بابكر سلك
طبعًا الأمثالُ ما بتطلع ساي
أي مثل ليهو قصّة
وأي مثل عندو معنى
قد نختلف على قصّة المثل
وقد نختلف على معنى المثل
ولكن لا نختلف حول وجود المثل في قوائم الأمثال
الدّنيا دي كلّها عندها أمثال
في الأمثال البتكون في حدود المجتمع النشأت فيهو
وفي أمثال بتتجاوز حدود المنشأ
وتنتشر عالميًا بحرية
تحت شعار
نبقى نحنا مع الطيور الما بتعرف ليها خرطة ولا في إيدها جواز سفر
منتهى الحرية بمنتهى الإنسانيّة
وزمان إذاعة أم درمان كان ضمن برنامج الصباح عندها فقرة عن الأمثال
يجيبوا لينا المثل
ويورونا بلده
مثلًا يقولوا لينا: “لا أحد سواي يعلم أين يؤلمني حذائي”
موسيقى
مثل إنجليزي
وهكذا
نحنا ذاتنا بحالتنا دي لينا أمثالنا
ولو إنو عندنا أمثال كتيرة تؤدّي إلى تربية خاطئة وسلوك غير قويم وتحتاج لتعديل أو إلغاء ولو بقرار جمهوري
إلا إننا نحمد الله بي أمثالنا
والأمثال عمومًا عبارة عن ذخيرة تجارب حياتيّة وتراكم خبرات
ونحنا طبعًا خبراتنا من كوش
دولة الإنسان الأوّل
نحنا أصل البشر
ونحنا ونحنا
وشكارتها دلاكتها
المهم
عندنا مثل بقول: “كلام الطير في الباقير”
في ناس بقولوا إنو المثل ده يعني الكلام الفارغ
لكني أرى فيما أرى
إنو قصّة المثل ده مأخوذة من واقع
معروف إنو منطقة الباقير سواء كان باقير قدّامي أو باقير وراني
هي منطقة جنائن خلّابة
وبالتالي يجد الطير ضالّته فيها
يطير بحرية
منتهى الحرية
ويعود للباقير وجنائنها
ويغرّد قبل المغربيّة أثناء اختيار موقع النوم
كلّو بغرّد مع بعض
حتى تكاد أن تظنّ أنّه صراخ
لن تستطيع أن تفرز تغريد طيرة أو صوتها أو تعرف ماذا قالت إذا كنت من العارفين بلغة الطير
جوطة جد
الطير كلّو بنضم مع بعض وبأعلى ما يملك من صوت
وما في طيرة بتفرز غير كلامها
وده مدلول المثل بحسب اعتقادي
هذا المشهد الدرامي الذي تؤدّيه الطيور
هو نفسه المشهد الإنساني الذي نؤدّيه نحن
ما في زول بدي زول فرصة يتكلم
كلّنا نتكلم في نفس اللحظة
وبالتالي ما في زول عارف التاني قال شنو
ولا في زول داير يعرف
ولا في مجال لي زول يعرف
عشان كده نحن دائمًا في خلاف
على الرغم من إننا ما عارفين الآخر قال شنو
لكن نختلف معه
ليس لدينا أدنى استعداد لإتاحة الفرصة للآخر
ولا نقتنع بالآخر
والواحد فينا لا يرى غير نفسو
منتهى النرجسية
هذا الوضع السّيئ نجده متجذّرًا في شتّى ضروب حياتنا
بالذّات عند أهل السياسة وأهل الرياضة
لو لقيت زول حزبي مثلًا
وفي ندوة ينظمها الحزب النّد أو الضّد
ما بمشي
وإذا مشى بمشي عشان يبوّظ الندوة
في حين إنو كان الأجدر به أن يمشي ويحضر عشان يعرف الرأي الآخر
يمكن يطلع منو بكلمة واحدة مفيدة
تفيد الوطن
ولكنها الضديّة التي تقودنا دومًا لكلام الطير في الباقير
وتعال شوف وسطنا الرياضي
الطير ذاتو حيرناه في باقيرو
لا مجال للآخر
لا يقول رأيو
لا يدلي بدلوو
لا يتحقّق إنجاز عن طريقو
وكمان نضيّق الواسع لمزيد من الهيمنة
وهنا تبدو قضيّة
هل الواسع المنتخب أم الأندية؟
طيب ليه مضيّقين واسع ومودّين كورة المنتخب تنزانيا؟؟؟؟
ليه التشكيلة تضم متجد الكان في المريخ وكرشوم الكان في المريخ وكسري الكان في المريخ وبخيت الكان في المريخ والجزولي الكان في المريخ وتيري الكان في المريخ وطيفور الكان في المريخ؟
وتخلو من أبو عاقلة الكان في الهلال وأبوجا الكان في الهلال؟؟؟؟؟
صدفة يا ربي؟؟؟؟؟
وليه المنتخب ولو إنو مباراتو الفضلت تحصيل حاصل
ليه بالتنسيق مع الهلال يتخلى عن كرشوم وبوقبا ويضم مزمل لتجهيزو؟؟؟
برضو صدفة يا ربي؟؟؟
والأهم من ده كوووولو
كواسي حا ينضم رسميًا مديرًا للهلال متين؟؟؟؟
طبعًا أسامة كمدير كورة ومدير معسكرات ما بغيروهو
راحت عليك يا عبد المهيمن
المنتخب الواسع ده كووولو ضيّقناهو فضيّعناهو وبانت عوراتنا مخجلة
والغريبة البحصل ده كلو الناس اتكلمت في مضارو قبل استفحالو
لكن كان كلام الطير في الباقير
زول سمعو مافي
ولسة سيتكلم الطير في الباقير وزول بسمع طيرو مافي
المهم
ماذا فعل مجلسنا في موضوع تقليص عدد اللاعبين حتى يستطيع الجهاز الفني من الإمساك بخيوط العمل المفيد؟؟؟؟
كان اعتبرتونا طير (حاشاكم) ما تعتبروا المريخ باقير
أيها الناس
إن تنصروا الله ينصركم
أها
نجي لي شمّارات والي الخرتوم
اسمعونا يا والينا
ما تعتبرونا طير والبلد باقير يا أخينا
ما خاب من استشار يا والينا
سلك كهربا
ننساك كيف، والكلب قال مرة في طيرة في الباقير بتكورك: الكديس الكديس الكديس، ما في طيرة سامعاها لما الكديس قرضهن كلهن… هداك الريش متطاير.
وإلى لقاءٍ
سلك
