بابكر سلك
بتعرفوا الامباز؟
كسرة
أمس حضرت على قناة الزمالك مباراة من الأرشيف بين الزمالك وبراميدز، نهائي كأس مصر موسم 2018/2019
الزمالك غالب تلاتة وشال الكاس
مدرب الزمالك ميتشو
هذا للمعلومية
لكن هذا دخلو شنو في الموضوع؟؟؟
المهم
بتعرفوا الامباز؟؟؟؟
الامباز الواحد ده
الامباز البياكلنو البهايم
بجيب لبن وشحم ولحم
ما بتاكلو إلا بهيمة عز، سيدها صارف عليها
يخلطو ليها بالردة وتلهط
ولو ظرف سيدها ضيق
بخلطو ليها بدريش الفتريتا
مع تقليل نسبة الامباز
ما عرفتوا الامباز؟
الامباز ياخ
الامباز الواحد ده
المهم
الامباز ده لو اديتو للخباز
تفتكر أمهر خباز بقدر يعمل ليك منو تورتة؟؟؟
كدي جرّب
جيب خباز وامباز
وشوف البحصل
مية شيف عالمي
أكيد حا يفشلوا في صناعة كيكة من الامباز
يبقى نحنا بدل طوالي جايبين خباز
حقو نقتنع إنو يستحيل صناعة تورتة من الامباز
ما ممكن نبيع دقيق البسبوسة ماركة (جزولي) مدة صلاحيته لسة باقي ليها سنين ضوئية، ونجيب امباز كولومبي مدتو منتهية ونقول للشيف اعمل لينا بسبوسة
ما ممكن نفرط في دقيق الفينو الصافي من كل الماركات المجربة (كرشوم دبل زيرو) أو (خميس الأول) أو دقيق الزلابية المعروف اللما ترميها في الزيت بتقول (تششششش)
ونجيب بدلهم شوال امباز ماركات معروفة سانتياغو وما شابه
ونجدع شوال الامباز ورا
ونقول للخباز دايرين تورتة عالمية ولا كيسك يطير
أكيد حا يفشل الخباز
ولو كان أعظم شيف في العالم
العيب ما في الخباز
ولا في الامباز
العيب في الناس
البفتكروا إنو العيب في الخباز الذي يفشل في صناعة تورتة من الامباز
عرفتوا الامباز؟؟؟؟
يا ربي الخباز القادم منو؟؟؟؟
أيها الناس
المثل بقول: الما بتعرف، ما تدوها تغرف
بتكشح الملاح وتبشتن الحال
وتزيدو الطبيخ امباز
ياخ لما تجي تخطب
بتعزل الناس البعرفوا يتكلموا وتسوقهم معاك
ما بتودي الأشتر البفلق ويداوي ويطربق بفهم وبدون فهم
التفاوض ده داير البتعرف
والمابتعرف دي شفنا مفاوضاتها وغرفها المبشتن
تغرف لحم (جمل)
والجمل حيوان أليف يعيش في الصحراء…. إلخ
وطبعاً بحتاج لامباز
ونزيد الامباز لأجل الجمل
أيها الناس
الما بتعرف بتفاوض على طريقة الكديس والمشلعيب
الما بتقدر عليه بتقول: عففففففن
لذا أرى في الأفق بوادر تفريط في دقيق الفينو ماركة (كانتي)
لأنو البتغرف ما بتعرف الفرق بين دقيق الفينو والامباز
حاتقول دقيق كانتي عفففففن
وتستبدلو بامباز جديد
وتطلب من الخباز تورتة
غريب
طلب غريب
وسيقف حمار الخباز مع الامباز
ما علينا
قدرنا أن نصبر على ما أصابنا
والرضا بالمقسوم عبادة
بس بعد يكمل ما تجدعوا الفاضي
خلوه لينا نحاول نملأه من جديد
إن كان في العمر بقية
وإلى ذلك الحين سنكون مع الجمل والخباز والامباز
راجين الإنجاز
عيش يا حمار طالما يتوفر الامباز
أيها الناس
إن تنصروا الله ينصركم
أها
نجي لي شمارات والي الخرتوم
تعرف يا والينا
الحرب دي مرّقت كتير من العيوب الفينا
وبرضو مرّقت السمح الكان مدفون فينا
نصفي النية يا والينا
يذهب الزبد ويبقى المفيد لينا
بس برااااحة يا والينا
سلك كهربا
ننساك كيف والكلب قال المضطر بياكل الامباز… واضطرينا
وإلى لقاء
سلك
