يا بلد صبحت كيف؟!

بابكر سلك

*اليوم ذكري نيلنا استقلالنا
*قبل سبعين سنة غنينا
*اليوم نرفع راية استقلالنا
*ويسطر التاريخ مولد شعبنا
*الكلام ده قبال سبعين سنة
*والآن وبعد سبعين سنة دعونا الا نحترب ونختلف حول المجد
*هل هو للبندقية ام للساتك ؟!
*المجد للسودان..المجد للاوطان
*ايها الناس
*عند انتهاء حقبة
*وقبل ان ندخل في حقبة جديدة
*بتقلب الصفحة
*وقبلما نقلب الصفحة بنجردها عشان نرحل رصيد الخلاصة للصفحة الجديدة
*كدي نجرد الصفحة القديمة
*ماهو ناتج الانجاز وماهو الرصيد المرحل للصفحة الجديدة
*بشفافية كدة
*الرصيد المرحل مخجل شديد
*لان اجابة سؤال الهوية لسة حائرة
*لسه تايهين وماعارفين
*هل نحن شعوب مختلفة تعيش داخل وحدة سياسية واحدة اسمها السودان؟
*ام نحن شعب واحد متعدد الثقافات واللهجات والاديان وتجمعنا اجمل هوية اسمها (السوداناوية )؟
*في العيد السبعين
*وبعد ان بلغ الاستقلال من العمر عتيا
*نسأل انفسنا
*شليل وينو؟
*شليل وين راح؟؟؟
*القطر وينو؟؟؟
*مشروع الجزيرة وين راح؟
*سودانير وينا؟؟؟
*خط هيثرو وين راح؟؟؟
*صمغنا وينو؟؟؟
*لحمنا وين راح؟؟؟؟
*بترولنا وينو؟
*دهبنا وين راح؟؟؟
*وطنا وينو؟؟؟
*بلدنا وين راح؟؟؟
*ضميرنا وينو؟؟؟
*ضميرنا وين راح؟؟؟؟
*معقولة بس ده كلو ختفو الدودو واكلو التمساح؟؟؟
*ده ماتمساح نصاح
*ايها الناس
*عشان تمشوا صاح
*اكتلوا الزول الكتل الكلب ووأد النباح
*وطني
*ربنا يعدل خطوتك
*ويلم شمل اولادك في لحظات هنية تعبر وتجسد السوداناوية
*المهم
*امس بالصف التاني خسرنا امام بوركينا النتيجة وكسبنا بعضا من الاداء
*نحنا (خترين)
*ماجبنا ولاقون واتأهلنا للمرحلة القادمة
*اتأهلنا في صمة خشمنا
*ونلنا شرف المنتخب الوحيد الذي لم يحرز هدف واتأهل
*نسأل الله الستر في الجايات
*وعلها بل عساها تكون جايات ماجاية واحدة ونرجع بربر
*كواسي تكتيكيا ماكعب
*بس خلوهوا براهو يختار المنتخب
*فرائحة التدخلات الخنفشارية والتأثيرات (الهنائية) ظاااااهرة
*وحقو ياكواسي تبقي زي ود الامين
*اي اشتراك معاك في مهامك
*وقف الاغنية وقول للذين يصرون علي الغناء معك باصواتهم النشاذ
*ماهو ياتغنوا انتوا يا اغني انا
*وبالتوفيق للمنتخب والستر واللطف
*المهم
*اي عمل للانسان يتحمل الخطأ والصواب
*عشان كدة حقو مانلوك لبانة خاطر اكتر من اللازم
*مسخت شديد
*وننظر للجزء الملئ من الكوب
*خير من ان نبكي علي الجزء الفارغ
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الليلة بالاستقلال محتفلينا
*لكن قبل الحفلة مفروض نحب بعضينا
*عشان مايبقي احتفال كضب والواقع بيفرق بينا
*عشان مانرقص كلو زول برا ويلم فينا الكلب يعضينا

سلك كهربا

ننساك كيف والكلب قال كان دي طريقتكم من ناحية بعضيكم…. بعضيكم

وإلى لقاء

سلك