بابكر سلك
أمس كان اجتماع لجنة المريخ الجديد
عصر شديد عانى منه ناس حصريًا
معلومة طايرة ما لقوها
حصريًا عصريًا شديد
عصر جد
للمريخ ككيان، صفحة رسمية يجب أن تكون هي الحصرية
ولكن فوضى زولي وزولك
خلت صفحة المريخ زي عدمها
واتخصص الشغل للحصريات
زولي وزولك
ياخ أنا يوم مشيت تشييع في الحُصري (بضم الحاء)
قالوا لي ده الحُصري
مجمع الشيخ الحصري رضوان الله عليه
قربت أسأل من أخبار المريخ
قدونا حصري حصري
بقينا ما فارزين الحُصري (بضم الحاء) من الحصري (بفتح الحاء)
ولكن خيرًا فعلت لجنتنا الجديدة
خلت ليك الحصرية لافة بره زي كلاب الجزارة
راجين عضم طاير
لكن تاني بَبح
عصري (بفتح العين) بس
الداير خبر يمشي الصفحة الرسمية
ويا سامر يا أخوي ابقى عشرة
كناطق رسمي لا تنطق على هوى من يريد حصريات
انطق فقط بما تم تكليفك به
والداير الخبر
حلاة القول في خشيم سيدو
الصفحة الرسمية وبسسس
المهم
مما أعجبني نبأ ود نصر الدين والاستعانة به
وبيانُه الراقي
فضلًا عن مطالبة قطاع كبير من عقلاء المريخ بضم دكتور مدثر لركب المرحلة
ودا في حد ذاتو شكل من أشكال الوفاق الذي يعمل له العقلاء ويعملون عليه
وفي الآخر لا يصح إلا الصحيح
والصلح سيد الأحكام
أيها الناس
نحن في مرحلة لا تتطلب مدح الرجال
نحن في مرحلة تجبرنا على مساندة القرار ودعم مسيرة الرجال بالعمل الجاد
فالفرق بين من يحس حرية ويعيش بيها وليها
وبين من لا يحس حرية ولا يعيش بيها وليها
هو أن من يحس بحرية ويعيش بيها وليها يدافع عن الفكرة بِصرف النظر عن صاحبها
أما من لا يحس حرية ولا يعيش بيها وليها فإنه يدافع عن الشخص بصرف النظر عن الفكرة
فدعونا ندافع عن الفكرة
لأجل الحاضر ولأجل بكرا
يبقى المطلوب مننا مساندة كل الأفكار الجميلة
فالفكرة تحمل جمالها في طياتها
ولا تستمد جمالًا ولا جلالًا من صاحبها
أيها الناس
مرحى بالأفكار الجميلة بصرف النظر عن صاحبها
وقبل كدة قلنا إنه زمن الأغنية لا زمن المغني
ففي زمن المغني، يعيش الناس طربًا لكل أغاني مغني بعينه، ولا يكلفون أنفسهم مجرد الاستماع لأغنيات الغير ناهيك عن الاستمتاع بها
أما زمن الأغنية، فهو الإعجاب بأغنية جيدة عند مغني، مع الإعجاب بغيرها عند مغني آخر
فـ جودة الأغنية هي الفيصل لا شخص من يتغنى بها
أيها الناس
إن تنصروا الله ينصركم
أها
نجي لي شمّارات والي الخرتوم
كان شفت يا والينا
الناس دي كلها عندها أفكار في ريسنا
بس براهم (بربعو) ريسينهم، ويتبعوا أفكار، ويبخلوا بأفكارهم علينا
حقو كُلّو زول راسو مربّع يا والينا
يتحفنا بفكرة بدل قناعتو بأنه ما بفكر طالما السيد بفكر لينا
سلك كهربا
ننساك كيف؟ والكلب قال: سمعتوا قصيدة الكلب؟؟؟
بكرا بقولها ليكم
وإلى لقاء
سلك
