بابكر سلك
لما يغرق زول ويحتل لا سمح الله
تختلف توقعات الناس حول المكان الذي سيظهر به الجثمان
ويبدأ التنظير
بظهر في الغابة
أبدًا ما بظهر في الغابة
بظهر الموردة
موردة شنو يا زول؟
البحر في الموردة عميق والتيار قوي
بظهر في أب روف
روف وين يا…
إنت من زمن جنازة البحر بتطلع في أبي روف؟
بظهر في الحتانة
حتانة وين مع الكماين الكتيرة دي؟
الطمي كلو باعوه طوب
بظهر في الجزيرة إسلانج
إسلانج إنت؟
حايظهر في السبلوقة
سبلوقة؟؟؟ جثمان ولا ود أبرق؟!!
بتجاوز الشلال وحيظهر في شندي
شندي شنو يا زول؟
حايظهر في الشمالية
شمالية وين يا حبيب؟
الجثمان ده كان زول حريص شديد ما يظهر في الشمالية
الجثمان ده حا يعرد
حا يتجاوز المعقول والحدود
حا يتخطى السد
الجثمان ده أرجوه في كورنيش العجوزة
على جهات مسرح البالون دي حيظهر
يختلف الناس حول مكان ظهور جنازة البحر،
ولكنهم يتفقوا على أن الموت حصل، والقصة كلها مجرد جنازة بحر.
ده حال النخبة،
الموت حاصل ومتفق عليه،
بس الاختلاف حول مكان ظهور الجنازة.
والواقع يقول: إن الجثمان قد تجاوز الدامر، برغم التجهيزات لاستقباله هناك.
لذا..
حقو ناس كعابيش يمشوا كورنيش العجوزة،
الجثمان ده كان اتخطى العجوزة،
تاني إلا إيطاليا.
الجثمان ده من حياتو كان طموح جدًا،
وكثيرًا ما حلم بالسمبك عابرًا البحر الأبيض لأوروبا.
جثمان النخبة خلّى الناس كلها واقفة على النيل لاستقباله وانتشاله وسترته،
ولكنه تجاوز جميع التوقعات.
وبالمناسبة دي..
قالوا زمااان في ناس غرق ليهم زول، وعسكروا على النيل انتظارًا للجثمان،
جا واحد بلدياتنا ماشي شاف المنظر،
سألهم:
الحاصل شنو؟؟؟
قالوا ليهو: في زول غرق
قال ليهم: متين؟
قالوا ليهو: قبل تلاتة يوم
قال ليهم: (أه) ده بكون مات
وأضم صوتي لبلدياتنا ده،
يا معتصم وأسامة،
(أه)… زولكم ده بكون مات.
أيها الناس
ليه دايمًا في كل أمورنا نعاني من سوء الإدارة؟؟
ليه التخبط هو ديدننا دائمًا؟؟؟
ليه الفاشلين ديل بكنكشوا في المواقع ويملونا (فقر) وفشل؟؟؟
أيها الناس،
عرفتوا ليه الأميرة السمراء طوالي بترفضنا لما نطلب ودّها وتقول لينا دايرة أقرأ؟؟؟
أيها الناس
بعد الدامر راجيين جنازتكم دي وين؟؟؟
الله يطوّلك يا روح..
أيها الناس
إن تنصروا الله ينصركم
أها
نجي لي شمّارات والي الخرتوم:
كان شفت يا والينا،
أمورنا كلها غرقت، ومنتظرين جثامينا،
والجثامين رافضة تطلع لينا،
حتى الجثامين عرّدت يا والينا،
ونحنا في إجماع سكوتي،
سادين دي بي طينة ودي بي عجينة.
سلك كهربا
ننساك كيف؟ والكلب قال:
“في جثامين كدة ما صدقت إنها اتخارجت مننا… لو رجيناها سنة ما بتطلع لينا تاني.”
وإلى لقاء
