بابكر سلك
*بكرة أحلى
*عبارة لا تجد حظها عندنا إلا على ألسنتنا
*نحنا أولاد النهار ده
*عبارة لا تعرف لألسنتنا طريقًا
*شكرًا للفشل الذي علمني النجاح
*عبارة نعجب بها
*فقط مجرد إعجاب
*لا نعمل بها بدليل خروجنا من دائرة فشل لندخل في بئر فشل أعمق من تلك التي خرجنا منها
*ونغني
*نغني بدون ما نختشي
*نحنا وانحنا
*ونحنا التاية والانداية
*نفخر بالفشل ونصنع منه بطولة
*كرري التي هزمنا فيها لأننا خضناها دون استراتيجية.. نفسها كرري التي تحدث عن رجال كالأسود الضارية
*ما في بلد في الدنيا دي ولا شعب في العالم ماضيه أفضل من حاضره غيرنا
*في جميع الحقب والأزمنة
*يا حليل أمس
*ودائمًا الأمس هو الزمن الجميل
*ليس أجمل منه سوى أول الأمس
*وبالطبع أول أمس أفضل منه أول أول أمس
*تقول لي منو وتقول لي شنو
*الآن الدولار تفوق قيمته الأربع مائة ألف جنيه
*خلونا من كذبة نشيل تلاتة أصفار لنطلق على الألف جنيه مجازًا وخجلة وسواقة بالخلا لقب جنيه
*ولما كنا كان جنيه واحد من الألف الجوة جنيه الزيف الحالي بساوي قريب أربعة دولار
*إنها السودنة يا حبيب
*والسودنة عندي لا تعني سوى أمس أجمل
*كلما قربت لتاريخ السودنة تجد أن الوضع كان أحلى
*أما بكرة والنهار ده
*خليك منها
*كان عندنا مشروع جزيرة يفخر به التاج البريطاني
*أكبر مشروع زراعي في الوجود يتم ريه انسيابيًا
*ولا تدور مصانع يوركشير ولانكشير إلا بعد لقيط القطن بالجزيرة
*سلمونا ليهو كدة الذين كفروا
*ولما استلمنا نحن الذين آمنوا المشروع آمن
*خطوط السكك الحديدية داخل المشروع لزوم الترحيل أطول من حبال الصبر التي يمدها الوطن لنا
*وكان عندنا سودانير بتتبرع بطيارات للخطوط الإثيوبية بطيارات تحت شعار فضل الزاد والبياكل براهو بخنق
*وتعال شوف الأكل
*هو داب أكل
*شوف حال الإثيوبية وحال سودانير
*إنها السودنة يا أخي
*وكان عندنا قطر
*البقول توووووت وبمشي
*تك تك… تك تك تك…. ويجري فرحان يجوب أرض وطن تامي ما مضقلم وكتها
*وكان مليون كلم مربع القطر يحومها كلها من بف نفسو بي نفس واااااحد
*الآن لا سكك لا حديد
*حتى الفلنكات اتشفشفت
*الوطن ذاتو ضقلمناهوا
*بقت خريطة السودان تشبه جلد العتوت
*ولا زلنا نغني
*نتمسك بالمثل الذي يقول
*دار أبوك كان خربت شيلك منها عود
*ونغني ونحن نسلسل في عيدان دار أبونا بدون خجلة
*حا نبنيهو
*ويا حليلك يا بلدنا
*وكان عندنا أخلاق
*والله العظيم كان عندنا أخلاق
*ما تشوفنا كدة
*كان عندنا أخلاق زي الورد
*ما قلت ليك ياما كنا وياما كنا
*وسودناها ليك
*فشفشفناها ليك
*عدمناها طفاي النار
*تقول لي منو وتقول لي شنو؟؟؟
*أيها الناس
*الناس بتحب الكمونية برغم ماضيها القذر
*لأنها بعد طبخها تبقى أحلى
*لكن نحن عكس الكمونية
*ماضينا أحلى بكتير
*ثم ضاع الأمس منا وانطوت بالقلب حسرة
*فهل قابلكم بلد أمسُه أفضل من حاضره غيرنا
*أيها الناس
*في الرياضة دي ياما كنا
*كنا رئيس الاتحاد الإفريقي لكرة القدم
*كنا حضورًا أنيقًا في الأولمبياد
*كنا خليفة حسن والكشيف وكيجاب وسارة جاد الله وممدوح والأعيسر ووليم أندريا
*كنا زي الورد
*والليلة ياما كنا
*كنا على لسان نيلسون مانديلا رمزًا للتضامن الإفريقي على درب النضال
*تتذكروا مانديلا لما قال إن أنسى لا أنسى عقب إطلاق سراحي من المعتقل ذهبت للسودان
*فقابلني رئيس الوزراء بالمطار وسلمني جواز سفر دبلوماسي سوداني ساعدني كثيرًا في التجول ومنحني حصانة ساعدتني في التواصل بحرية مع كل مناضلي إفريقيا الحرة
*وقتها كنا ننشد لإفريقيا حرية سلام وعدالة
*يعني سياسيًا برضو كنا وياما كنا
*وكنا رأس إفريقيا ولكنا اخترنا ذيل ناس تاني
*والغريبة نتلصق فيهم
*لكن
*لماذا كنا ولم نعد كما كنا؟؟
*السبب عندي الهوية
*نحن نفتقد للهوية
*لا نحتاج للصيق في زول
*فقط نعترف بهويتنا التي تجمعنا
*بسودانويتنا التي توحدنا
*تحببنا في بعضنا
*وفي وطننا
*فنحن نحب بلدنا ولا ينقصنا سوى أن نحب بعضنا
*فهل بالحب نعود لما كنا عليه
*هل من عودة تاني؟؟؟
*أيها الناس
*إن تنصروا الله ينصركم
*أها
*نجي لي شمارات والي الخرطوم
*كان شفت يا والينا
*محبة بعضنا كل الهامينا
*ما دايرين حوار مركز وهامش يفرق بينا
*الحقيقة كلنا هامش يا والينا
*وممكن الوطن يبقى مركز كبير كلنا يأوينا
سلك كهربا
ننساك كيف والكلب قال كان ختيتوا الكورة واطة بتغلبوا أي زول
وإلى لقاء
سلك
