جائز وجوائز

*لاتوجد حقيقة مطلقة في هذه الدنيا غير الموت
*تقول فلان مات
*يقولوا ليك جائز
*لكن جائز بالجوائز دي ماسمعنا بيها الا بعد موت المرحوم الذي توفي يوم ستة وعشرين فبراير بموريتانيا اثر تدوينة جوية
*الطيارة جات متشقلبة
*وتووووووووف
*دونت ليك
*صاروخ مات علي اثره من كان يظن ان لن يحورا
*والفاجعة دفعت سيد (الفراش) ان يكرم الجنازة بتحفيزها
*شغل فراعنة
*الفرعون لما يموت بدفنوا معاهو كشكوش
*ظنا منهم ان الحساب يمكن يطلعو مديون ويدفعوهو الفرق
*او
*يمكن تعجبو حاجة في الآخرة يشتريها
*عشان كدة بدفنوا معاهو كشكوش
*اها
*سيد الفراش كافأ المراحيم علي موتتهم بالضربة الجوية
*القصة دي مابردت الحشا
*قاموا طلعوا ببدعة جديدة
*تكريم نجم الشهر
*وممكن تكون مبلوعة لو كرموا نجم شهر فبراير مثلا
*لكنهم كرموا نجم ديسمبر ويناير وفبراير
*يعني تلاتة شهور لي ورا
*يعني اساسا ماكان عندهم تكريم لنجم الشهر الا بعد ضربة بركة الجوية
*شقلبت بركة
*شقلبت الحال والافكار والاقمار
*كرموا ناسهم باثر رجعي
*والضربة الجاية مابعيد يكرموا جكسا
*قال نجم الشهر قال
*موش احلي كان تكرموا هدف الموسم الذي شهدت له موريتانيا كلها
*وزغردت له نساء موريتانيا بكل عنفوانهن وجمالهن وادبهن الجم
*وانا لو محل النمير
*بعرس لي بركة من موريتانيا
*خليهو يفتح لينا الباب ده
*وبعد داك اذا بلغ الفطام لنا صبي
*جرينا خطبنا ليهو من موريتانيا
*غايتو يابركة لو ابيت الجائزة دي
*خالك سلك قااااااعد
*خلينا تنشنقط و(نتهنقط) خالفين كرعيننا
*ووصية للاخ العليقي
*لن تحلك التكريمات
*مشروعك ده من ناحية مات… مات ياحبيب
*قول جائز وبطل جرسة الجوائز لن تحي لك سنابل ماتت
*المهم
*يمضي اعدادنا
*والعجبني انو ميشو فضل الاستمرارية بالدوري برغم فقدانه لعشرة لاعبين بسبب المنتخب
*ده الاعداد الصاح
*لانو فيهو فرصة للجميع ليدلوا بدلوهم ويأخذوا فرصتهم
*وفرصة للجهاز الفني ليقف علي مستوياتهم
*عفارم عليك ميشو الحبيب
*المهم
*استاذنا ود الشريف كتب عن عدم حبو للمصريين لانهم بتعاملوا معانا بفوقية
*يا استاذي
*انت تقصد فقط قليلي الثقافة من الشعب المصري الشقيق
*والجهلاء منهم
*فلا تأخذ الشعب المصري بما فعل السفاء منو وتشجع ضد الاهلي الشقيق
*اهلنا المصريين الفاهمين المثقفين الواعيين بعاملونا بمنتهي الادب والاعجاب
*لانهم عارفين قيمتنا
*ومنهم جماهير الاهلي الشقيق
*فلا تظلمهم ولاتظلم نفسك
*ولو خلااااااس مصر
*خليك ماسك العصايا من النص
*ولو قالوا (دئي يامزيكا)
*شوف اقرب صعيدي وارقص معاهو
*الجاموسة في الغيط عارفة انو الرقصة جايه جايه
*ياخ ديل لو غلبوا شوية
*بخصموا منهم نص الحافز
*تقول لي شهر تلاتة نجم الشهر مشترك؟
*مشترك بتاع كهربا!!!!!
*غايتو تحفيز العليقي ده ذكرني نكتة الرباطابي
*قالوا جيرانهم يضربوا في الرصاص
*طااخ طاخ طييخ طوووخ
*كورك ليهم بالحيطة
*مالكم ياناس في شنو؟
*قالوا ليهو ولدنا ممتحن الشهادة والليلة النتيجة طلعت
*والرصاص شغال طاخ طوخ
*الرباطابي قال ليهم جاب كم؟
*قالوا ليهو تسعة واربعين في المية
*قال ليهم ولسة مانشتوهوا؟؟
*ده ماياهو حال العليقي؟
*يكرمهم يوم هزمناهم
*ويكرمهم باثر رجعي ببدعة نجم الشهر
*وطاخ طيييخ طوخ
*لسة مانشتهم ياعليقي؟
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*الصيام ما واقع لينا
*سميناها رضينا
*لكن كل امانينا
*برش الفطور يأوينا
سلك كهربا
ننساك كيف والكلب قال تحفيز المهزوم دليل فقدان بوصلة
والي لقاء
سلك