خشما لا بشبع لا بحمد الله

بابكر سلك

*أمس لعبنا كورتين
*واحدة في السودان والتانية في رواندا
*كورة السودان كانت من عصرا بدري
*من قولة تيت ادونا قونين
*قونين والشمس برة
*وبدينا في ممارسة الاحباط والنقد من قبل القون الاول
*وبين الشوطين تعال شوف الهرجي
*لا خلينا مجلس لامحسن لاعوض زائد
*جرس دقينا ليهو جرس لما عرف حاجة
*وفي الشوط التاني كان هدفنا الاول
*والذي لم يغير من الاحباطات حاجة
*ثم جاء التعادل من كرة ثابتة تم تنفيذها بمهارة
*ورغم ذلك تمسكنا بالاحباط
*انتهت تعادل
*عدنا من بعيد
*وبعضنا لاتعجبه هذه العودة
*قالوا ده سهم الدامر ونحنا المريخ
*وكأن سهم الدامر مكتوب عليه ان يظل علي حاله طول العمر
*والمريخ مكتوب له المجد دوما
*سهم الدامر مالو؟؟؟ مافريق من حقو يتطور وينتصر ويجيب جوية كمان؟؟؟؟
*قالوا سهم الدامر حديث عهد بالممتاز
*طيب ناسنا الشاركوا ضدو ديل منو فيهم الماحديث عهد بالممتاز وبالمريخ ذاتو؟
*ياخ اكتر لاعب كان معروف لدي الناس كان أواب عنتر
*يبقي تشكيلتنا ذاتها كانت حديثة عهد بالممتاز
*حتي جرس نعتبرو كذلك لانو من خلال رحلتو الطويلة متنقلا بين الاندية
*كان رفيقا للكنبة دوما
*يعني خبرة (يوك)
*المهم
*جات كورة المساء
*الحكم بحسب في اللاعبين دخل فينا قون
*وقمنا ليك علي ابو خاش اليوم البني فيهو شاخور استاد المريخ
*لاخلينا مجلس لاداركو لا محترف ولا محلي
*برغم انو المباراة كانت ضد بطل الدوري المنظم المكتمل
*وجبنا هدف التعادل بجملة اشبه ببيت الشعر
*ولا عجبنا
*طفقنا وصفقنا واعلنا القنعان
*وانتهت الكورة ولم تنل رضانا الذي اصبحنا نبخل به علي المريخ
*بقينا لابعجبنا عجب ولا رجب ولا رمضان ذاتو
*وكأننا خلقنا لنبحث عن سلبيات المريخ وننشر الاحباط
*الغريبة بقينا نسايين كمان
*السنة الفاتت زي المواعيد دي نحنا في الدوري الموريتاني لاعبين بدون كنبة
*حداشر جوة الميدان وسوليناس بره والكنبة خلا
*ده كووولو نسيناهوا وفي خلال ستة شهور بقي عندنا فريقين جاريين بي احتياطيهم
*نسايين خلاس
*واعوذ بالله من خشما لابشبع لابحمد الله
*ايها الناس
*هذا الموسم اتفقنا انه موسم اعداد
*كلما اكتشفنا نواقص نكملها
*فقط بالصبر والجدية والمنهجية والثقة بالنفس
*والمجالس الواعية هي التي ترفع معدل الوعي الجماهيري
*لا تلك التي تتأثر بمواقف الجماهير العاطفية
*او تلك التي ترمي الراية وتهرب فرارا من النقد الجماهيري سواء كان ممنهجا خلفه اصحاب الاجندة
*او نقدا جماهيريا من وراءه العاطفه وحب الكيان
*النوع التاني ده امسكوا فيهو قوي
*فهولاء هم المخلصين ولو خانهم التعبير
*اشتغلوا معاهم زي شغل حبوبتي الله يرحمها معاي
*كانت فردتي وصحبتي قبال تكون حبوبتي
*بشاغلها طواااااالي
*اخلاقها ضيقة وانا كنت لايوق
*تقوم تخبتني بي اقرب حاجة
*اعمل فيها زعلان وامد قدومي
*وانا مستهبل ساي
*وهي بحنيتها رغم ضيق خلقها كانت لاتتحمل
*تقوم تجي تحضني
*وتقول لي انا لو مابريدك ماكان ضربتك
*يبقي علي اهل النقد الذي تدفعه عاطفة الاخلاص
*عليهم ان يعملوا مع مجلس بخطة حبوبتي معاي
*اذا فلت منهم تعبير
*يجوا للمجلس ويقولوا ليهو
*نحنا كان مابنريدك ماكان دقيناك
*وعلي المجلس ان يصفي النية ويقبل العذر الغير منطقي
*ولكنه يعبر عن محبة للكيان في الآخر
*ايها الناس
*الآن ظهرت بعض الخانات التي تحتاج لدعم بمستويات محددة
*لا اعتقد ان الامر يحتاج الانتظار لي شهر ستة
*الحروف واضحة والنقاط علي قفا من يشيل
*ايها الناس
*نحسن النية ونمارس الصبر الجميل ونمنع الحرب علي التسيير بدافع الكوم ونحارب بشدة كسير التلج للتسيير بدوافع اقلها المصلحة الشخصية
*ناس دايرة حتي المصلحة تكون حصرية
*ايها الناس
*نعلم موقف التسيير الحساس
*ولكن لن نغفر لهم اذا سكتوا علي الحقارة التي ظل تمارسها الاتحادات بينا
*لاننا كان بهمنا استقرار الموسم الرياضي وفقا للتوجهات والتوجيهات ولا يهمنا استقرار نادينا وحقوقه المسلوبة في اروقة اللجان بما فيها التحكيم
*واستغل الآخرون تلك المسكنة
*وطلعوا بكشف فيهو ستين لاعب
*ونحنا نعاين
*وامس لاعب السهم قرب يكتل اواب
*وصفوت يعاين
*ونحنا نعاين
*فيديو للقطة مرفق مع شكوي تخلي صفوت يحكم في الليق تاني
*الرجال مواقف
*وندرك موقف التسيير من استقرار الموسم الرياضي في البلد حسب( التوجيهات)
*لكن والله لم نعد نمرر مثل هيك صمت
*وعليهم ان يتمسكوا بحق المريخ والاندية الاخري وحق الدولة في ان تتطور وفي محاربة الفساد
*والا كان (دقيناكم) ماحانعمل زي حبوبتي ونقول ليكم لو مابريدك ماكان دقيتك
*بندقكم دق غبينة عديييل كدة
*مع خالص امنياتنا لكم بالتوفيق
*ايها الناس
*ان تنصروا الله ينصركم
*اها
*نجي لي شمارات والي الخرتوم
*تعرف يا والينا
*طالما في فساد مافي تقدم لينا
*حرب ضروس علي الفاسدين والمفسدين والساكتين علي الفساد يا والينا
*حتي ولو استمرت سنينا
*عشان نمشي لي قدام يا اخينا

سلك كهربا

ننساك كيف والكلب قال لما نسمع راجل بقول وووواي نحنا ذاتنا بنقول نجاووووو

والي لقاء

سلك