بابكر سلك
هل ممكن يكون في فريق بطولات بدون مجلس بطولات؟
وهل ممكن يكون في مجلس بطولات بدون فريق بطولات؟
وهل ممكن يكون في نادي بطولات بدون جمهور بطولات؟
وهل ممكن يكون في جمهور بطولات بدون فريق بطولات؟
وهل ممكن تكون في بطولات تجي في الأحلام والناس نيام؟
وهل ممكن تجي البطولات بالتمنيات؟
ولا هل ممكن البطولات تجي منقادة تجرجر أذيالها تخطب ود ناد لاعندو مجلس بطولات؟
لاعندو فريق بطولات؟
لاعندو جمهور بطولات؟؟؟؟؟
هل البطولات دي صندوق (ختة) الزول يصبر لما صرفتو تجي؟؟؟؟
جميعنا يحلم بالأميرة السمراء
نريد أن نخطب ودها
وشرعًا كده الكفاءة مطلوبة في الزوج
يعني ما ممكن تكون عنقالي
مقطوع من شجرة
مفلس
أمي
تنضح جهلًا
وتجي تتقدم بنفس فاتحة
طالبا يد طبيبة
في غاية الجمال والأدب
بيتها بيت علم وكرم وأدب
كده بتحرج نفسك
لكن الكفاءة غير مطلوبة في الزوجة
ممكن يكون الشاب وسيم ومكانة ومتعلم وود قبائل ووارث وحاجة ما تخلص
ويطلب ود بنت غير متعلمة
أسرتها فقيرة
أبوها كان فطر الغدا في خطر
بالشرع كده الكفاءة غير مطلوبة في الزوجة
ويقول الفقهاء إن القاعدة العامة لمقياس الكفاءة أن يكون الزوج مستطيعا أن يوفر لمن يخطب ودها الحياة التي تعيشها في بيت أبوها
لازم يوفر ليها حياة مثيلاتها
ومن خلال الكفاءة المطلوبة تلك
يرسل لنا الفقه رسالة مفادها
إنه في العرس ده بالذات
مد كرعينك قدر لحافك
وبمناسبة الكفاءة دي
زمان
قالوا في زول قدر حاله
لكن فاكيها في روحه
راكب زورق الأحلام
ما عنده قزاز
برغم ذلك رافع القزاز
رافع طموحه شديد
خلي بنات خلاته وعماته
وقرر يتزوج بنت قارية مدارس إنترناشونال
بتقضي إجازاتها في المالديف
الدولار عند أبوها في بنك السودان ما في
بنت أرقى من النسمة
لو قرمت من التفاحة
العنبة تقول (أحي أنا)
لو سلمت عليها في يدها
شدت ما ناعمة
تحلف تقول ختيت يدك في لبن بودرة
المهم
لمّ خالاته وعماته
رافقن أمو عشان يخطبن ليهو البنت دي
أجر ليهن حافلة كوستر سوبا المحلي مركبة مكانة جاز أب أربعة
ووصف ليهن البيت ووراهن اسم البنت
اتوكّلوا ومشنّ
وصلن البيت
أول شي افتكرن البيت السفارة الأمريكية
قطيع عربات دفع رباعي واقفة بره
أشجار الرويال تقف شاهدًا على مستوى ومحتوى ناس البيت
وناس الهدف بزيهم الأنيق يكملون اللوحة
غايتو ده ما بيت
لوما السفارة الأمريكية
بكون دار الأمم المتحدة
المركز الرئيسي لشرق ووسط أفريقيا
اتوكّلوا دخلن
لقن أم العروس فاتن حمامة بس
العروس وأخواتها
الحور العين الله خلقن
خالات العروس كان خلاس كرمشن
ليلى علوي ويسرا
والتورتات طوابق
أمو في سرها قالت
الصابرات روابح
جابوا ليهن العصير ماشي براهو
الجك مبارياتنو الكبابي
المهم
عرفن إنو ولد ده ما نصيح
وعزف وتر الكفاءة على عقولن
وعرفن ده ما طوبا بشبه تيابن
ابن يفتحن موضوع الخطوبة نهائي
وأهل العروس راجيات الطلب
أم العريس ختت كباية العصير بعد نشفت ريق العصير جوة الكباية
ونظرت للنسوان المعاها
نظرة كلها تحذير مفادها
البنت تفتح خشمها بشرطو ليها
وقطعت ليها اسم من راسها
وقالت لي أهل العروس
نحنا جايين بالوصف لي ناس في حلتكم دي اسمهم ناس عبدالوهاب تومينا بتعرفوهم؟
المرة عرفت قدر نفسها وضقلمت كرعين ولدها المداهم بره لحافه وزاغت من الورطة
ركبن الكوستر ورجعن
السؤال
هل بي طريقتنا دي لسه بنحلم بود الأميرة السمراء؟
ولا أخير لينا نسأل عن ناس عبدالوهاب تومينا ونتخارج قبل ما نحرج نفسنا؟؟؟؟
نادي البطولات يجب أن يكون له مجلس بطولات يعمل بوعي ومنهجية وعلمية وخطط تهدف لرفع كفاءة الكيان ليصل لدرجة الكفاءة الشرعية المطلوبة فقهًا، ويجب أن يكون له فريق بطولات ينضح حرفية واحترافية ومواهب وطموح تحت قيادة أجهزة فنية متكاملة تملك الكفاءة والمعرفة والخبرة
ويجب أن يكون له جمهور يعرف كيف يساند
وكيف ينال العضوية
وكيف يساهم في البناء ونيل العضوية وممارسة حقوقه في الجمعيات العمومية
والأهم من كل ذلك كيف يحارب الظواهر السالبة
وكيف يصبر على صغار السن من المواهب وكيف يصبر على نيل البطولات طالما كان البناء يسير بطريقة صحيحة
لذا
إن كنا نريد ود الأميرة السمراء
يجب أن تعمل كل تلك المحاور بتلك الحرفية والمنهجية والعلمية التي تجعلنا أصحاب كفاءة شرعية
بخلاف ذلك
لا علينا إلا أن نسأل
بتعرفوا لينا بيت عبدالوهاب تومينا؟؟
ونركب كوسترنا
ونتطلب الله من التمهيدي
أيها الناس
أن تنصروا الله ينصركم
أها
نجي لي شمارات والي الخرتوم
كان شفت يا والينا
البقت علينا
ماعندنا كفاءة في مجال يعنينا
في كل المحاور نسأل عن ناس عبدالوهاب تومينا
سلك كهربا
ننساك كيف والكلب قال كان دي طريقتكم اركبوا كوستركم وشوفوا عبدالوهاب تومينا وين
والي لقاء
سلك
