فريقنا واستاد الموردة

بابكر سلك

*نادي الموردة الأم درماني العريق العتيق المعتق.
*كان يمثل الضلع الثالث للقمة الكروية بالسودان.
*وفي أحيان كتيرة كان يتفوق على طرفي القمة.
*كان يشكل بعبعًا لهما.
*اها
*الموردة دي عندها استاد.
*تتقصه بعض الأشياء البسيطة.
*قاموا اتملوا طموح.
*واتنفخوا وقفوا قربه.
*دايرين يكملوا نواقص الاستاد ليواكب.
*وبدون دراسة.
*وبمجرد وعود من البعض.
*لموا ليك في الاستاد كسرك كسرك.
*حتوهوا وختوهوا في واطات الله دي.
*كسروهوا حتة حتة.
*وقعد لي يوم الليلة حطام وأطلال.
*ما كانت في دراسات وميزانيات وخطط لإعادة التأهيل.
كسروهوا وصقيرو حام..

*الحصل في استاد الموردة ده.
*حصل لفريق المريخ.
*دايرين نعيد بناء الفريق.
*لمينا ليك فيهو كسرك كسرك.
*سفرك سفرك.
*طفشك طفشك.
*اشطبك اشطبك.
*عيرك عيرك.
*بيعك بيعك.
*ما بجدد ليك ما بستوعبك.
*ما بفطرك.
*أسجلك قبال تدقها بي تراضي أرجعك.
*وكسرك كسرك كسرك.
*طفشك طفشك.
*فرتقك.
*بشتنك.
*ختينا الفريق في واطات الله دي.
*خطوة أولى لإعادة البناء.
*واكتفينا بذلك.
*وأضحى الفريق مثل استاد الموردة.
*مهدود ينتظر الخرائط ومواد البناء الجديدة لنبني.
*واكتفينا بذلك.
*كومين رقيطاء وتراب طوف وقلاب مونة حمراء.
*كبيناهم.
*وأوهمنا أنفسنا إننا سنعيد البناء والتشييد.
*وقرطنا علي كده.
*وأضحت قصة استاد الموردة هي قصة فريقنا.
*أما استادنا اسكت بس.
*الاستاد يطير.

*الفريق
*الفريق الكان قدام.
*بقي “الغريق” قدام.
*وسنقف علي الأطلال لنشدو.
*نشدو مع أم كلثوم الأطلال.
*ونقرض الشعر علي شاكلة.
*يا دار سلمي بالجواء تكلمي.
*وعمي صباحًا دار سلمي وأنعمي.
*وغنا الأطلال حااااااااار.
*أخير نغني زاد الشجون.
*نغنيها مع اجترار ماضي الفريق.
*نغنيها بحرقة.
*ادعينا وقولنا يمكن نكتم الحب في سهرنا.
*وقبل ما تمر ليلة واااحدة.
*بي حرارة الشوق غمرنا.
*نحن نشتاقك يا مريخ.
*وفبراير ده.
*إن شاء الله السنة دي.
*مع التغييرات المناخية دي.
*يطلع خمسة وعشرين يوم بس.
*يا منذر.
*يا راصد جوي.
*شوف لينا طريقة تنهي فبرايرنا يوم خمسة وعشرين.
*ستة وعشرين كتيرة يا منذر.
*أيها الناس.
*إن تنصروا الله ينصركم.
*اها
*نجي لي شمارات والي الخرتوم.
*كان شفت يا والينا.
*البحصل ده كتير علينا.
*الفينا مكفينا.
*القصة مادقيق فينا.
*القصة الناس البتلعب بينا.
*القصة حكامنا و سياسيينا.
*مليون سنة يحكموا فينا.
*لا حسوا بينا.
*لا حنوا علينا.
*لا عرفوا البينا.
*لا قشوا دمعة حزينة من عينينا.
*لا أدوا الناس فرصة تحلحل دينا.
*طلع البترول يا والينا.
*ما شفناهوا في صينية غدانا.
*طلع الدهب.
*طلع من البلد قبال نشوفوا في غتانا.
*في تعليم جنيات حشانا.
*والصمغ عديل كدة أبانا.
*بقي يمرق من ورانا.
*خيرات البلد علي حل شعرها.
*طالعة ونازلة ماشفالة بينا.
*الناس يا والينا.
*طلعت عينا.
*وطلع… إنسان عينا
*تاني ما يحكمونا سياسيينا.
*الشعوب يقودها مثقفوها وفنانوها يا والينا.
*ادونا سحبة.
*فعجلة الوطن ملك للجميع.
*خلونا نسوق معاهم يا والينا.

سلك كهربا

ننساك كيف والكلب قال حتي لو قلتوا يبيعوا بيت الورثة وكلو زول يدوهو حقو.. حايقولوا ليكم حقكم أكلتوهوا زماااان كسرة “بكسر الكاف” وبقي لي غيركم فقرة “بكسر الفاء”.. الشعوب يقودها مثقفوها ياناااااااس.

وإلى لقاء
سلك