ما وراء الخبر

بابكر سلك

*الخبر هو الأخبار بواقعة.
*وهو نوعان:
*كلو نوع بجي في حالة.
*الأولي أن يكون المخاطب خالي الذهن من الحكم الذي تضمنه الكلام.
*ويسمي فائدة الخبر.
*مثلًا تقول لي زول أنا اليوم ذهبت للسوق.
*والثانية هي أن يكون المخاطب عالم بالحكم الذي تضمنه الكلام.
*ويسمي لازم الفائدة.
*وده زي لما تقول لي زول أنت ذهبت اليوم للسوق.
*بالتأكيد المخاطب هنا عارف روحو مشي السوق.
*ولكن يستفيد من هذا الخبر أن المتكلم عالم بالحكم الذي تضمنه الكلام.
*يعني عارفين إنك الليلة مشيت السوق يا فردة.
*وقد يلقي الخبر لأغراض أخرى.
*زي الفخر والحث على السعي والجد وحاجات بالشكل ده.
*ومع تطور الحياة وظهور الذكاء الاصطناعي.
*ظهر ضرب جديد من ضروب الخبر.
*علماء اللغة لسة مالقوا ليهو اسم.
*بعضهم يطلق عليه تأدبًا ما وراء الخبر.
*زمن الغتتة والدسديس انتهي.
*لذا أنا أطلق عليه المغرسة.
*فقد يلغي الخبر لأجل المغرسة.
*والمغارس في زمننا ده علي قفا من يشيل.
*الغنا ذاتو بقي كلو مغارس.
*المهم.
*أمانة المال بالهلال الشقيق.
*قالوا اطلقت شكر.
*وإن صح ما قالوهوا كون انو صادر عن أمانة المال بالهلال.
*هو في حقيقتو خبر.
*أعلنت أن الأهلة الذين اسهموا في دعم الكيان علي رقم الحساب المنشور.
*كانت مساهماتهم مجتمعة حوالي تلاتة ألف دولار ونيف
*اطلقوا الخبر ده.
*ولكن كان المقصود إن اسهاماتكم ضعيفة.
*نقطونا بي سكاتكم.
*حيث أن الأصوات تعالت مطالبة بجلب لاعبين علي مستوي يؤهلهم لإخراج الكيان من النفق الصفري.
*اها ده بسموهوا ما وراء الخبر.
*لكنه عندي مغرسة.
*المستفاد من هذا الخبر هو.
*انتوا يا شعب الهلال بطلوا مجمجة.
*فتحنا ليكم الفرصة ليكون دعمكم قدر طموحاتكم.
*كوووولكم مساهمين ليكم بتلاتة الف دولار وشوية.
*كدارة لنجم في المستوي البتحلموا بيهو مابتجيبها.
*دايرننا نحنا نفرين ندفع ليكم ملايين الدولارات؟.
*وماسكين لينا جاز كمان؟.
*هيييي وهيييي وتاني هيييي.
*نحنا نفرين كان خليناهو ليكم موية صحة جان كلود مابتقدروا بتلاتة الفكم دي توفروها.
*نقطونا بسكاتكم.
*قال ملايين قال.
*ملايين متبرعين بملاليم.
*ودايرن كمان تشيلوا كأس إفريقيا!!!!
*هيييي وهييييي.
*وتاني هيييييي.
*نحنا كان قمنا.
*ما بنديكم الزيت.
*بنديكم السمنة.
*والله ياهو الفضل.
*أيها الناس.
*ألم أقل لكم إن الخبر قد يلقي للمغرسة!!!!!.
*المهم.
*اعدادنا يسير علي قدم وساق.
*فقط أرجو أن لا يغرنا الانتصار علي فرق ضعيفة مثل الهلال وتلودي.
*الاتنين فيما يتعلق ببطولات الكاف يشكلان صفرًا كبيرًا.
*صفرا دي حلوة.
*بالتنوين كمان.
*أيها الناس.
*إن تنصروا الله ينصركم.
*اها
*نجي لي شمارات والي الخرتوم
*كان شفت يا والينا
*القنوات العالمية والإقليمية لما تلقي الخبر علينا.
*بكون في كل خبر عندهم ضرب من اضرب الخبر دايرين يضربوهوا بينا.
*لكن نحن ناقشييين يا والينا.
*بنحضر، الخبر ونضحك ملئ شدقينا.
*ونعمل فيها رايحين فاغرين افواهنا ومنططين عينينا.

سلك كهربا
ننساك كيف والكلب قال وقد يلقي الخبر من مسيرة لكن الله في.

وإلى لقاء
سلك