بابكر سلك
من شابه أباه فما ظلم.
وبرضو من كان له نصيب من اسمه فقد صدق.
يعني ما ممكن يكون اسمك الصادق وتكون كضاب.
وما ممكن يكون اسمك الوسيم وتكون أقبح الناس.
وما ممكن يكون اسمك عادل وتكون أظلم من ظلم.
وما ممكن واحدة يكون اسمها جميلة وتكون لا جميلة ولا شي.
عشان كدة من المنطق أن يكون لك من اسمك نصيب.
وأنا أرى أن (الصادق) كان صادقًا جدًّا عندما سمى نفسه (نادي الهلال للتربية).
كان له من اسمه كل النصيب.
ياخ ده شديد، ما مربي عمرو كلو ما رفع كاس.
تربية جد.
كاس سيكافا ما رفعو.
ولا برفعو.
مربي شديد.
ونعم التربية.
والجميل فيهو متمسك بي تربيتو دي.
والناس تغني: ها يا ببا يا علب المربي.
واليوم دي سامع قالوا ما عايزين تربية.
عايزين يبقوا شفوت مقرمين.
زي المريخ وأهلي القاهرة والترجي، وكل الشفوت الرفعوا كاسات عبر المطارات.
لكن آه، وييين يا؟
من شب على شيء شاب عليه.
خليكم في تربيتكم دي يا محمد عبد الماجد وما تنحرفوا.
ما تنحرفوا عن طريقكم الماشين فيهو مية سنة.
نحنا غايتو سمينا روحنا عدو الأصفار.
أصفار الدنيا دي كلها ما بتنفع معانا.
اتربينا على كدة.
وإنتوا اتربيتوا عكس كدة.
فكان لكم من الاسم نصيب.
قالوا عمك كلود سأل ولدو جان.
بالرطانة.
قال ليهو: (بنجوس فاروقي لاعوبي عاموري كامومي سانوني).
يعني الفريق البتلعب فيهو عمرو كم سنة؟
جان قال ليهو: (قاروني زاموني).
يعني قرن من الزمان.
كلود قال ليهو: (فاروقي كابوري؟).
يعني فريق كبير؟
جان قال ليهو: (قالولي كابوري).
يعني قالوا لينا كبير.
كلود قال ليهو: (شايولي كاسوسي جاوووي كامومي ماروري).
يعني شال كاس جوي كم مرة؟
جان قال ليهو: (خابوري).
يعني خبرتني؟؟؟
كلود قال ليهو: (كاضوبي كاضوبي… آنوتي لازومي شايوفي نادودي جاوووي شانوشي قاولي لاعوبي فاروقي كابوري… أسي وادودي واشوشي وايني مانوني ناووسس كونتا وسوغبا وكنتي جاروري؟ قاوولي والودي لاعوبي نادودي صافوري؟).
يعني كضب كضب، إنت لازم تشوف ليك نادي جوي عشان تقول بلعب في فريق كبير… أسي أودي وشي وين من ناس كونتا وسوغبا وكنتي جيراني؟ أقول ليهم ولدي بلعب في نادي صفري؟؟؟؟؟
يا محمد عبد الماجد.
خلوا الاسم القديم وقولوا لينا منو نصيب.
المهم.
الزعيم أمتع وفاز بالتلاتة.
لا جاب لاعب جديد ولا غير داركو.
قلنا وكت التقييم لسة ما جا.
عشان كدة الصبر سمح.
وأسي لا قدر الله درون بعد الثلاثية دي الحرب بتقوم.
يا إخوانا الحرب ما بتعمر.
خلونا من القصة دي.
ختوا الكورة واطة.
وبالمنطق تنتهي كل المشكلات بمنتهى السلمية والاحترام، بدون احتراب.
فهمتوني؟؟؟؟
افرض المعارضة كتلت المجلس.
المريخ بستفيد شنو؟
افرض المجلس كتل المعارضة عدمها نفاخ النار.
المريخ بستفيد شنو؟
عشان كدة ما تخسر أخوك المريخي لاختلاف وجهات النظر وتشعلها حرب تقضي على الجميع.
أيها الناس.
إن تنصروا الله ينصركم.
أها.
نجي لي شمارات والي الخرطوم.
تعرف يا والينا.
لو لاقيناك في شارع الله والرسول ده إلا زول يعرفك بينا.
ما في علاقة خاصة وسابق معرفة يا والينا.
لكن كمان إحقاقًا للحق يا أخينا.
في البلد دي لو في زول واااحد مناسب وقاعد في الكرسي المناسب هو والينا.
سد دي بي طينة ودي بي عجينة وما تسمع كلام المرجفينا.
سلك كهربا
ننساك كيف والكلب قال هو كرسي واحد شيلوهوا منو، خلونا نقعد في واطات الله دي.
وإلى لقاء
سلك
