عدد الزيارات: 0
بابكر سلك
- لما تمشي الدكتور
- ويديك مسكنات وفايتمينات وكورتزون
- ثق تمامًا إنو ما عرف إنك مالك
- وببقى زي الدكتور المشى ليهو مريض وشكى ليهو
- والله يا دكتور بتجيني خمت نفس وشحتفت روح ولفت راس وطمام طمام شديد وحرقان وجسمي ده ميييييت….. أكون مالي يا دكتور؟
- يقوم الدكتور مستعينًا بعلمو الواسع يرجع لي ورا ويقول ليهو بتكون عيان
- ده الحاصل لي اليومين دي
- تلاتة دكاترة شابكني مسكنات وكورتزون وما خلوا لي فايتمين من بسم الله والي B12
- بكون مالي يا دكتور
- مفيش، حا تبقى زي الفل
- خمسة وعشرين يوم بالحالة دي
- المسكنات ذاتها بقت تخاف من الوجع العندي
- يا حليل شمسنا الكانت كاتلة أي شي ممكن يصيبنا
- لحدي يوم خمسطاشر أبريل الشوم
- الواحد فينا كان مات ما برقد
- تلقاهو حايم بي موتو يقرقر ويضحك وضارب المرض بالضحكة
- الله يجازي الكان السبب
- إسعافهم ذاتو قصير
- ياخ كرعيني ما عرفت أختهم وين
- قال لي خت رجليك عليك شوية يا حاج
- قلت ليهو أنا لو قادر أجرهن علي مؤجر لي إسعاف فوق كم
- اللهم إن كان مرضًا اشفيه
- وإن كان سحرًا أبطله
- وإن كان حزنًا على البلد ساعدنا يا ربنا نضحك ساي في الله كيتا للنحيب
- المهم
- المنتخب جاط ليك أفريقيا كلها
- ودخلها ليك في حسابات لولوة معقدة جدًا
- الستة مجموعات جاطها ليك هدفنا
- الهدف الذي أحرزناه
- الذي أحرزه….
- هو أحرزه منو؟؟؟؟
- المهم
- جطنا الدنيا كلها
- جطناها ليك جنس جوطة
- وأصبح أمر تأهلنا لمرحلة قادمة وارد
- وارد بشدة
- نسأل الله ما يكون تأهلًا فيهو قول الشاعر
- قد يبتلي الله بعض القوم بالنعم
- ويقوم التأهل يختنا في طريق منتخب متعطش للبطولة والأهداف
- ونحنا شباكنا دايمًا متعوّيدة
- أيها الناس
- في أي سوء في حسنات
- ما في سوء مطلق
- تفتكروا أحسن ناس في كورة المنتخب الأخيرة كانوا منو؟
- لما تجاوب حا تكتشف إنهم الذين مارسوا اللعبة بمدارس سنية منذ نعومة الأظافر
- أما ناس أركبوا ودقوا
- فالحال يا هو نفس الحال
- نسأل الله التوفيق لمنتخبنا
- ونشكر درهم الحظ ونحلف عليهو طلاق يقعد معانا شوية
- يمكن قعاد درهم الحظ يزيد دراهم الحوافز بتاعت اللاعبين “الفي الحفظ والصون”
- أها
- أمس تعثرنا بالتعادل روانديًا
- قالوا المطرة
- لكن الشوط الأول ما كان في مطرة وما كان في كورة
- وقصة المطرة دي ذكرتني قصة الزول الشاكي في مرتو
- قام جاب ليهو ببغاء خشمو خفيف ختاهو في قفص جنب الباب
- رجع صاحبنا من السوق
- الببغاء ما خلا حاجة ما يفتها ليهو
- أها
- يوم صاحب الزولة دي جا
- قالت ليهو الببغاء دي قوال وخشمو خفيف
- قال ليهو جيبي موية
- وهو مدسوس ورا الباب والببغاء ما شايفو
- رش الببغاء بالموية
- الببغاء غمر وفقد الوعي
- دخل وأخد قعدتو
- وهو مارق شال ليهو موية تاني ورش الببغاء
- الببغاء تاني غمر
- صاحبنا اتخارج
- سيد البيت رجع من الشغل
- قال للببغاء الليلة الحاصل شنو؟
- الببغاء قال ليهو خليني من الحاصل…. الليلة جاتكم مطرة في السوق؟
- الزول قال ليهو ما جاتنا مطرة
- الببغاء قال ليهو كان كده المرة دي ما قاعده في الواطة… طلقها
- أها نحنا الشوط الأول ما جاتنا مطرة
- نجيب ببغاء يعني؟؟؟
- الحمد لله الفرصة سانحة لانتدابات
- الخرمجة ما حبابها
- ونشتاق للهتاف القديم
- دي موش كورة…. دي مزيكا
- أيها الناس
- إن تنصروا الله ينصركم
- أها
- نجي لي شمارات والي الخرطوم
- كان شفت يا والينا
- الكورتزون ما بداوينا
- لكن بشغل المرض الفينا
- وبخلينا نحنا والمرض لافينا
سلك كهربا
ننساك كيف، والكلب قال المسكنات ما علاج وبتجيب فشلًا كلويًا…. يا حليك يا شمسنا
والي لقاء
سلك
