نجوم ونجوم ونجوم!!

محمد الطيب كبّور

طولنا من التريقة كنا مشغولين ومنشغلين ما قادرين نتريق ما كان عندنا نجوم صف أول وحالنا كان بائس ولكن أمس القريبة دي المريخ كله بقي نجوم، من العصر كثرت نجوم كل اسم في لجنة التسيير نجم ونجم كبير كمان وواحدين بعد ما هم نجوم كتوفهم كمان مليانة نجوم يعني نجوم شايلة نجوم.

رئيس تقيل شديد نجم كبير في دنيا المال والأعمال والنواب الصلاة على النبي جنرالات ودكتور ومقعد المرأة نجمة جد إعلام وإدارة وكمان رئيس شرفي للصفا ونجوم الزمن الجميل رفدوا اللجنة بنجم كبير وهل يخفي زيكو التاريخ الناصع صاحب الرأسية الذهبية والمؤهل علميًا ونجم المستقبل الشاب جفون والكندو والتركي والنهيزي ومياسم ومبشر نجوم ونجوم ونجوم تخمة عديل نفع الله بهم المريخ الرجل الصالح.

لجنة التسيير دي زي المسلسلات المصرية الكبيرة في تتر المسلسل تلقي كل مرة اسم نجم مفاجأة تخمة نجوم ونجوم وطبعًا الكلام دا صداه عارفنوا بأثر وين والقصة بتكون رفعت معدل الضغط هناك أصلوا كانوا فرحانين لما كنا نحن قرفانين وفي مشاكلنا غرقانين ما عايزننا نرسي على بر فإذا بلجنة الانتخابات تفاجئهم بكوكتيل نجوم وتاني ما يعرفوا يمسكوا الفي الملعب ولا الفي المكتب وحالهم بقي مافي معلوم.

دي الموسيقى التصويرية المسلسل يادوب بدا والقصة حاتكون فيها إثارة جد، والبقعد مع لجنة النجوم مصيره ما يقوم، لجنة سهل والخير بهل تاني بس إشارة والكشف يعيد ذكريات وهبه وبشارة، مريخاب أصحاب نية سليمة وعلي نياتكم ترزقون وقلنا ليكم اطمئنوا حواء المريخ ولود والزعيم بالخير موعود.

خلف الكواليس برضو نجوم وهل يخفي النجم الذهبي بصمته حاضرة والي الجمال حكمة وتشاور حجة وإقناع و15 نجم حصيلة التأني كل اسم يذكر الف من يثني، بعد دا دايرين نكتب بتمني، وقبل المباراة تبدأ نبارك ونهنئ نستعيد ذكريات تجي متأخر تسأل المريخ غالب كم ولاعب مع منو ليس هو الأهم بس ثقة في النجوم المريخ غالب كم.

قالوا شنو المجاهد أزرق الهوى وكان رئيس رابطة سنة كم وتسعين بالله شوف الضهبانيين، دخلتهم الخوفة قالوا يفرتقوا الصف وما عارفنا بقينا محصنين وكاشفين ألاعيبهم تمامًا كان قالوا لينا امشوا شمال نمشي يمين وخليهم في خيالهم سارحين وبكرة يصحوا يلقونا ردينا الدين وجيب من جوه يا أبو عشرين.

بأمانة فرحتنا نقصت شوية، بس في لحظتها ما حبينا نعلق قلنا نفرح بعداك نشجب وندين، المريخ كبير وكبير جدا ومنصة أمس دي صراحة ما بتشبه نادينا وعظمة الحدث ودي تفاصيل لابد من الاهتمام بيها وكثير من المواقع اهتمت بنقل الحدث وإن شاء الله لجنتنا تعالج كل الخلل مستقبلاً فالمريخ كبير وسيظل كبير ولابد من الاهتمام بالتفاصيل.

مجرد سؤال

من متين بتهمكم مصلحتنا؟