عالم مهووسة طلعوا بدرية جاسوسة!

محمد الطيب كبّور 

الجميل في الأمر فقداني القدرة  الدهشة، والله جد بقيت ما قاعد أندهش نهائي، بالأخص لو الأمر متعلق بشئ يخص الهلال، وكيف اندهش كيف والقوون ضربة شمس؟ سمعنا بضربة حظ لكن ضربة شمس دي جديدة كرت، وحقو الواحد يبطل عدم الاندهاش، ففي الأمس أوشكت على الاندهاش مع قراءة مانشيت صحيفة الأجراس الهلالية، الذي قالت فيه آيه بالمناشيت العريض: “جاسوسة مريخية وراء اللقطات التي اعتمد عليها الأهلي، والتي دخلت بدعوة من الشليق، جايبين معاه صورة الأخت الزميلة بدرية عبدالحفيظ مع الخبر وعلى الصفحة الأولى، خلوا كل حاجه ومسكوا في بدرية كأنها دخلت بطاقية الإخفاء، وبدرية إعلامية مُتخصصة في المجال الرياضي، ومتابعة المباريات من صميم عملها بعيدًا عن انتمائها فهي ببساطة كانت تمارس عملها بمهنية، ولو كانت هذة المباراة تجمع أي نادي سوداني بأي فريق من خارج الحدود في البطولة الإفريقية، فمن المؤكد أن بدرية وغيرها من الإعلاميين سيكونوا حاضرين.

اتخاذ بدرية كملهاة لن يجدي نفعًا، فالمباراة المعنية لم تكن في العصور القديمة، بل كانت منقولة عبر الشاشة بي ان سبورت الساحرة والكاميرات قد التقطت كل شئ، ومراقب المباراة وتقرير الحكم أيضًا لم يفتهما شاردة ولا واردة، لذلك ما تعملوا فيها مفتحين وتحاولوا تفتشوا ليكم عن كبش فداء، لتخفيف ما هو قادم من عقوبات.

غايتو مسرحية الجاسوسة بدرية دي ما ظابطة، والكلام دا حقوا ما تمرقوه عشان ببقي دليل إدانة ليكم، والكاف ممكن يفتح تحقيق ويسأل وين الفيديوهات الصورتها بدرية، ولو نكرتوا حايقولوا ليكم انتو القلتوا، وطالما انتوا قلتوا يبقى الكلام دا وراه كلام وفي تجاوزات حصلت وين بدرية! وببقى ليكم بمبي مع أولاد بمبا، خصوصًا انو في شوط تاني هناك في ستاد السلام، وعلى حسب متابعتي في صفحات جماهير النادي الأهلي الناس ديل ناوين ليكم نيه سوداء، أخ انا الخلاني أكلمكم شنو بكرة تقوموا تطلعوا بمناشيت كبير تكتبوا كبّور شنو كدا جاسوس، “هو أنا ناقص” علي قول عادل إمام في “شاهد ما شافش حاج”، وأنا طبعا ما خشيت المباراة ولا فكرت أصلًا اخش ستاد الهلال، وكنت متابع مباراة آرسنال واستون فيلا في ذلك الحين، لكن مرة مرة استجابة لرغبة بعض الأهلة الذين كانوا معنا، فإننا تنقلنا وشاهدنا دقائق معدودات من تلك المباراة ذات الأحداث والغريبة، وهكذا شاهدنا قون ضربة الشمس في إحدى تنقلاتنا تلك.

أكثر وضوحًا

الأهلي رفع شكواه والحكم كتب تقريره وكذلك المراقب، يبقى كترت البتابت عيب حقوا تركزوا بدل النطيط دا وترجوا الراجيكم، ويا خبر الليلة بفلوس بكرة يبقى ببلاش والعقوبات جاية جاية.

معقولة تصف إعلامية بالجاسوسة، بس عشان كانت حريصة علي أداء واجبها المهني بمتابعة مباراة من داخل الاستاد، للدرجة دي أي حاجة منسوبة للمريخ  بتصيبكم بالهوس يا عالم يا مهووسة.

من غاروا سمعنا انو موفدكم طلع ما بعرف أي لغة للتخاطب، حتي اللغة العربية قالوا في تلتلة وشغال بلغة الإشارة، وتامّيها ابتسامات والغريبة بدرية ما سافرت غاروا، وبعد دا كلو خبر موفدكم انتشر.

تصريح العليقي بضرب سيف مسّاوي للحارس الاحتياطي للأهلي علي لطفي برضو جابتو بدرية يا عالم يا مهووسة؟ عيب تطلعوا ضيفتكم جاسوسة وانتوا العملتوها ما مدسوسة وفي الشاشة كانت مبثوثة.

مُجرّد سؤال؟

بالله دا إعلام دا؟