/آخر كتاباتك يا استاذ

ج/آخر كتاباتي طيور السلم
وبقول فيها
طيور السلم قد نادي المنادي
فعم البشر ارجاء البلاد
فغني لحنك الصداح غني
يردد رجعه خفق الفؤاد
وغني ياطيور السلم غني
لارض فجرت خيرا وفيرا
كنوزا مترعات بالعطايا
تفيئ جنانها ثمرا نضيرا
وتسقيها روافد من مياه
وتهطل سحبها عذبا نميرا
وذاك النيل بالخيرات يحنو
ويغدق من مكارمه الكثيرا
طيور السلم فالتمضي جنوبا
محملة بحبي للكرام
وطوفي عبر دار الغرب طوفي
وعودي بالمحبة والوئام
ورفي فوق ارض الشرق رفي
باجنحة تصفق للسلام
هناك شمالنا يلقاك حبا
تمازجه البشاشة في الكلام
وتلك سفينة السودان سارت
ترود المجد في البحر الخضم
وتمضي اينما حلت حثيثا
تروم مرافئ العز الاشم
وتصنع للحياة غدا جديدا
ملامحه تجسد كل حلمي
قوام عطائها الق مضئ
محا ظلمات ليل مدلهم
وعن انسابنا انبيك امرا
افارقة تمازجهم عروبة
وعن احسابنا انبيك عقدا
نضيضا من هدندوة ونوبة
ودينكا ثم برقو ثم داجو
نؤكد مجد سنار وسوبا
ونعلم من كتاب الله علما
يحيل حياتنا ابدا عذوبة
طيور السلم قد نادي المنادي
فعم البشر ارجاء البلاد
فغني لحنك الصداح غني
يردد رجعه خفق الفؤاد
**
أستاذ التيجاني الحديث معك لاينتهي ولكن خلينا نقيف هنا علي امل اللقاء بك مجددا في مساحات اوسع
كلمة اخيرة استاذ التيجاني

ج/داير أقول للسياسيين كفاية قريب سبعين سنة انتوا شغالين.. خلونا نحنا ناس الثقافة ديل نشتغل ونتكلم نوع كلامنا ده الببني اللإنسان السوداني لأنو إذا بنيت الانسان بقيم الخير والقيم البتوري قيمة البلد ماحايكون في سياسي حرامي ولا نافذ مختلس وأي زول حايشوف شغلو وأتمني من الله أن يستجيب لدعوات أهل السودان بعد صبرهم علي الابتلاء وانا متفائل كثيرا بان القادم أفضل لأبناءنا.
شكرا موقع الصفوة علي الاستضافة في تكية حوش حواش وشكرا كثيرا لتكية حواش التي استضافتنا بكرم فياض

***استاذ التيجاني شكرا ليك ونتمني ان نري الثقافة تقود البلد في المرحلة الجديدة لنحارب القبح بالجمال