شاد شنو!

بابكر سلك 

ما بين أهلي جدة وأهلي في العرضة
مسافات وسنين ضوئية
أمس خرج أهلي جدة من صفره الدولي
ليس صدفة ولا حظ
ولكنه عمل على ذلك بجد واجتهاد
لم يخطب ود الأميرة (الصفراء) بالأمنيات
بل جهّز نفسه تمامًا
بمحترفين على مستوى
على الأقل جاب مهاجم..
حتقول لي الإمكانيات؟
ودي الشمّاعة الغطّست حجر البلظ
بلد البِنت والولد
وخلتنا نقتنع بالفشل دومًا بكل رحابة صدر، عشان ما عندنا إمكانيات
والمقصود بالإمكانيات هو الإمكانيات المادية طبعًا
ده كل المقصود
لأننا لا نقتنع بالإمكانيات البشرية
ولأننا كذلك
لا نهتم بالاستثمار في الإنسان
مع إنو الإنسان ده هو أهم عناصر الإنتاج
لكن عندنا الإنسان هو أعم عناصر الفشل وخراب المزاج
البلد كده
وأنديتنا كده
لأنو الموضوع في النهاية هو نجاعة العملية الإدارية
والإدارة هي إدارة المال
والمال يعني كل الموارد التي تؤدي لإنتاج وفير يحقق الأرباح والإنجاز
مفهوم زي ده ما عندنا
عشان كده بلدنا كده
وكورتنا كده
وذمتنا… الفساد بقاها قد كده
وعشان كده حنظل كده
لو ما غيرنا مفهومنا الكده
اليابان مواردها الطبيعية شنو؟
ماليزيا بت أمس دي مواردها الطبيعية شنو؟
دول عرفت تستثمر في العقول، ومضت بعيدًا عن التخلف والفقر والمرض دون أن يكون لها مورد طبيعي واحد
وها نحن…
هيييييع
الدهب ما دهب
والضهب
سبعة مجاري مائية عذبة طبيعية تجري في بلدنا
وبلدنا تجري من التطور والنهوض
أراضي لو زرعت فيها كلي تقوم
ونستورد الفواكه والقمح والسكر
نحنا كده
لذا كورتنا كده
ها هو أهلي جدة
وها هم أهلي في العرضة
فرق السما من الواطة
ليس لأن هناك في بترول وهنا ما في بترول
بل لأن هناك المجد للعقول، وهنا لا مجد للعقول
ده كل الحاصل
وبعد الفاصل
على نفس النهج سنواصل
حنسلّم البلد دي زي ما استلمناها من ربنا
لا مصانع، لا مزارع، لا مرافئ، لا مناجم، لا فنادق، لا سياحة
نسلمها بربطة المعلم
أصلو الأمانة كاتلانا
لا نملك سوى أن نبارك لأهلي جدة
ولكل الذين أتوا من بعدنا وفاتوا
تصدّق؟
بحضر في قناة شاد
عملوا صرف صحي
ومحطات كهرباء تعمل بالطاقة الشمسية أضاءت لهم القرى والحضر
وأنشأوا محطات مياه شرب تعمل بالطاقة الشمسية تسقي الإنسان والزرع والحيوان
شغالييييين
ونحنا طبعًا أحسن منهم
شاد شنو كمان؟
هييييع
نحنا الكيك
أفووو
المهم
اليوم نواصل الدوري الموريتاني الشقيق
أتمنى ألا نواصل في الإخفاق
برغم أن الفترة غير كافية لغريب
لكن كمان مساحات الصبر جوانا انعدمت
ونتمنى أن يكون الإحلال هذه المرة
إحلال حلال وإبدال بلال
نحتاج للكثيييير
ليس كي نتعافى تمامًا
ولكن على الأقل عشان نعيش
وأتمنى أن يهتم غريب بنواة الفريق من صغار السن
ويشركهم جميعًا
تأهيلهم أهم لينا من النتائج
وبي أيدينا صمّمنا لازم نبنيك يا بلدنا
أيها الناس
إن تنصروا الله ينصركم
أها…
نجي لي شمّارات والي الخرطوم
والينا… الله يهدينا

سلك كهربا

ننساك كيف، والكلب قال: “خشمي عندي”
وإلى لقاء
سلك