بابكر سلك
“ممكن نكون فنيًا كعبين”
“ما جاهزين”
“من التمهيدي طوالي طايرين”
“نفشل في انتداب المحترفين”
“فنلجأ لي أبو تلاتة بي الألف”
“يجلوها واقفة”
“أو يسكنوا الكنبة”
“عنكبوت بس”
“وممكن يكون أستادنا شين وما جاهز”
“وغير مواكب”
“وممكن تكون هدومنا دي يُرثى لها وشينة”
“أخضر بي أحمر”
“بطيخة بس”
“ممكن نحارب الديمقراطية في نادينا”
“ونلتف عليها”
“ونعقد جمعيات وهمية”
“بعضويات مستجلبة”
“بعضها نشتريهو”
“وبعضها نسوقو بالخلا”
“ممكن”
“وممكن بعضنا يسمسر في اللاعبين عاااادي”
“النادي يتضرر ما مشكلة”
“لكن ممكن”
“وممكن يكون عندنا ستة أنظمة أساسية وما نتبع ولا سطر فيها”
“عاااادي”
“ممكن”
“وممكن نبقى شعب كل حكومة”
“طالما كل حكومة تجي نادينا وتقعد فوق نفسنا، ده ما بتوقف مصالحنا المن أجلها التفينا حول نادينا”
“وممكن نسيس الرياضة”
“عادي”
“بحصل شنو يعني”
“وممكن ندخل ونأمر الطرف التالت ونخرج الطرف الأول ونحرج الطرف التاني”
“عادي”
“وممكن حاجات كتيرة زي دي تحصل”
“ونقبلها”
“ونتقبلها”
“لقناعتنا إنو في الآخر لا يصح إلا الصحيح”
“نجيب محترفين على مستوى”
“نجهز أستادنا بما يطابق المواصفات”
“نكرش العضوية المستجلبة”
“نحارب السماسرة”
“نطرد الجماجرة”
“ممكن نصلح أي شي”
“لكن الأمر لما يوصلنا لدرجة نبقى جحا”
“دي كتيرة”
“وجحا قالوا يطلق الكذبة وبعد شوية يصدقها”
“مرة جحا قاعد خاتي ليهو كرسي في خشم بابو وبتفرج في الشارع”
“طلعت في راسو كذبة”
“أي زول يجي ماشي بالشارع، جحا يقول ليهو في حفلة في الشارع التاني”
“انتشرت الكذبة وحداث حدث حداث”
“جحا شاف الناس كلها ماشه الشارع التاني”
“دخل كرسيهو وتبعهم”
“قال يمكن جد جد في حفلة في الشارع التاني”
“دي مشكلة جحا”
“نحنا مشكلتنا أكبر من حقت جحا”
“كذبة جحا فيها معقولية واحتمالية الحدوث”
“ممكن عادي تكون في حفلة في الشارع التاني”
“لكن لو جحا قال في (أمبعلو) في الشارع التاني”
“أكيد الناس كان قالوا جحا ده يا كضاب يا ساذج”
“أمبعلو شنو والحرب بقت بالمسيرات؟”
“أها نحنا قلنا في أمبعلو في الدوري المصري”
“المريخ يشارك في الدوري المصري”
“أمبعلو عديل كده”
“طيب كيف؟”
“آل إيه”
“المريخ السوداني حيشارك في الدوري المصري”
“طب إزااااي؟”
“آلك إيه… أصل شوئي أريب (شوقي غريب) صدئ (صديق) هاني أبو ريدة”
“عليكم الله ده ما أمبعلو والغول والبعاتي والسحّار ذاتو؟؟؟؟؟”
“يعني عشان شوقي غريب صاحب أبو ريدة طوالي يسمح لينا المصريين نشارك في الدوري المصري؟”
“استهتارًا بينا قال شوبير في لقاء”
“طب ما هو أنا صاحب هاني أبو ريدة وعندي فريق حلو أوي برواندا أجيبو يلعب بالدوري المصري؟؟؟؟”
“استهجان في محلو”
“قال (أمبعلو) قال”
“والاتحاد المصري نفى الخبر ونفى إمكانية وجود أمبعلو بالدوري المصري… أقصد بالشارع التاني”
“قصة أمبعولو دي من القصص الما بتتعالج وما بتتنسى”
“يا جحا”
“جاتك نيلة جبتلنا الكلام”
“أيها الناس”
“إن تنصروا الله ينصركم”
“أها”
“نجي لي شمارات والي الخرطوم”
“كان شفت يا والينا”
“عدم الوعي الفينا”
“تاني عاد سيرة أمبعلو لينا”
“نتين نكبر؟ متين نوعى؟ متين نشغل العقل الفينا؟”
سلك كهربا
“ننساك كيف والكلب قال أمبعلو والبعاتي والحمار البتكلم وأبو القنفت أبو مليون ومكوة الديك وحواء أم ضنب، كلها حكايات تنشّط الخرافة فيكم وتسوقكم بالخلا… والخلا أبو علف عند البهايم أخير من رفيق الوعي الفسل الما بجيب العلف”
وإلى لقاء
سلك
