بابكر سلك
*المسميات ليست بالضرورة أن تكون معبّرَا صادقًا عن المسمى
*فقد تكون لمضاراةٍ خجلى الحقيقة
*وقد تكون للتضليل
*أو للتظليل
*وممكن تكون للاحتيال
*وإيهام الناس بجمال المسمى
*في حين أن الحقيقة هي القبح ذات نفسو
*رحلة ترمب الأخيرة لديار العرب
*أطلقوا عليها كثير من المسميات التي تضاري الخجلة والانكسار
*وتجمّل وجه القبح الحقيقي
*إنه ليس قناعاً
*بل الوجه الحقيقي للقبح
*شينين شدييييد
*أسموها رحلة وزيارة وتفقد وشوق للأصدقاء العرب
*ولكنها في حقيقتها كانت لملمة للجزية
*نعم… الجزية
*يدفعون الجزية صاغرون
*رسوم الحماية
*ولكن السؤال:
*حماية ممن؟؟
*للأسف… من شعوبهم التي قد تفكر في حكم البلاد
*جزية وبس
*وما في داعي للغتغيت
*زمن الغتغتة انتهى
*والأمور بقت على المكشوف
*يقوم مقام أمير المؤمنين
*يأخذ الجزية بنفسه
*ما برسِل زول عشان يجي يقول ليهو “هذا لكم وهذا لي”
*عشان كده ترمب ما قعد في بيت أمه وأبوه ورسل زول
*جا براااااهو
*لقط الفيها النصيب ومشى
*أيها الناس
*بالحاصل في الدنيا دي كلو
*تفتكروا في وقت أنسب للقيامة غير زمننا ده؟؟؟
*غايتو ربنا جلّ شأنه هو الوحيد العارف متين الساعة
*أمرها عند ربي
*لكن لو ترك الله أمرها لينا
*كان زمااااان قمنا كترابتها وشطبنا
*المهم
*المريخ يريد إنقاذ النظام
*نريد فك اللجام
*اللجام الذي قيدنا وكبّلنا حتى صرنا إلى ما صرنا إليه
*نقارع أندية الوسط بالدوري الموريتاني
*اللجام الذي أقعد فرسنا عن الانطلاق
*لأن الفارس الجحجاح يمسك باللجام لوحده
*وبقية الجوكية لا يعيرون الوضع اهتماماً
*والجوكي طبعاً هو الركيب
*عشان كده بستغرب لما الجوكي ما يكون عارف إنو شد اللجام بقعد الفرس وبحميهو الانطلاق
*لو ما عارف يبقى ما جوكي
*ولو ما جوكي… ما في داعي يربط حمارو مع حمير الكتبة
*أما لو عارف وعامل رايح
*تبقى مصيبة
*ولا نملك حينها إلا أن نقول
“اللهم أجرنا في مصيبتنا وأبدلنا خيراً منها يا الله”
*لكن أبدلنا سريع يا رب
*أيها الناس
*نريد أن يعود مريخنا ماردًا
*بالتأكيد ليس لنا صالح في أن تكون تلك العودة في عهد “من”
*صالحنا في العودة ذات نفسها
*لا نؤمن بكيمان ولا بإنسان ونعادي غيره
*فقط نؤمن بكيان
*لذا نتمنى العودة الليلة قبل بكرة
*وإن كان الأجانب ما حل
*والبلد ما فيها مواهب
*والصبر هو المشار إليه
*نقترح
*وبالذات بعد قرار الاتحاد الليبي إنهاء الاستثناء للاعبين السودانيين
*نتمنى استعادة طيورنا التي هجرتنا ومشت ليبيا
*نرجعهم ولو عن طريق الإعارة
*على الأقل عشان نلحق
*ما دايرين نحلق خارج السرب السنة دي كمان
*وبجوا
*أساساً هم وداهم القنذب
*نكتر الجرجير
*وليبيا تفتح لينا صدرها
*ما في جرجير… ما في داعي للفصاحة والتنظير
*أيها الناس
*الجميع يتحدث عن شرعية
*البيوت ذاتها يجب أن تكون فيها شرعية
*والشرعية هي الحلال والبلال
*إذا توفرت في شيء زانته
*وإذا غابت عن شيء شانته
*أسي عملية ترمب الأخيرة دي شرعية؟
*زول يجي بي روحو يشيل قروش الناس ويرجع
*ونفس الناس ديل مستكثرين الجنيه على غزة
*أسي دي شرعية؟؟؟
*وهل أضحت حكوماتنا العربية فاقدة الشرعية للدرجة دي؟
*للدرجة التي تجعلها فاقدة للسند مجهولة الأبوين وتدفع الجزية كمان بأيدي صاغرة طائعة مختارة تلملم وتعد وتسلّم!!!!!!
*ياخ شرعية الحكومات خليها
*نحن في مريخنا ده
*وقطعاً للجدل الكثير
*قول الحصل في جمعيات الموردة كلو شرعي
*والنظام الأساسي ما نسخ مختلفة
*وااااحد وشرعي
*دلوني على المادة التي تفيد أن المجلس من حقه أن يُعيّن رئيساً له في حال استقالة الرئيس المنتخب
*لأني دايش
*وكنت قايل إنو المادة بتقول في حال استقالة الرئيس المنتخب يقوم نائب الرئيس للشؤون الإدارية بمهام الرئيس إلى حين انتخاب رئيس جديد
*كنت قايل كده
*صححوني ووروني المادة الصح
*فأنا تهمني جداً الشرعية المريخية
*حتى لا نتهم بأننا فاقدو سند
*أدونا سند الشرعية عشان نسيب السيرة ديّة
*أيها الناس
*أول من تلقى نقاش الشرعية والنظام الأساسي دور
*أعلم تماماً أن فريق الكرة المريخي يمر بأسوأ حالاتو
*أيها الناس
“إن تنصروا الله ينصركم”
*أها
*نجي لي شمارات والي الخرتوم
*تعرف يا والينا لما كنا عيال
*فهمونا لا تبعية لأي ريال
*لا إسترليني أو دولار
*عشان ما تجينا مذلة وجوع وغلاء أسعار
*رجعوا لينا جملنا الفي جنيهنا
*عشان نستعيد الجمال
سلك كهربا
ننساك كيف، والكلب قال بالغت يا ترمب
بقيت تشفشف علني… وبنفسك كمان
وإلى لقاء
سلك
