بابكر سلك
*في تصريح منشور منسوب “للراجل بتاعنا” زي مابقولوا اخواننا المصريين
*ورد ان الرجل طالبنا بالصبر
*وهو ماعارف اننا صبرنا لما عجز الصبر عن صبرنا
*صبرنا لما آمنا
*لم نكفر بالصبر
*ولم نفتر من الصبر
*لكن كتر علينا
*الراجل بتاعنا عصر علينا شديد وهو يطالبنا بالصبر
*شخصيا ماقادر اصدق ان مثل هيك تصريح يصدر من رجل بمثل هيك منصب
*ولي منو؟
*للشعب الصابر القابض علي الريح وهي تضري حصاد عيشو واحلامو وتطجنها دقيقا ثم تنثرها علي قارعة الطريق
*جاء في التصريح الماقادر انا اصدقو
*ان الراجل بتاعنا فيما معناه قال
*التيم مافيهو خبرات ليها وزنها
*ومافيهو مهارات وطنية
*وان الاعتماد علي الاجانب ليس حلا
*وان البلد (ياحليلها) مافيها مواهب (علها قد نزحت)
*وان المعارين رفضوا يرجعوا (تخيلوا…رفضوا)
*وكأن قرار العودة بيدهم (عشان كدة ماقادر اصدق انو الراجل بتاعنا قد صدر منه هذا الكلام)
*وقالوا قال نصبر بس
*نصبر
*نسوي شنو عاد
*هو نحنا بنعرف اكتر من الحكومة؟؟؟؟
*لكن يا حارسنا وفارسنا
*الكسر المرق وشتت رصاص الخبرات الوطنية منو؟
*الجاب الاجانب الخصموا من الفريق كتير جدا لدرجة اضحوا ماحل منو؟
*ده كولو خليهو
*لو انت قلت الكلام المنشور ده
*الجاب سانتياغو منو؟؟؟؟
*الاتخلي عن بعض المواهب الوطنية منو؟؟؟؟
*تعرف يا حبيب
*ان كان التصريح المنشور قد صدر منك فعلا
*تكون البصيرة ام حمد موقفها افضل من موقفك بكتييير
*علي الاقل البصيرة ام حمد التي اشارت بذبح التيس الذي اولج رأسه بالزير
*ولم ينجح ما اشارت به
*ثم اشارت بكسر الزير
*ففقد الناس التيس والزير والماء
*حلها للاشكالية ادي لابادة جماعية لكل المكونات
*تيس وزير وماء
*موقف البصيرة ام حمد افضل من موقفك
*فعلي الاقل البصيرة ام حمد لم تولج راس التيس داخل الزير
*اما انت
*دخلت التيس في الزير
*وطلعتو
*ودخلت الزير في التيس
*وطلعتو
*وجبت سانتياغو ضبح التيس وكسر الزير وكشح الموية
*ثم التفت الينا متبسما تدعونا بالصبر
*طبعا ده كولو اذا كان التصريح المنشور المنسوب لك قد صدر منك
*اما نحنا
*ورانا شنو غير نصبر
*سنصبر حتي يعجز الصبر عن صبرنا
*ونصبر حتي يأذن الله في امرنا
*ونصبر حتي يعلم الصبر اننا نصبر علي شئ امر من الصبر
*سنصبر حتي تنتهي الحرب
*وننظف الانقاض
*لنعيد بناء الوطن
*الوطن المريخ
*المريخ الوطن
*ونعيد ساتتياغو لاهله سالما (غانما)
*اما الري المصري
*الذي يتحكم في مياهنا
*يعطشنا بمزاجو
*ويفتح بوابات الخزان لتهرب من بحيرتنا مياه عزيزة لميناها زي دم الحجامة
*فله يوم
*لكن ماقادر اصدق ان هذا التصريح المنشور المنسوب (للراجل بتاعنا)
*قد صدر عن (الراجل بتاعنا)
*ايها الناس
*تاني من بلدنا رحل زول جميل
*انه موسم رحيل الجمال
*رحل عنا الرائع احمد جاويش
*الفنان الانسان القامة
*صاحب المدرسة المتفردة
*والحنجرة القوية الطروبة
*المتواضع
*اخو الاخوان
*الف رحمة يا ابو حميد وفي عليين يا حبيب
*ولنا الصبر الجميل
*اليومين دي شغلنا كولو صبر
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*لن يفلت الصبر من ايدينا
*حانصبر ونحير الصبر ذاتو يا والينا
*فالثقة بالله كبيرة وهي البتنجينا
سلك كهربا
ننساك كيف والكلب قال صابر عبدالصبور امو الصبر جدو الصبار مات كمد ويقام المأتم بقرية الصابراب ريفي الصبرة
والي لقاء
سلك
