آكلك منين يا بطة؟!!
بابكر سلك
*أيها الناس
*إن الأخلاق هي عصب الحياة
*أي حاجة يجب أن تتحلى بالخلق القويم
*حتى عدم الأخلاق يُمارس بأخلاق وله أدب
*وأذكر حوارًا إذاعيًا قديمًا مع رجل أم درماني عريق كان موضوعه الأخلاق
*الراجل أسهب في البكاء على الأخلاق التي اندثرت
*وضرب لنا مثلًا اعتذر عنه قبل أن يرويه لنا
*قال كانت الأخلاق أساس أي شيء
*وأنهم في سوق أم درمان كانوا يجلسون الصباحية ليشربوا الجبنة ثم يدلف كل منهم لعمله
*قال شرق السينما كانت تقبع البيوت إياها
*أي زول عارف البيوت دي بيوت شنو
*وبيمارس فيها شنو
*ونوعية النساء البرتادنها شنو
*قال ونحنا جالسين حول الجبنة تطلع واحدة من تلك البيوت المعروفة جدًا وليست مشبوهة
*مؤكد هي بيوت شنو
*تطلع لابسة توبها ومبلمة ماشّة الدكان تجيب ليها غرض
*محترمة نفسها ومحترمة الشارع
*وترجع بنفس الاحترام
*معروفة هي شنو
*لكن لكل شيء أدبه وأخلاقه
*ولأنها تعطي الشارع احترامه
*ما كان الشارع ولا ناس الشارع يتجرأ أحدهم بالاعتداء عليها ولو بنظرة أو لفظيًا
*لأنه حتى الشارع كانت ليه أخلاقه البمارسها بمنتهى الأدب
*حتى قلة الأدب تكون الممارسة بأدب
*تذكرت ذلك الحوار الإذاعي مع ذلك الرجل
*وأنا أتابع فيديو عيد الميلاد
*ثم فيديو آخر لتدشين الشعار الجديد وأغنية عومي يا بطة
*وتأتي البطة وكأنها تردد (آني البتة البتوتة آني البتة البتوتة)
*تدشين لايمت للأخلاق المؤسسة العريقة بأدنى صلات الأدب
*وتخيل عمنا داك لو كان حضر الفيديوهين ديل كان عمل شنو
*الأخلاق هي معايير تقييم الأمم
*حيث يقول الشاعر
*إنما الأمم الأخلاق ما بقيت
*فإن هم ذهبت أخلاقهم ذهبوا
*قلتي لي ذاهبة وين يا بطة؟
*لكن ما لفت نظري في الشعار
*أنه جاء صادقًا معبرًا عن واقع عريق
*على الصدر
*وفي المنتصف
*وسط العلم
*تلقى صفر بالأسود
*يا لصدق التعبير والرمزية
*المهم
*شعار الوزين بي صيديرو عام وقلع
*سيغني له صن داونز
*آكلك منين يا بطة
*وكله بالأخلاق
*المهم
*اشتكونا في قلق
*وقلق لعب بموجب بطاقة صادرة من الاتحاد
*ما كان في داعي لضياع قروش الشكوى
*أيها الناس
*الزرع ما بثمر وينجض في يوم وليلة
*شيلوا الصبر
*عشان تستوي الثمار
*أيها الناس
*ليه الناس بتعتقد إنو المغربي جابوهو عشان يمسك مكان الصربي؟
*نحنا ما ناقصين شتات
*ليه ما يكملوا بعض ويدونا فائدة جهدهم المشترك؟
*أسّي داركو مالو؟
*بس عشان الهلال غلب تمنية طوالي داركو الجن ده بقى غير مرغوب فيه؟
*الصبر يا ناس والتقييم وقت التقييم
*قصة من وشو ده ما ردتو ما بتمشي مع العلمية والمنهجية في الإدارة
*وأنا متأكد بعد مباراتي صن داونز داركو ده حيكون أحسن مدرب في العالم
*بتكون أسباب الوترة راحت
*واطمئنوا
*الشعار الجديد فيه نقطة تعبر عن الواقع
*الأندية والمنتخبات لما تظفر ببطولة قارية بتخت نجمة على شعارها
*تختي النجمة يا بطة ولا تقعدي كده زلبطة؟؟؟
*لو دايرين نجمة تعالوا إلى حيث النجوم
*ما تخجلوا
*جيبوا معاكم خاطركم واقشروا بي نجمتنا
*وعاش مانديلا رمزًا للنضال والعدالة والسيادة الإفريقية
*أيها الناس
*إن تنصروا الله ينصركم
*أها
*نجي لي شمارات والي الخرطوم
*كان شفت يا والينا
*الناس مهما اختلف دينها
*بتتمسك بالأخلاق يا والينا
*لأنه بالأخلاق بتتبني المجتمعات متينة
*وتبقى فاضلة كل مدينة
*وبتتلاشى، الأذى الفينا
*بعد الحرب يا والينا
*أول حاجة نراجع الأخلاق الفينا
سلك كهربا
ننساك كيف والكلب قال قلة الأدب لما تمارس بأدب بتبقى هي ذاتها أدب
وإلى لقاء
سلك
